CNLD Sin In Mizapi Theihternak Le Sawmnak

Chin News

CNLD sin in Mizapi Theihternak le Sawmnak
++++++++++++++++
– Chin National League for Democracy (CNLD) cu Chin miphun kan i funtomnak i ramkhel ah thazaang kan ngeihnak ca ah CPP, CNDP le CLD hrawh in 2018 September 29 ah Party pathum nih minsen thut in dirh mi a si.

– Hnatlaknak minsen thut mi ah CNLD nih Party Register a dih in Chiarman pathum nih aa chang i hruai siseh law, 2020 thimnak a dih ni 90 chung ah Party Conference auh in thimnak tuah siseh tiah minsen rak thut a si.

– Ramkomh thimnak Commission nih 2019 July 11 ah CNLD cu phungning in Ramkhel Party ah a fehter i, CNLD in Pu Zo Zam nih Chairman a ṭuan i CPP in Pu No Than Kap nih Vice Chairman – 1 le CLD in Pu Ngai Sak nih Vice Chairman – 2 a ṭuan. Thla ruk ṭuan ding in Party fonhnak nih bia a chah caah January 2020 in Pu No Than Kap nih Chairman, Pu Ngai Sak nih Vice Chairman – 1 le Pu Zo Zam nih Vice Chairman 2 an ṭuan.

– July 2020 in 2020 thimnak a dih in Party Conference auh a si hlan chung Pu Ngai Sak nih Chairman a ṭuan i Pu Zo Zam nih Vice Chairman – 1, Pu No Than Kap nih Vice Chairman -2 a ṭuan. Salai Ceu Bik Thawng nih General Secretary an ṭuan lio a si.

– Cucaah Lu thum ngei Party, Party hruainak a fekfuan lo tiah an kan ti mi hi kan i fonhnak hnatlaknak an hngalh lo caah le CNLD Party Phunghrampi an rel lo caah a si.

– CNLD cu pumpak cung ah aa hngat mi si lo i Party phunghram zulh in le Chin miphun lungrualnak a hmasa bik ah a chia i a dirpi zungzal mi le hmai a nawr mi kan si.

– Pumpak pakhat nak in Chin miphun pakhatnak ah a chia mi le Chin miphun kan lung aa rualnak ding ah Chin mizapi duhnak in kal ding ah hmai a nawr zungzal ding kan si.

– Chin miphun dihlak nih kan Chin miphun sinak pakhat ah chiah zungzal in Chin Party thazaang a ṭhawn i miphun dang bantuk in hmaihngal tein ramkhel i hruainak ah kan kal khawh nakhnga thazaang pek cio ding ah upatnak he kan in sawm hna.

– Chin miphun le Chin ram Pathian nih thlua kan chuah seh. CNLD a kan dawtu le thape tu nan dihlak cung ah kan lung aa lawm.

(CNLD nih 2020 August 8 ah avoi 1nk chuah mi Miphun Authawng chung in)

Leave a Reply