Hi bantuk minung mee kan pek lo ahcun zei bantuk minung dah mee kan pek ti lai? A caan si cang. Mino nih dinfelnak he miphun caah riantuan caan si cang. Upa nih mino hmunhma a kan pe lo tiah phunzai caan si ti lo. Mah tein paihbual chung ah biartung leh in i paih caan si cang.

Salai Lungthli Tum hi riantuantti kan si. A sining le ziaza zeimawzat ka hngalh. A lungput a tha. Miphun thanchonak caah khua a ruat lengmang mi si. Thimnak ah lut loin business tuah in nuam a tlongleng khomi si. Nain miphun caah a saduhthah nih umthiam loin mei bang a kangh si lai, thimnak lut ding in biachahnak a tuahmi hi upat lo awk a tha lo.

“MP ka tlin cun thlahlawh kaa lak lai lo a ti”. Hi bantuk Chin MP candidate ah tuanbia thar a si. Fimcawnnak level in kan zoh si ahcun tutan MP candidate vialte lak ah a sang bik lei a si. Hi hi al-awk tha lo si. Tukum cu independent lei deuh ka si ko hih: By. Salai Lian Thawng Hnin

Salai Lungthli Tum saduhthah: English thiam ngai ko nain degree ngei lo ruang ah rian ngei lomi mino sin biacah. Kan miphun luatnak ding caah fim cawnnak hi hriamnam tha bikmi a si. Degree menmen si loin zawnruahnak le thiamnak a ngeimi nih sianginn ah cachimh ding cu a si.

Chin mino tampi cu tanghra sung hnu ah Bible sianginn or a dangdang sianginn an kai than i English a thiam tuk thanmi an tampi, cozah university ah degree a ngei lo nain thiamnak taktak a ngeimi an tam tuk. Mah hna hi cozah rian an ngah kho lo tiin ka theih. Master degree zong a ngei ko nain English catlang pakhat zong grammar palh lo tein a tial kho lomi nakin tanghra zong a awng lomi grammar expert kan herh deuh, kan miphun nih a let za in a herh deuh.

Degree a ngei lo nain English a thiam bakmi pawl rian pek khawhnak lam kan kawl a herh. Upadi ser len a hau lai lo, nain a fit mi rian pek ruang ah thongtlak kan tong hraw lai lo, ton zong ah tlak phu a si ko. Chinram ah cachimhtu tling tein an um lonak khuate sianginn a tam tuk. Thantlang peng hmanh ah minung 150 leng rian pek khawh a si lai. Minung 150 hlawh cu minung pakhat thlakhat ting 2 rate in kum khat ah an dihlak ca ting thong thum a dih lai. Nain Thantlang peng nih tukum budget kan ngahmi kha 12 billion a si, ting thong zakhat le ting thongkul a si. Ting 3,000 cu zatuak in 2.5% lawnglawng a si. Hman a phu tuk.

Chinram dihlak ah English thiammi minung 1,000 rian pek sisehlaw kum khat ah 2.4 billion a dih lai. 2.4 billion cu tukum Chinram cozah budget(185 billion) i zatuak 1.2% lawnglawng a si. Kum khat ah kan ngahmi mipi phaisa 185 billion cu cozah nih fimcawnnak caah tamtuk an hmang lo, lam cawhnak deuh ah an dih tawn. Fimcawnnak ah cozah phaisa tampi hman cu kan mino tampi rian pek a si hlei ah kan fale fimnak rawl tuh bantuk a si. A sung a um lo, chan tampi tiang a miak a chuahpi.

Hiti a fitmi mino rian pek ding idea cu Suu Kyi zong nih a duh tuk lai, a thar kan ngeih ding Chinram CM zong nih a uar tuk ve lai ka zumh. MP ka tlin ahcun Chinram cozah nih phung ning tein kan miphun caah mah ka saduhthah hi an tlinter nak hnga ka zuam lai, an tlinter lai ka zumh fawn, an duh lonak ding aruang ka hmu bak lo.