Siang Bawi Nawi Tidil Ka Duhlonak Kong Tampi Ka Chim. Mi Thilfir Tu Ka Doh. Hramhram In Ka Ni Le An Lei Chuhmi Ka Doh
===========================

Nawi Tidil ka duhlonak kong tampi ka chim. Micheu nih politics ruang ah tiah nan ruah men lai. A si lo. CNLD a tanh tiah zong nan ruah khawh men. A si hlei lo. Mi thilfir tu ka doh. Hramhram in ka ni le an lei chuhmi ka doh.

Kawlram le Lairam hi US ka phanhka hrawng ahcun ka lungchung ah a rak um. Cu ruangah, sianginn ka dih hnu ah Laitlang ah ka tlung i CCU zong ah ramdang in volunteer in ca a chimmi hmasabik pakhat ka rak si–thla 6 chung ka rak um. Lai lei si ning tampi ka theih. Cu nihcun ka lung a ka rawhter. Dinfelnak a tlawm. Thil thalo tampi ka hmuh. America zong ka rak ngai.

Kawlram politics kong zong tam ka chim bal lo. Voi khat hnih te ka tial ah, ram pumpi aa thlen a hau. Cozah thlen lawng a za lo. 2008 Constitution remh a hau tiah ka rak au. Cu a remh khotu cu NLD lawng an si ka rak ti. Cucu, atu tiang ka dirhmun a si. Asinain, party tanh ruang ah thatlonak an tuahmi cu ka tanh kho lo. Midang lei fir an timhcu ka tanh kho lo.

Cun, micheu nih thanchonak nan doh nan ka ti. Mah hlan ah, “thanchonnak” tiah ruahmi project tuahmi ka dohmi um bal lo. Infrastructure project poah hi thanchonnak an si lo ti zong kan theih a herh. Kan ram ah lam tha kan herh. Dam zong cu kan herh. Kan tuahmi poah tha tein ruah hnu le study tuah hnu ah sak ding. Nawi ah ti kan dil lai ti i thla hnih chung survey tuahmi roih i dam dik hnih cu molh khi a si.

Nawi Tidil atu ning in tuah hnikmi hi thil tha lo a si, mi thilfir a si tiah theihnak ah catang sangpi kai zong a hau lo. Tha tein ruah ahcun, thil thalo a si tiah kan theih awk a si. Pathian nih pekmi kan thluak kan hman poah ahcun, aho hmanh nih atu an timh ning cun kan duh ding a si lo.

Note: Public in ka tuah. Zapi nih rel kho hna seh tiah ka duh caah a si. Credit: Siang Bawi