Salai Lungthli Tum saduhthah le chunmang: ‘MP na tlin ahcun vote na ngah lonak khua caah riantuan na tim maw?’ timi biahalnak a um theu. MP cheukhat zong nih ‘aka dawmi khua cu ka dawt deuh ve ko hna lai’ tiah an chimmi ka theih pah lengmang.

Nain, kei cu vote ka ngah lonak khuate hi ka lungthin ah an cam deuh zungzal lai. Kaa tinhmi taktak an i fian rih lo caah an ka tanpi rih lo a si, cucu keimah tlamtlin lo phunkhat a si tiin ka cohlang. An i fian than khawhnak ding caah ka tuahsernak in langhter ka zuam lai. Cozah sin bawmh ka hal piak tik hna zong ah khua khat le khua khat thleidannak ka ngei bak lai lo. A fiang bikmi cu ka chuahkehnak khua cu zeitik hmanh ah u-saa pek kaa tim lo.

Relchih>>>>Kan nunphung a si vemi ‘paih’ ka hlorh lai: Ram a ngeimi miphun tling pakhat kan si caah lentecelh lei zong kan thancho ngai a hau. Abik in kan miphun nih phundang deuh in kan ngeihmi ‘paih’ hi Chin state level ah kan hlorh a herh.

A si khawh ahcun ‘paih’ hi Chin traditional sport caah cozah nih a cohlan nak hnga cawlcangh a herh, a cohlan awk zong a si. Paih hi hawikom i sernak a si i Chinmi a kan funtom kho bikmi hriamnam a si te lai ka zumh. Keimah pumpak phaisa ting za thum leng dih in Hakha ah paih cawnnak le paih zuamnak zong ka tuahpi tawn hna. Khuate zong ah ka tuahpi hna. Nain, cozah lei tanpinak thazaang a der ngai tawn. Kan thazaang a bat caan a tampi. MP ka tlin ahcun Myone kip pathawng vialte sawm in kum khat voikhat tal cozah nih ropui ngai in paih zuamnak tuah ding Chin cozah ka forh hna lai. An lungtling lai ka zumh. Cattialtu: Salai Lungthli Tum