ASEAN hruitu:Meeting nih kawlram caah’Tha hnem nak zeihman a chuah pilo.

Hmuhning

April 24, Indonesia ram Jakarta khuapi ah tuahmi ASEAN hruaitu hna meeting nih Myanmar buainak kong i biachahnak an ngeihmi 5 hna cungah Myanmar ramhcung lamzawhtu cheukhat hna hmuhning kan vun langhter lai.

Yangon Engineers Strike chungtel siangngakchia pakhat: Ralhrang ralkap rual nih cun a zungzal in an chimningin an tuah bal lo. Ramdang nih zeitlukin an ti zongah tuah a duhmi cu a tuah peng ko. Tutan i a lungtlinmi biachahnak 5 zong cozah thanhca ah a thanh bak lo cu mu! Hi nih hin a zul bal lai lo ti a langhter ko!

Dawei Strike Committee chungtel pakhat: Dawei Strike Committee hmuhning cu ASEAN nih Myanmar mipi duhnak a doh. Mipi thimmi cozah NUG kha meeting ah an sawm lomi cu Myanmar mipi duhnak zei an rel lo a si. Cun SAC kha phungning cozah ah an cohlan bantuk a si tiah kan ruah. Chim duhmi cu ASEAN biachahnak 5 chungah tlaihmi vialte chuah ding le democracy hmuh than ding timi aa tel lomi hrimhrim kha ASEAN nih Myanmar mipi duhnak zei an rel lo zia a lang. Cucaah ASEAN biachahmi le a dang cawlcanghnak zong kan cohlang kho lo!

Kalaymyo Strike hruaitu pakhat: Nitlak lei ram EU siseh, US nih siseh an halmi mipi thimmi cozah sinah nawlngeihnak pek than ding timi zong aa tel lo. Biachahnak an tuahmi cu a lengpavuan lawng a si caah mipi caah zeihmanh a biapi lo. ASEAN zulhphung pakhat a simi ram pakhat i a ramchung kongah i thlak lo ding timi kha an i tlaih peng i a phung men in meeting an tuahmi le biachahnak an tuahmi a si tiah ka hmuh. Aho an kai poah ah timi ruahnak an ngei. Cun ASEAN ahhin democracy ram taktak an tlawm caah an biachahmi cungah mipi nih zeihuaha an rel lem lo. Mipi nih cun an tlaihmi hruaitu hna chuah than hrimhrim kha kan duhmi a si!

Relchap

Min Aung Hlaing nih Indonesia in a kir lecangka in a chimmi cu “Kan ram a daih hnu lawngah ASEAN thlahmi palai kan cohlan lai” ti a si. Ram cu zeitikah a daih lai? Meeting lioah an chimmi poah “kan tuah ko lai” tiah a leh hna. Myanmar a kir lecangka in a biachim aa dang hoi.

Cu pinah meeting lioah zapi tein hnatlaknak ngeihmi “An tlaihmi ramkhel thongtla hna chuah hrimhrim ding” timi cu mipi theih in biachahnak an thanh taktak tikah a um ti lo. A karlak ah an rak hlonh, an remh. Zeiruangah dah meeting lio hnatlaknak cu a lengah an remh/an hlonh?

China ramleng vuanci Wang Yi nih Myanmar buainak kong i ASEAN cawlcanghnak ah ramdang i thlak tuk hlah u tiah a rak chim bal.Cucaah ASEAN nih cun Myanmar mipi hna duhning in rian a tuan bal lai lo. China duhning le ruahnak pekning in rian an tuan lai. Cuticun ASEAN kan i bochan ahcun ralhrang khongton uknak a chan a sau lai.I lungrual usih, i funtom usih, ramleng i bochan loin kanmah thazaang tein kan duhmi lak khawh i zuam usih.

Leave a Reply