Chinchin Pekthang ti ahcun theihternak tuahlen hmanh a herh ti lem lo mi a si. Amah tawk tein ai zuamnak tei a maknak khurkhua a ruah khawhnak a lung tthawnnak ruang ah Laitlang lawng si lo Kawlram pumpi theih in hmun kip ka kip ah a min a lang mi a si. Atu 2020 thimnak ah a khua le a ram mi le CNLD nih an hal ning tein Chin Ramkulh Hluttaw palai caah Thantlang peng thimnak hmun (mee sandah ne) No. 1 in ai zuam ding a si.

Siangcachim innchungkhar nu bik chawtuah rampi remdaihnak tlangtlatu le ramkhel party hruaitu tibantuk in Pi Chinchin Pekthang hi a nunnak ah a pum ai pe mi a si. Khahlan ralkap uk lio ralkap mingiathlai pawl an lal le an hran saling mi nih an ttih tuk hna lio chan ah Laitlang remdaihnak a riantu nu kan ngeihchun pakhat a rak si. Pasal ttha pipi an meithup in an i dup lio ah hriamtlai ralkap mingiathlai pawl dironh in remdaihnak rian a rak ttuantu phunttanh Lainu a si.

Kum 2010 U Thein Sein uknak chan in Lairam uktu cozah le CNF remdaihnak minsen an thut khawh nakding biatak thlak in a rak i zuam ve mi nu a si. A ngeihchiah a caan a thazaang a fimthiamnak vialte a miphun caah a hmang mi ramdaw a si. CNF lei zong ttanh hlei le cozah lei zong ttanh hlei a ngeih lo caah remdaihnak rian ah kap hnih nih an rak zumh an rak rinh i an upat mi nu a si.

Laimi ca lawng ah si lo miphundang ca zong ah ai pumpe i rian a ttuantu a si fawn. Kum 2011 in Kachin ram ah Kawlram cozah ralkap le KIO ral an thawh tthan i an i kah ruang ah ralzaam a sing in an um lio ah innchungkhar nu bik bang in har a tuar mi a va bawmh hna. Ral lak ah kuan le zen lak ah a nunnak caah ruat lo, tarnu tarpa ngakchia mizaw lungrethei mi hna a hnemtu a si. Ref: Chinchin Pekthang