CNLD kong fianternak(Dal-1nak)
===============

Miphun party kong zarhkhat voi 2/3 in ka hun post cang lai. Cucaah ka FB friend pawl a siarem lomi nih hrial chung khawh ka si lai. Miphun caah share zong bawmh khawh ka si pumpak ruahnak tete zong comment in hun ceih le hal chap cio khawh a si lai.

CNLD, NLD le USDP Party Kan Idannak (Zohkheknak), Ramkhel lei fimthiammi nih ramkhel party hi phun thum in an tthen. Phunkhatnak cu ‘charismatic parties’ ti a si i cucu minung pumpak/hruaitu pakhat minthannak cungah aa hngatmi/dirhmi party tinak a si. Tahthimhnak ah NLD. Minung pakhat cungah aa hngat caah cu pa/nu a um ti lo tikah an kuai/thi tawn. (Tck. AFPFL party cu Aung San in hrambunhmi a si caah amah um ti lo hnu ah an phu 2 ah an kuai colh).

Adang phunkhat cu ‘clientelistic parties’ ti a si i cucu atu UDP le USDP party bantuk hi an si– afawinak cun ‘hlawhfa’ party. Hmuhtheihnak ruahchan in dirh/fuhmi an si caah (money/power) a um ti lo cun an thi/tiau ve. (Tck. NUP party-1990 cu a phaisa le power tihna a reu caah capawl duah bang a ciam. Cuvebantuk in USDP zong nitlak lei a panh cuahmah). A pathumnak party phun cu ‘programmatic parties’ ti a si i anih cu ‘minung/hruaitu’ le ‘phaisa/nawlngeihnak’ ah si loin pawlasi le ideology ah hram bunhmi party a si, cucu CNLD miphun party bantuk.

Miphun party cu minung/hruaitu hrambunh in dirhmi party a si lo caah tulio hruaitu vialte kan um ti lo zongah hi party hi zeihmanh a poinak a um lai lo i athat hmanh a tha/tthawng deuh lehlam lai. Miphun a hmunh chung a hmun dingmi a si. Cun, phaisa le nawlngeihnak duh ruangah dirhmi le fuhmi party a si lo caah a ‘reu’ kho ding a si lo.

NLD le USDP party chungtel pawl le hruaitu tampi (abik in Chin NLD/USDP) cu Vuanci Pu Sui Thio le Pu Zo Bawi bia hun ihlan ahcun ‘arsa eiti khat ka si theo lai, budget tam kan ngah lai, lahkhah ka ei lai, bawmhnak ka hmu lai, nawlngeihnak ka ngei deuh lai” timi ruahchannak in fuhpanh deuh a si. Kannih miphun party i a lutmi nihcun ‘zeidah ka hmuh lai’ ti si loin ‘zeizat dah ka thawh lai, zeitlukin dah kaa pumpek khawh lai’ timi kha ruah a si. A linglet kan si.

Bia hun fun ahcun— USDP cu thanchonak (development) party a si. NLD cu democracy party a si. CNLD cu miphun covo federal miphun mahte-khuakhannak party a si. Thanchonak cu aho party cozah poh nih tuah khawhmi a si. Democracy zong ahram thlak a si cang. Ralkap nih zeiti konglam hmanh in nawlngeihnak (a-na-ting) an la than lai lo. Cucaah atu kan lohma a ngan bikmi cu miphun federal khuakhannak, miphun damnak caah zeitindah kan ithanghphawk lai ti kha a si cang. (NLD le USDP he kan policy zeidah aa dang timi kha point-10 in kan peh/fianter tthan te lai).