Khrihfa mit in nauphiat/nauthat (abortion) tu/mi hi dantatnak an ing lai maw?

Hmuhning

Khrihfa mit in nauphiat/nauthat (abortion) tu/mi hi dantatnak an ing lai maw?

Mother Teresa nih Hillary Clinton sin ah arak chim bal an ti mi cu: “Nu nih a pumchung naute a thahnak in dawtnak acawng bal lo, nain aharnak i phisin/ hmaimilh duhah a pumchung naute cu athah. Nau thah hi hngakchia caah ral lianngantuk mi asi; chiatha hmanh athleidang kho lomi hngakchia hna amah a hringtu nu bak nih a thah mi hi cu ka huat i ka doh. Cubantuk in hringtu Nu nih a fa te thah kha kan cohlan ahcun zeitindah midang kha pakhat le pakhat i thah lo dingin kan chimh khawh hna lai “tiah arak ti ti si.

Vawlei cungah hin minung pakhat bak nih minung athat tambikmi hi mizeidah an si hnga tiah biahalnak um sehlaw, nupawl nau aphiat/thah piaktu siithiam pawl hi an si lai tiah ka ruah. Cun a pahnihnak ahcun, nauphiat hmangmi nu pawl hi an si lai tiah ka ruah. Aruang cu, kaa dang ram tampi cu um rihseh, kan mah Hakha le Thantlang hrawng hmanh ah hin nauthatmi mi nu hi an tlawm tilo. Nu tampi cu an chung ummi naute cu siithiammi kha phaisa zeimaw zat pek in an fial hna tik ah cu hna nih cun minung zeizat remruam dah an hei thah piak cang hna hnga ti hi ruah ngam hmanh asi tilo.

Kan chan ah mithah le lainawng thawng a thangchin cang. Zumtu zong nih Nu le Va pumkhat si hlan ah Sex tuah kha sualtuah ah kan ruat ti lo. Kan pum kha kan mah ta ah kan ruah, Pathian ta, hlanhchung mi kan si kha kan hngallo. Cutikah ruah loin nau kan pawi, kan dirhmun nih a pek lo caah, naute cu kan thah. Cu naute thah cu Nu le Pa le chungkhat le hawikom tiangin kan i bawm, ruahnak kan i cheu, biathli kan i chim, adonghnak ahcun, zeihmanh a thei rihlo nupaw chung ummi naute cu kan thah.

Cucu midang nih an kan hmu lo, ho nih an kan thei lo tiin kan i ruah, nain athli tein kan tuah mi a hmutu le a theitu, kan sual records vialte akeng i zeizong vialte athei dihtu le ni hmadung bik caan ah sual bia akan ceih tu ding Pathian aum ti kha kan thei lo. Zeibantuk ava sihmah ah, nule pawchung ah naute aum hnuhnu ahcun, Inn lakah (lakfa) hrinmi fa/pawitermi fa zong Pathian muikeng an si ti kha kan theih fian aherh ngaingai.

Cucaahcun, nihin kan ram ah hin, zumtu kan i ti ve ahcun, nauphiat/thahnak hi atlau khawhnak hnga caah faak piin kan aupi i, kan ruah caan acu cang. Vawlei phung ah mithah cu sual asi i thih dantatnak or thongthlak dantatnak pek an si. Bible cawnpiaknak ahcun, kan pum cu Pathian muisam keng in sermi asi caah, cu pum asimi va thah le va nawn cu kan Pathian zong nih aduhlo bikmi asi caah cubantuk a tuahtu hna cu ni hmadung bik caan ah sual biaceihnak ah chuahpi i biaceih an si hrimhrim te lai. Ref. The Christian Post

Bible Ref. MATTHAI 5:21, ‘Lai va nawng hlah u, lai a nawngmi paoh cu biaceihtu hmaiah chuahpi a si lai, tiah hlanlio mi an rak ti tawn hna, ti kha nan theih. Genesis 1:27, Cuticun Pathian nih minung cu amah mui lo in a ser, minung cu Pathian mui in a ser hna. Bible nih “lainawng hlah” ( Exo 23:7; 20: 13). “Cun, mi a thatmi cu thah a si lai”
(Lev. 24:17) akan ti. Credit: Salai Papum

Leave a Reply