Midang kong Na Hngalh Hlan ; An Kong Ah Lungbiakhiahnak Tuah Colh Hlah!

Hmuhning

Midang kong Na Hngalh Hlan ; An Kong Ah Lungbiakhiahnak Tuah Colh Hlah! Hngakchia pa pakhat cu a pa he tlang lawng i cit in inn lei a tin cuahmah. Hngakchiapa te cu tlanglawng thlalang awng in a leng lei a zoh khua a cuan. Khuaruah har ngai in a pa a ti mi cu, “Ka pa, thingkung hna hnu lei ah a tli thluahmah ko” tiah a ti.  An pawng a thu mi hna nih hngakchia pa te cu khuaruah har ngai in an zoh. Kum 15 a si cang mi nih hi bantuk biachim cu thinlunglei dam lonak a ngei mi a si ko lai an ti.

Tlawmpal ah hngakchia pa te nih, “Ka pa, minmei zaam mi hna sinah kan kal ve” tiah a ti than. An pawng ah a thu mi nuva hna nih hringtu a pa cu, ” Hi tluk thinlung dam lonak a ngei mi na fapa hi ziah siizung ah na piah lo” tiah an ti.

Hringtu a pa nih mitthli he nih bu tein a leh mi hna cu, ” Siizung kal kan kan hau ti lo. Atu hi siizung in ka tin. Ka fapa te hi a hngakchia tein mitcaw mi a si. Asinain atu ahcun a mit a dam cang. Nihin hi a voikhatnak ser mi thil tha tein a cuanh khawh ni a si ee” tiah a leh hna.

Voi tampi cu midang an sining hna thei loin a leng ka mit nih a hmuh ningin midang cungah biakhiahnak kan tuah tawn hna. Misual ee tiin kan huat mi le kan nehsawh kan zomhtaih mi hna an um. Sihmanhsehlaw khi bantuk minung hna nih an nunnak ah zeibantuk thil sining dah an rak ton timi ka hngal tung lo.

Kan khua ah mikip nih an rak huat mi tlangval no pakhat a um. Mithil a fir. An tlaih tikah an tuk an velh. Misual khuachia fa ti tiangin an ti tawn. Asinain cu tlangval no te a nung ning zoh tikah ngaihchia ngaingai a si. A hngakchiat tein hringtu nulepa nih an thih taak. Ka nu, ka pa ti auh awk hmanh a ngei hna lo. Vawlei cung nun tikah zeitindah ka nun awk a si timi cawnpiaktu zong a ngei lo. A nunnak caah a ca ah a biapi bik mi cu rawl ei awk a hmuh ding kha a si. A pi he an um khua an sak tikah a pi nih a zohkhenh kho lo. Hawidang sianginn an kai i, fimnak ca an cawn lio ah tolhtang le zal bei in ram lakah a vak. Christmas kum thar an phak tikah hawidang nulepa nih an fale ei awk phunphun an cawkpiak hna lio ah hawihngar in a mit ro cikcek in hawi a zoh tawn hna. Ahohmanh nih a hlawm lo i, an zoh kilkawi tung lo. Cu bantuk minung khua chungah thil tha lo a tuah tikah cumh le den a tong leng ko. Sihmanhsehlaw a in ding lengin tuah khawh mi zeihmanh a ngei lo.

Nihin zong kan pawngkam minung hawi sining le dirhmun kan zoh tikah fawi tein an nunnak kong ah chimrel chia te hna hi kan i ralrin ding a herhnak kong hi tuanbia te nih hin a kan cawnpiak. Midang kong kan chimrel chiat hlan ah siseh, kan chim that hlan ah siseh, zeibantuk in nunnak ah a rak nung mi an si ti theih hmasat tu hi kan i zuam ding a si.

Voi tampi cu midang hlawhtlinnak le teinak kong kan hmuh tikah – an kong kan chimrel tha hna. Midang hlawhtling lomi kan hmuh tikah kan chimrel chia hna. Sihmanhsehlaw hlawhtlinnak a hmu mi pa nih atu bantuk hlawhtlinnak a hmuhnak dingah zeitluk indah anmah le amah a nun aa temtawn. Zeitlukin hawi celh lo tiangin zuamnak le cawnnak a ngeih peng timi ka ruat zuam lo. Hlawhtling mi hna nih zei dah an tuah timi lawng kan ruat i, zeidah an rak hrial timi cu kan ruat zuam ti tawn lo.

Minung hna nih kan sining kan i theihthiam hnu ah kan i pehtlaih, kan i biakchawnh tikah pehtlaihnak a tlum-al, a sunglawi tuk tawn. Sihmanhsehlaw nihin i kan buainak ngan bik hna cu mi kong thei loin, a lenglei sining zoh in kan i pehtlaih , kan i hawikomhnak in a chuak mi an si tawn.

Midang he hawikomhnak kan ngeih tikah a lenglei na hmuhnak hna pinlei te ah thil dik pakhat khat a rak i thup tawn. Cucu thei hmasat loin an kong biachahpiaknak ngei hna hlah usih. Credit: Rinpipost

Leave a Reply