Hakha Khuathar Mino He Tonnak Le Cinkhua Tlawnnak

Chin News

Hakha Khuathar Mino He Tonnak Le Cinkhua Tlawnnak
===================
CNLD mino nih 2020 August 13 ah Hakha Khuathar mino he tonnak le Cinkhua ah tlawnnak kan ngei kho. Cinkhua ah mino minung 15 nih kan va tlawn khawh hna. Hakha Khuathar, CNLD Hakha mino bu dirhnak zong kan ngei kho. Nihin tiang ah Hakha khuapi Sang 12 ah CNLD mino bu kan dirh kho cang.

CNLD Thantlang mino zong phu thum ah ithen in an pengtlang an tlawn cuahmah lio a si. Chin miphun kan ifuntom i “Miphun Covo Kan Lak Than” khawh nakding thazaang a chuahtu mino, a lamkip in a kan dirpi tu nu le pa nan dihlak cung ah kan ilawm. PATHIAN nih kan ram damter in kan miphun thluachuah ko seh.

Editor Hmurka (Editorial), Pathian nih Chin Miphun cu vawleicung ah Miphun Puitling sinak in a kan ser ve. Miphun puitling pakhat nih a ngeih dingmi, “Miphun, Ram, Nunphung, Caholh” tlamtlingte in a kan pek. Vawleicung ram ah miphun sinak a ngeimi he aa ruang in zei zongvialte tlamtlingte in a kan pek dih.

Asinain miphun puitling kan sinak hrampi a simi “kan miphun, kan caholh, kan nunphung, kan ram le kan vawlei’ hna cu miphun dang nih an kan hrawhpiak/dawpdolh cuahmah. Pathian nih kan miphun sinak in a kan pekmi covo hna cu chuh le hrawnhpiak cuahmah kan si. A lam kip in alanghngan mi pawlisi le aa thupmi pawlisi he kan miphun sinak a tlau nakhnga an i zuam cuahmah.

Cu bantuk in kan ton cuahmah mi chung in chanhchuah ding le kan miphun sinak dirkamh in kan miphun covo lak than ding ah Chin National League for Democracy (CNLD) Party Party kan dirh i tutan thimnak ah luh hi a si.

Kawl miphun nih Kawl Party thimfung an pek cu an miphun an dawt caah a si. Rakhine, Shan, Karen le a dangdang tlangcungmi cio nih an miphun Party thimfung an pekmi cu an miphun an dawt caah a si. Kawl kan huat caah a si lo. Kawl nih an kan huat caah tlangcung mi Party thimfung an kan pek lo a si lo. Miphun a ngeimi nih an miphun dirkamh ding tuanvo kan ngei tiah an theih caah a si.

Kan Chin ram le miphun tungmer ding ah Pathian nih kanmah lila tuanvo a kan pek. Kan Chin Party a thazang a der i chambaunak a ngei zong ah mizapi nih thazaang a cahnak ding ah kan Chin mizapi lila nih kan dirkamh a herh. Kan miphun kong ah thachia lo in le kan miphun i funtim in thazaang a cahnak ding ah CNLD kan dirpi cio naklai upatnak he kan in sawm hna. (2020 August 8 chuahmi avoi 1nk Chin Miphun Authawng chung in)

Leave a Reply