By. Rolian: 2020 thimnak ah Falam CNLD Party in MP aa cuh ve ding mi Pi Cherry Zahau nih 6 September 2020 ah Vice President Henry Van Thio nih Tikir Dam, Tikir UPC biakinn le Meithahnak motor khuachung kam le Tikir B le A kar lam VIP Bangalaw inn kong a tial mi fianternak leh lehnak kan van tuah. Atu bantuk in fianternak le lehnak kan tuah mi hi thildik lo a sinak langhter ding le ram le miphun caah MP hmanh aa cuh ding mi minung nih hi bantuk lungthin put he biachim rel a hmang mi hna cu kan miphun le ram caah tih nung mi an si caah fianternak kan van tuah mi a si.

Tikir B UPC Biakinn: Pi Cherry Zahau nih Rampi tangka in Tikir B UPC caah biakinn tha taktak a sak piak hna tiah a tial mi hi lih fangfak taktaka si. Miphun caah raltha tein chimrel ngam cu a tha nain lih in chimrel le midang soisel cu MP cuh ding dirhmun pakhat nunzia he aa tlak lo ngai. Tikir B UPC biakinn hi rampi cozah tangka fang khat hmanh aa tel lo. Amah pumpak a dawtu hawi kom le khuami ramchung ramleeng le kawl mi hna bawmhnak in sak mi a si. Khrihfabu pakhat caah Preisident a si ah Pyitaungsuh Cozah nih hi abntuk thil an tuah phung zong a si lo. ziah rampi tangka in an sak mi a si ahcun Pyidawngsu cozah sin ah complain nan tuah lo. Ramkheel mit in soisel le doh naduh a si ahcun a palhnak kha tha tein kawl law a palhnak tlingte na fian hnu ah soisel ding a si. MP hmanh aa cuh ding mi nih thil sining hngal lobuin nan soisel mi hi hnachuah nun pakhat a si.

Tikir UPC Khrihfabu hi Hringtu a nu nih a rak dirh ve mi a si. cu lio ah pumhnak biakinn cu chim hlah, thutnak toden hmanh an rak ngei lo i thingpum an themh i cu cungte in Pathian an rak thangthat. Hringtu a nu nih zei hmanh a fapa Vice President Van Thio sin in aa ruahchih mi a um lo, Biakinn sakpiak ding tu a si. cu tik ah Vice President Van Thio zong nih a nu bia rovuih cu a philh lo i pathian nih a cawisan hnu ah a nu dirh mi khrihfabu a sak khawh hi a si. amah Vice President Van Thio hrimhrim Pathian a tih mi le a daw mi a si caah Pathian nih thluachuah a pek i dawtu pumpak hawikom hna he I bawm in an tuan chuah mi a si.

Tikir Dam: Tikir dam hna hi Vice President nih a mah nawl ngeihnak in an khua mi ca lawng ah tangka tampi dih in a tuah tiah ati mi zong a palh tuk, ruahnak thian lo hnahchuah lungput a si. Vice President Van Thio ralkap a rak tuan lio ah 1999 kum ah Tikir Dam saknak nawl ngeih khawh nakding ah a rak thutdirnak Pyimyo pawng အင်းမ khua in Hakha a rak phan. Cu lio ah ပဝတ ဥကဌ ဗိုလ်မှုးကြီးသန်းအောင် he tonnak an rak ngeih khawh caah ဗိုလ်မှုးကြီးသန်းအောင် cu Tikir lei ah Dam saknak ding va zoh ah a rak kal. Cu lio ahcun motor lam a rak pem rih lo caah ဗိုလ်မှုးကြီးသန်းအောင် hmanh nih a ke bak in Thantlang in Tikir lei ah nili rau in a rak kal.

A hnu ah ပဝတ ဥကဌ ဗိုလ်မှုးကြီးသန်းအောင် cu ဗိုလ်မှုးကြီးသန်း၀င်းnih ပဝတ ဥကဌ rian a van chawn than I ဗိုလ်မှုးကြီးသန်း၀င်းzong nih Tikir ah voi hnih tiang a vazoh fel. Cu lio ahcun ဗိုလ်မှုးကြီးသန်း၀င်း nih လှေကားထစ် (၃၄ ဧက) tuah piak a rak duh cang hna. ဗိုလ်မှုးကြီးသန်း၀င်း nih Tikir Dam kong cu a chuahpi I န၀တCozah phu nih hi Tikir Dam dil khawh ahcun phuntam pi thathnenmank a cuah pi lai tiah an rak hmuh caah tuah ding in nawl an rak chuah. A voi thumnak ဗိုလ်မှုးကြီးသန်း၀င်း tikir a kar than aa timh lio ah a rian a kai caah ruah lo pin Tikir Dam sak ding rian an rak ngol chung.

