Mizoram state le Assam state ramri buainak kong cu an dai rih hlei lo. Assam state nih Mizo pawl duhherh zalhnak lampi cu atutiang an phihkhanh rih ko hna, Assam cozah nawl neitu zongnih motor ngan, ei le din a phurmi kal ko hna seh an ti ko nan. Nizan tihni ah Mizo vuanci pawl zongnih khua an ruatmi cu Assam state cozah nih kan duhherh zalhnak lampi hi saupi a kan phihpiak rih ahcun Manipur state, Bangladesh ram le Myanmar ram ah kan duhherh ei le din cu lak khawh kan i zuam ko lai an ti. Thilman zong kaiter lo ding in an vuanci te nih mipi cu an forh hna.

Power le Electricity minister (vuanci) a simi Pu Lalzirliana zong ramri buainak a hmun tiang a va kal i Assam pawl nih ramri buainak kongah an kan ngamh taktak ahcun Mizo hi mihuaisen kan si zia hi an theih ko lai a ti. A chim rihmi cu ramri buainak ruangah le tapung kut in a thimi ramri congtu palik cu phaisa ting 35 in Mizoram cozah nih kan pek hna lai i kumkhat a ttuan rihmi a si zongah kum 30 ttuanmi bantuk in ruahpiak a si lai i a nupi le a fale zong nih pensen zong an lak khawh lai a ti rih. Mah zawn ahhin Chin state cozah nih an i cawn ve awk a si tiah ka ruah.

Mizo le Assam ramri buainak kongah hin Chin miphun nih cawn awk tampi kan nei. Milu tlawmte an si nan Mizo pawl nih Assam pawl cu an ngamh tuk hna. Zankhat zong biatak tein an i vua hna/an i tthua hna i hliamhma pumi zong an tam ngai. Mizo lei in hliamhma a pumi pawl cu an siizung umnak ah a dihmi vialte Mizoram cozah nih a liampiak dih hna. Cu pinah Rs.5000 cio a pek rih fawn hna. Mizo cu miphun tlawmte an si ve ko nan an ram le an miphun caah cun an nak in a tamdeuh mi Kala pawl zong an ttih hna lo i ralttha ngai le lungrual ngai in an doh ngam ko hna. Chin miphun nih kan i cawn awk ah a herh hrim2 mi a si, lungrual le raltthat kongah. An video zoh awk a tampi lai. Rak zoh ve uh. Chin mino cahrim ah a herh bakmi a si. Credit: Van Tum