Hakha Peng NLD Party Hi A Chung Lei In An Rak Buai Tuk Ko Hi
================

Hakha peng NLD party chung ah buaibainak tete a um peng ko nain, a lenglei ah thawngpang chuahter an duh lo, tiah thawngpang theih a si. Ralkap chan lio tein Chin state NLD Chairman a rak tuan cang mi le a rak cawlcangh pengmi Pu Zo Bawi zong tukum 2020 thimnak ah aa cuh lai lo, tiah thawngpang te hna va theih chap lengmang cu lung a nuam kho hrimhrim lo. Chin State NLD Chairman le Chin State Hluttaw Speaker Pu Zo Bawi hi Hakha Pyine Hluttaw No.1 in 2015 kum ah teinak a rak hmuh i, cu thiamthiam in tukum zongah Hakha Pyine Hluttaw No.1 meehmun in cuh than ai timh nain, Nay Pyi Taw lei nih Pyituh Hluttaw ah cuh dingin an rak ti caah tukum thimnak ah cuh ti lo a ngol lai, tiah thawngpang theih a si cang.

NLD central lei le Chin ramkulh EC pawl karlak ah theihthiam lonak tlawmpal a um pah rua ti khawh a si. Pu Tial Ling cu Hakha peng Pyituh Hluttaw in cuh dingah Hakha EC nih ticket an pek nain, Pu Zo Bawi hmunhma ah ECE phu nih Pyine Hluttaw no.1 ah cuh dingin hmunhma an rak pek than tikah zeimawzat cu a buaiter ngaingai ti khawh a si. Cucu Pu Zo Bawi nih Hakha peng huap Pyituh Hluttaw ah zuam ding cu ka sungh cang lai, tiah zakhat ah zakhat a fiang tuk cang caah a ngol lawng si loin amah aiawhtu le a hmunhma ah a hawikom tha Sonny Than Cung tu cuhter a timh than tikah a buai chinchin ti khawh a si.

Pu Sonny Than Cung hi Amyotha Hluttaw meehmun ah candidte a rak sokmi a si nain, Pu Zo Bawi meehmun ah hin Pu Moses Thla Cung nih aiawh ding a si, tiah cheukhat mipi pawl aw an a leng pah cuahmah cang. Thawngpang dik a si le si lo cu thawng fiang theih a si lo nain Dr. Aye Aye Ngun hi ECE lei nih Pyine Hluttaw no. 1 ah cuh dingin Chin state NLD upa pawl cu an fial hna nain an cohlang lo tiah thawngpang zong a um rih fawn. Tutan Hakha NLD cu a chung lei in an buai ngaingai ti khawh a si. Atu ahcun Pu Sonny Than Cung nih Pyine Hluttaw No.1 in a cuh lai, tiah thawngpang theih than a si cang.