MP Isaac Khen Nih Nangmah Pa Nih Maw CM Lian Luai Hi Phone Chonh Na Timh Ve A Ka Ti

Chin News

By. Salai Pathawng. Chinram Caah Chinmi: Pathian nih kanmah le sining te a kan pekmi Kawlmi a simi le Kayin, Rakhine le Shan tiin miphun sinak a kan pek cio. Cucu Chinmi caah Chinram a kan pek i cucu santlai kan si le silo ah si loin kan sinak ah Chin kan sinak he aa sem chihmi asi. A dang van telh ka duh rih mi cu a luancia MP dirhmun zoh chih in hmailei ah zei bantuk Party an si zongah MP an tling ahcun an ruahnak pical deuh seh ti ka duhpi ngai hna.

Ramkulh Nawlngeihnak Chap Deuh Si Sehlaw Hinakhin kan Thangcho ...

A luancia kum thum ah Hakha ah Media ah ka rak ttuan lioah Chief Minister Salai Lian Luai he i ton dingin appointment ka rak lak i nithim chung a ka cancelled caah phone in ka chawn ta te tiah a phone number a ka pek i ka chawn i Vuanci Isaac Khen kha rak hal te tiah a ka ti caah Vuanci in a chuakmi Isaac Khen sinah ka kal i ka chimh. Nangmah pa nih maw CM cu phone na chawnh ngam tiah a ka sik i um tu thiam loin a ka tuah. Vuanci na chimmi a hman keimah pa te nih phone ka chawnh cu ka palh kho nain ka chawn ta te tiah a phone number a ka pek caah ka chawnhmi a si tiah ka ti i nan ninghngal tuk a ka ti caah kaa sum kho ve ti lo i nan rian ah nan sanbik bangin kan rian ah kan sang bik cio.

Mah taitai in na ka nek zeidah kan si ve cio tiah fak nawn in ka ti ve hnuah a PA pawl nih an ka nawl caah ka dai. Cucu zeidah ka chim duh ti ahcun Vuanci le Vuancichoh si cangka in an lunngput tlang a san ning kha a si. MP pawl hi an min cu a ngan ngai nain mipi sal riantuan bantuk an si. Mipi kar le Cozah karlak ah riantuantu le lamkaltu an si. Nain MP an si i rian sang an tlaih cangka in an bia a sang i khua kip ah cucu kan in tuabpiak hna lai an timi cu chimh hlah an tlawng bal lo i an mui hmanh an hmu bal hna lo. Cucaah hmailei MP a simi hna nih MP ka si hi mipi caah sal riantuantu or lamkaltu ka si ti hi kan i theih i mipi he naihniam tein riantuan a hiapi tuk.

Mipi ruahnak lak thiam a hau i mipi duhnak hmuhpiak thiam a hau. A luancia caan ah MP ton le hmuh an har. Mipi caah riantuantu le lamkaltu nan si kha i theih in mipi nih fial khawh mi nan si kha i hngalh hram uh ti kan duhpi hna. Thil hmete a lo nain a man a fak mo vote te hi si kaw zei huaha a lo lomi kan vote te hi kum 5 a si kha kan hnglah fiang a hau. Vawlei cung ah santlai cia in a ummi le a chuakmi a um hrim lo nain santlai ah ser ding Pathian nih lam a kan serpiak cio.

Chinram nih zeidah a ka pek lai tiin bawhtu si loin ka vote pakhat nih chinram caah zeidah a tuah khawh ti tu hi kan ruah awk a si. Fimthiamnak in kan nauta ti lo. Chin mifim motjiam tampi kan i ngeih cang hna nain Kawlpa kut lawng bawh ti loin Chinram a ngeitu Chinmi nih kanmah kutke tein kan tuan i kan tawlrel a hau cang. Chinram a ngeitu cu Chinmi kan si caah a ngeitu cu a zohkhenhtu sawh sawh nakin siaherhnak kan ngei deuh hrim lai. Chin Party hi santlainak a ngeih caah vote si loin santlai si ding tu in vote law Chinmi lungrual in kan ttang tti ko ahcun Chinmi mi nauta kan si lonak a lang ko lai. Cucaah Chin Party cu Kawlpa nih a vote bal lai lo caah Chin Party cu Chinmi nih vote uh sihlaw a chambaunak ah bawmtu si hram ko uh sih

Leave a Reply