CNLD Policy le NLD Policy Cuai thlaiṭinak By-Salai Ceu Bik Thawng

Chin News

CNLD Policy le NLD Policy Cuai thlaiṭinak By-Salai Ceu Bik Thawng
========================

CNLD i 2020 thimnak policy cathanh (Manifesto) ah Dal 22 a um i dal ṭhen zapi 160 a um. NLD cathanh ah Dal 18 a um i dal ṭhen zapi 150 a um. CNLD cathanh cu party Facebook page ah tlamtling tein kan langhter cang.

01. Federal kongkau hi tutan ah cuaithlaiṭi usih. A sikel bantuk tein NLD cathanh ah federal phunglam aa tel lo. Cucaah, cuaithlaiṭi awk hi zei pipa a um lo ti khawh a si. “Democracy Federal ramkomh kan ser lai” ti lawng aa tel. Zei tin dah kan ser lai ti mi phung le lam aa tel lo.

02. Tlangcungmi kongkau le ramchung remdaihnak kongkau ti mi pakhatte bel a um. Asinain, biatlang 7 ning tein value le peace process kongkau lawng aa tel (a ngaingai ahcun democracy federal kan ser lai ti cu USDP le ralkap hmanh nih an chim mi a si. Cucaah, khuaruah har awk a um lo.

03. CNLD party tu nih cun federal-mahte khuakhan lairelnak he pehtlai in tungtlang 17 kan ngei. Ramkulh i ṭhithruainak Phunghram sernak ding tungtlang 6 he cun 23 kan ngei. NLD party nih phunghrampi remh ding biatlang 114 an chuahpi lio zong ah federal mumal pakhat hmanh a um lo caah USDP le NLD tel in Kawl (Rawn) party hna nih federal kan cohlan an ti mi cu a parpavuan sawhsawh lawng a si. Chak Korea hmanh nih a ram kha Democratic People’s Republic of Korea tiah min a pek ve ko. Min le tlangtar hi a biapi mi a si lo.

Tlangcungmi hna duh mi federal kha an cohlan taktak ko ahcun-
(a) Miphun hrambunh in ser mi ramkulh pawl (Kawl miphun hrambunh in ser mi ramkulh pakhat) ser ding

(b) Ramkulh kip nih mahle ramkulh i ṭhithruainak phunghram ngeih cio ding

(c) A taang mi nawlngeihnak (Residuary Power) kha ramkulh nawlngeihnak ah pek ding

(d) Miphun hrambunh in dirh mi ramkulh cio nih mahte khuakhan lairelnak nawl tlamtling tein ngeih ding (mahte in cozah sernak nawl, upadi sernak nawl, biaceihnak nawl)

(e) Ramkulh zung hman mi caholh, siangsangrun fimcawnnak, cawn ding mi cahmai hna, mah le miphun nuhrin holh cio in fimcawnnak nawl, lo-ram le vawlei hmunhma lei upadi sernak nawl, leitang kokek thilchuak tawlrelnak nawl tibantuk hna kha ramkulh kut ah tuahnak nawl pek ding

(f) Ramkulh cozah tang ah ramkulh runvengtu ralkap le ramkulh himhimnak palek pawl chiahnak nawl pek ding

04. A cunglei langhter mi hna hi Kawl (Rawn) party pawl nih an duh taktak le duh tak lo, an party policy le manifesto cathanh chung ah an telh maw? An cohlang tak tak maw? An cohlan ahcun kanmah nih anmah tu kha thimfung kan pek hna lai.

05. NLD policy cathanh ah mizapi a dawtu palek phu si ding kong lawng aa tel. Ramkulh palek phu sernak nawl aa tel lo. Dawt le dawt lo nak in mah le ramkulh covo hmuh ding hi kannih nihcun kan duh deuh mi a si.

06. Kannih Tlangcungmi hna zong hi mi dang nih Palangthawl an kan hmuhsak cangka in (a chung ah khuaihlitti a um le um lo hngal loin) fawi tein i zumh sual lo ding, a herh tuk cang. Panglong lio ah a leng parpavuan sawhsawh (tlangtar menmen lawng) a si mi biatlang 9 an kan hmuhsak cangka, fawi tuk in kan rak i zumh sual i a hleihluak tuk in kan rak i pekchanh ruang ah kum 70 chung kan tuar cang. Kum pi 70 chung, kan intuar mi hi lungfimnak ah kan i lak kho rih lo i, fimchimtu ah kan hman khawh rih lo mi cu a poi ko.

07. Ka chim zungzal. Kawl (Rawn) mi tam deuh nih democracy party kha thimfung an pek ko lai. Cu zong cu ralkap uknak phung thlennak ca ah a biapi tuk mi a si.

08. Amah belte, kan ram ah, cu lawng cun a za lo. Mah miphun kongkau, federal kongkau le remdaihnak kongkau ṭuanchuah khawh a herh. Tlangcung miphun party nih teinak kan hmuh le kan thazaang ṭhawnter hi, a biapi tuk cang. A caan a cu cang!

Leave a Reply