2013 February kum ah Vice President Van Thio cu Newzealand ram in Tikr Dam sak ding peh than ding in Naypyidaw ah tuanvo ngeitu hna a va ton hna. 2013 March thla chung ah Myanmar ram President zung in Tikir Dam cu pehzulh in tuah ding ah tangka ting 2000 budget an thlak colh. Asinain tuanvo ngeitu hna nih an pehzulh lo caah an rak tuanchuak kho lo. Asinain amah Vice President nih Cozah tuanvo ngeitu hna sin ah a hal than hna i an pek mi a si. Hi nih alanghter mi cu amah Vice Preisdent Van Thio nih mah nawl ngeihnak in Tikir Dam a tuah mia si lo tihi a si. Tikir Dam sak ding Vice President nih aa hmaithlak mi cu thil phun 5 a chuah pi kho ding a si caah rampi cozah hmanh nih tuah phu a si ko tiah an ti caah an tuah nak a si. Cu thiltha phun hna cu:

(1) Tikir Dam nih Cinthlaknak caah thil tha tampi a chuah pi khawh lai tihi a si. Hi cinthlaknak cu Tikir ca alwng ah thathnem mi hmanh sisehlaw khua pakhat nih a hmun mi pawcawmnak ca an hman khawh ahcun tuah phu a si ko. zeicatiah a hmun mi pawcawmnak hmunhma a ngei mi khau le ram cu Cozah nih an tuah piak peng ko hna, tha an pek mi pawcawmnak a si caah mu. (2) Zuat khalhnak: Tikir Dam nih nga phuntling a tingting in a zuat khawh bantuk in atu zong an zuat ko. atu an zuat mi nga hna khi Tikir ca le Tikir ca lawng a si lo. Cozah ta le mipi ta a si. Atu tikir Dam le nga a zoh khenhtu hna zong Cozah minung an si, anmah Cozah nih Cozah sin ah tangka a luh khawhnak ding ah an zohkhenh ko khi. Tikir ca lawng ah tuah mi le zohkhenh mi a si hrim lo.

(3) Lectric (Mei) Bual peng chung ah Tikir Dam bantuk in dil awk tha le lectric mei caah hamnh khawh ding mi Dam phun a um lo. Tikir dam nih mei a chuahter mi zong khi Tikir ca lawng a si lo, hmailei ah Bualpeng khua kip pe kho ding in timhlamhnak zong a ngei rih. a caan le tangka nih a daih lo caah pawngkam khua nih kan hman khawh rih lo ca tu a si. kan hman khawh cio fawn te ko lai. (4) Dindi harnak khua tipek: Bual peng khua ti harnak khua tipek kho ding in timh lamhnak a ngei. a tlawmbik khua 7 cu hi ti a pek khawh ding a si. meitha athat tik ahcun Bualpeng nih Tikir Dam ti hi duhdim tein kan dn khawh ding mi a si.

(5) Khualtlawng pawl tlonlennak: Ramcung ramleeng hna khuatlawnnak le nuamhnak hmun ah hmunhma tha taktak a si caah le Cozah sin ah tangka lut a thatnak ding hmun a si caah an timh mi a si. A chung ah Japan Cherry kung an cin mi an par tik le hotel hna an sak khawh tik ahcun biatak tein hman khawh a si cang lai. Bank hmanh sak a duh mi an um cang. Tuak ko hmanh usih, Tikir Dam pakhat nih thil lianngan phun 5 a chuahter khawh mi cu Cozah le khua, pawngkam hna caah zei tluk indah a that. Hi bantuk hmunhma tha hi a um nak poh ahcun Cozah nih an tuah ko lai.

Lamkong: 1999 kum September thla ah ဗိုလ်မှုးကြီးသန်းအောင် sin ah Vice president Van Thio nih lam kong ca a rak tial. Cu ca cu Tluangram pa Pu Ngun Hei nih hlanlio catialnak (computer um tuk rih lo caan) Typewrite in a rak tial piak hna. Thantlang Penguk zung sin zong ah lam tuah piak ding ca a rak tial. Hi lam cawhnak ding tangka cu Tlangcung mi han thanchonak zung tangka in cawh piak ding a rak hal cang. Cu lio ahcun Hriangkhan lei si loin Vambai in Salen in Tikir lei ah kalter ding in ca a rak tial ko. cu lio ah Salen hi Motor lam a rak pem cang caah a pem cang nain a bit tuk caah lam kauh piak ding in a rak hal hna. Cu lio ah ting 3340000 a rak hal hna. a hnu ah thil dangdang ruang ah Hriangkhan lei in mer a si. Ca ka tial ning ahcun Vambai in Salen in Tikir lei ca in ka tial mi a si. Amah pumpak bak in Myone Cozah le Pyine Cozah upa hna sin hrimhrim ah amah Vice President nih ca a va pek hna. Hihi Amah Vice President Van Thio nih Hriangkhan lei in a thial mi a si lo. Tuanvo ngeitu hna nih a tha a rem an ti ning in an tuan mi a si.

