Pu NTK le Salai LTT Vote pek cu Meilah le Meifar Pek hna In Khah Lairam cu Khang Cang Ko ne ti he aa lo!

Power le laar( min tthatnak hmuh)a duh tuk mi nih nawl ngeihnak an ngeih sual ahcun ttih a nung kho tuk. Mah Ruang ah POWER a duh tuk mi NTK le Laar( minthan) a duh tuk mi LTT kan vote hna i hruaitu ding ah kan thim hna ahcun meilah le meifar pek hna in khah duah cang ko ti he ai lo ka tinak a si. A ruang tampi chim le langhter hau ah ka ruat lo. N. Korea an mi lal pa a nun zoh in a fiang ngai ngai ko. A inn pa a si mi S. Korea le Japan te pawl an thim a domh in an i domh. Vawlei pi zong nih thin domh tein an zoh ve.

Vawlei pi ral( World War II) 6 August 1945 ah Japan nih faktuk in thih loh le sunghzatlaknak a rak ton hnu in, zeitik hmanhah ral dohnak lei he a pehtlai in( neuclear weapons le a dang dang hna zong)kan tuah lai lo tiah biakamnak an ngei beh. Nihinni tiang te hi American Ralkap nih ramri an hngah piak peng ko hna( an mah tein ralkap thazaang an tthawn ter ti lo). Asinain a tu hrawng cu baitak ngai in raltuknak hriamnam le ralkap thazang kan tthawn ter a hau tiah a au pi mi an karh ngai. A tu lio an hruaitu Abe Shinzo zong nih ngeih le tuah ah a ttha ko tiah a hna a tla ve. Asinain ram mi tam deuh nih an duh lo peng caah rian hma tu cu an awt kho ngai ngai rih lo.

Hriamnam kan tthawn ter than a hau ko tiah a cawlcang ngai mi Sato Shiro le bang nih cun thlang Korea mi lal pa cu, a thluak a tlamtling lo mi( စိတ္တဇ) namte put ter he ai lo a ti phah. Chak Korea le Japan cu hngakchia dehcawh bang in a tuah hna. Tor ungmang in a khuang a cumh hnawh hna i lau lengmang le ther lengmang in a tuah tawn hna. A cung i ka langh ter mi kan candidates 2 hna he khin ka lawh ter ngai hna. Pakhat power a duh bak mi le a dang pakhat ve bak le laar( mintthatnak hmuh) a duh bak ve mi.

Ka lung hrinh mi hna, NTK power a duh le duh lo cu a tu Lai Party nan ti tawn mi CNLD an diar hmun zoh ah hmuh khawh ngai in ka ruah. CNF/A a rak um lio a tuanbia tthing zong in tampi theih khawh a si. An mah(CNLD)nih cun hrinhfiahnak an tuah ko nain kha kha cu si dawh in ka zum lo. Behind The Curtain ah zei thil dik a um ko ti cu ruahdamh khawh a si. LTT mino te a si rih nain cawlcanghnak tampi a ngei kho. A tthat zong kan i tthat pi ngai ngai. A mah kumkhua zat a si mi Laimi mino chung zong in siseh, bochan mi upa pawl hna chung zong in si hna seh a tuah zat a tuah kho mi le a tuah mi zong an um rih lo tiah ka ruah. Asinain nihin a baichim a holh rel le a um tu zoh tik ah dawtnak le zawnruahnak tak tak in a rak tuah mi a si rua lo ti hi lunghrinh lo awk a ttha lo.

An mah 2 theng te char in kan vun ttial tik ah nangmah tah zeidah na si ve tiah nan ka ruah khawh men. Keimah cu zeihmanh ka si lo. Zeihmanh ka si lo ruang zong ah ka kong zeihmanh ceih awk le chim awk a um ve lo. Kan Lai mi chung ah a laar bak ve ve mi an si caah an kong a ceih le a chim tu zong kan tam khunnak a si. Mah le ruahning, hmuhning kha zalong tein chim a ngah ve ko caah zalong ngai in ka vun chim phot ve ko. Ka chim cia mi bia tu ahcun ka diar ngam bak ve ko.

Theihternak; Keimah hmuhning le ruahning a si caah ka palh kho. Na hmuh ve ning tu zalong tein na rak chim khawh ve. Holh ttha lo hman tu cu a sikhawh chung in rak i sum ve te. Credit: Roland Thang