Tuzing kan DEBATE kongkau ah.

NLD Chinram chairman Pu Zo Bawi nih ruahlopi in (the last minute ah) tuzing kan debate a kan leet tak. Moderator pa chimnak ah “Halkha ah Vice President a phan i lamphunhpuai ah zulh ding a si caah” tiah a ti. Asinain tuzan tiang ka theihnak ah VP hi Halkha zong a phan rih rua lo (Tinam hrawng a phanh lio si rua).

Tuchun cu Zarhpini zong si fawn. Nizarhni rumro ahcun lam-awnnak zong cu an tuah hnga maw, kan thei ruam lo. VP va don aherh ti zong cu siseh law… tuzan tiang i a phan rih lomi…tuzing suimilam 8 in don cu NPT tiang va don cu a si ttung hnga lo ka ti.. Ahlankan in thawngthanh ciami a si tikah vawleicung Laimi tampi nih an kan cuanh i an kan hngahmi a si.

Cucaah kei zong ka rian dang vialte kaltak in kai timh vemi a si. Thimnak zong a nai tuk cang. Zeitinhme an hei ruah ve ning si hnga ka ti. Tutan lawng si lo. Kan hnu deuh zongah Dr Sasa nih alai nikhua taktak ah a kan leettak hoi. Hakha Times nih debate sawmnak zongah NLD candidate pawl an chuak huaha lo.

Ramkhel Biaraldohnak (debate) timi hi kannih kan fianning ahcun mipi nih thil dik le a tha deuhmi thei hna seh, aho party kan si cio ah, tiah tuahmi a si. “I tthua hna seh” tiah zoh nuam menmen le umharphen a si lo. Democracy i a thlum-alnak taktak a si. Cucaah democracy ram vialte nih an tuahmi a si.

Alangpar le puanphen in a simi zazat si lomi zazat in kong iceih, kan ipuh le ihauh menmen in a dih awk si lo i hmaitonh tein kan ihal tonh, kan chim tonh, kan kherhhlai tonh tikah mipi nih a dikmi le a tha deuhmi an theih khawh lai tinak khi a si.  Cucaah mipi upatnak le democracy tlaihchannak he debate le dialogue tampi in tuahti dingin updatnak he NLD kan in sawm hna. Media pawl zong nih hun kan tawlrelpiak uh tiah kan in sawm hna. Credit: Salai Ceu Bik Thawng

Relchap; Thimfung petu ding mipi zei rel lotu Chin NLD (Langak) party. Religious and Political Voice ti in US lei vei nih Pu Zo Bawi (NLD), Dr. Hmuh Thang (USDP) le Salai Ceu Bik Thawng (CNLD) cu bia raldohnak kan tuahter hna lai tiah an rak thanhnak kha nan rak hmuh dih cio cang lai.

Mah kha ram kip khuasa Hakha-Thantlang Laimi lawng si lo, ramchung lei mipi zong nih an bia le hla, an aw-an theih le hngalh an rak duh bak ciomi a si. Kan thisa Falam lei mi zong nih ngaih le theih an rak duh bakmi si ve. A ni caan phanh tikah, Pu Zo Bawi nih, “Kawlram VP-2 Henry VT Hakha a phan i kaa manh lo. Va don a hau,” a ti hna. Dr. Hmuh Thang le Salai Ceu Bik Thawng lawng bia an iruah.

Chin World media nih NLD minister (mei lei sipin lei vuanci pa kha) U Soe Htet cu party dang hna he biaruah dingin an sawm ve i a rak cohlan ve cang hna. A caan phanh taktak tikah, “kai manh lo, lampi ka um lio si,” a ti hna i mipi ngaih dingmi biaruahnak cu a cancel huar ko. Democratic country timi mipi zauk phung in ihruainak ram ahcun mah hihi mipi zei rel lo tuk, thimfung a petu hna mipi cu hnulei chit bantuk a si.

Bawi pakhat, zei siangpahrang an va si hmanh ah, cu bawi, cu siangpahrang cu, mipi thimmi an si tikah, bawi maw biapi deuh mipi dah timi a um. Cucaah mipi he bia ikam cangmi, leet riangmang in mipi thim thothomi bawi pakhat va don dingah an caan an ipek phung kha democratic ram nihcun an huat bikmi a si. Hika zawn ahhin, an lih in an chim.

Kawlram Second VP Henry Van Ṭhio cu Hakha zong a phan rih lo. Lampi ah a um lio si. Hakha hmanh a phan rih lomi kha “kan don lai i kan conglawmh lai,” ti in Chinram cozah hruaitu upa hna nih an mipi he bia iruahnak cu hnulei an chit. Tu lio i a sopaw ngaimi NLD nih tanbo ah an hmanmi a miphun santlailo hna dirhmun faak tukin miphun dang sinah a vaa ichim ruang i bawmhnak zeimawzat (zeikurang khat zong khi si lo) a hmutu pa cu democratic cozah pakhat hngalhpimi Chin media pakhat nih biahal dingin bia an tuuk cang i “OK” a ti hna hnu ah, tu hi ai phetcheem hnik. Biatak aa hmai tonh ngam ve lo.

Langak nih biatak cu an rak ṭih ngai i, mipi tu a hlen in a molh in molhter hnu ah, anmah nih Lairam ṭhanchonak ca i project (tender) vialte itlaih, eihmuar le rum an rak itim ziar ti khi a lang. Siifak santlailo caah zawnruahnak le mithmai pakhat hmanh um lo, ti khi si ko. Credit: Salai C Alexander