Tikir Dam cu tuah ding in timhlamh a si bantuk in Lam cawh hmasa lo cun Tikir Dam riantuannak a har caah lam an cawh mi a si. Tikir Dam tuahnak ruang men zong si loin khua kip ah lam cu cawhpiak an si ko caah an cawh mi a si. Tikir lam cawhpiak ding hi Vice president a tlin hlan pi in a rak i zuam cang. Cozah tuanvo ngeitu hna nih an vaivuan lengmang ruang ah lam tha an rak ngeih lo a si. Pu hung Ngai zong nih tuah ding tiah rak caih cang mi zong a tawlrel duh lo. NLD cozah a kai hnu ah Tikir dam nih a chuah piding a that tuk ruang ah lam zong tha te in an cawh mi a si. Hikong cu tial ahcun tampi tial ding a um rih nain hi vial in siseh law Vice President nih hlan lio pi in vission a rak ngeihnak le a tak in a rak cawlcanghnak cahren pawl zong a duh mi nih zohkhawh a si.

Tikir A le Tikir B kar lam: Tikir A le Tikir B kar lam kong zong ah thil sining lo piin ca atial. Hihi anmah Tikir A le B kar ah miforh phun in vote kawl a tuah caah a si. Tikir A le Tikir B kar lam hi an tuah ve ko. Company pakhat nih lung zong a phah nain an lungphah mi a that lo caah a rawk dih mi a si. cun laitlang lam cu furpi ahcun lamcimh a tam caah a rawk ve ko. Thleidan nak he a tuah mi a si lo. Tikir A zong ah a cingla rualchan an um ko. Khi Tikir A le Tikir B kar lam cu Saisihchuak lam lei ah a lan te ding a si, tachunnak ah Bualpeng lei mi caah cun Hriangkhan lei in Saisihchuak kalnak lam a um lo caah Tikir B in Tikir B, Tikir B in Hmunhalh, Hmunhalh in Sialam, Sialam in Saisihchuak a va chuak te ding a si ko caah khi Tikir A le B kar lam cu saisihchuak lam budget chung ah aa tel ding a si caah an tuah rih lo mi a si.

VIP Bangalaw: Tikir Dam ah VIP Bangkalaw inn an sak mi cu anmah Tikir mi thutdirnak le amah Vice President Van Thio ca lawng sak mi a si lo. Ramchung ramleeng VIP hna an rat tik ah an thutdirnak a si. Thutdirnak tha a um lo cun mirum mithawng hna nih an fuh lai lo I cu tik ah cozah sin ah tangka luhnak a tlawm lai caah mirum mithawng hna thutdir duhnak ding cu sak hrimhrim a herh mi a si. pumpak ca a si lo. Investment he aa pehtlai mi kan tuah tik ah invesment tuah tu ding hna thutdirnak kha zoh piak le tuahpiak khawh a hau mi a si. cun khi Bangkalaw inn zong cu naite ti awk an lim i a ra lai mi caan khualtlung an tam tik ahcun an hman te ko lai.

Meithanak motor: Meithanak motor zong cu Cozah motor thiamthiam a si ko. anmah Tikir ca le Van President Van Thio himnak ca men chiah mi a si lo. atu ah tanghra sianginn a um, sizung a um ve caah meithahnak cu chiah phu a si ve ko. Atu bantuk in Chin Party MP aa cuh lio mi hna nih Vice President kong a si loning in ca an tial mi le chimrel mi hi lih lawngte an si. thil sining taktak hngal lo bu in an doh le soisel hi nutling patling rian zong a si lo i Pathian duhmi zong a si lo. atu bantuk in an soisel nak a ruang hi Politic an thiam lo ruang le Vice President kan thlak khawh ahcun aa peknak NLD Party zong kan tei lai timi ruah channak he ning cang loin an soisel nak a si ti hi hmuh khawh a si. Cun Tikir Dam kong zong ah sisehlaw Ramchung ramleeng investment kong an hngalh lo caah a si. Hi bantuk pawl nih miphun le ram kan hruai lai an ti mi hi kan miphun le ram caah tih nung mi MP tu an si kho ti kha hngal ko usih.

Pi Cherry Zahau sin biahalnak: 1. Tikir Dam nih kan ram Cozah pi le chin ram caah zeitluk in dah tangka hram a bunh khawh lai na fiang maw? 2. Investment timi sullam hi na fiang maw? 3. Pumpak in Vice President dohtu hna chimrel mi lawng maw na charhchan? nutling pakhat nih hram ngeite in biachim a herh hi na fiang maw? 4. Policy in politic tuah lo in pumpak soisel in politic tuah hi maw na hriamnam thabik a si?

5. Politic ruang ah mi soisel le mi doh cu a phung a si ko, amah belte thil dik he misoisel le doh hi a herh tihi na hngal bal maw? 6. Thil sining a hngal mi le a fiang mi Tikir kingkap khua, Bualpeng mi hmanh kan lung a fak lo, nang falam um ko mi nih hi kong ah zeitin na lung a van khawh? hnahchuah pei a si ko hi.