Vaurawng Nih Nan Til I Cumh Dih U Ti Hna Sehlaw A Til A Cumh Ding Lawng Te Nan Si

Hmuhning

Catial tu Salai Lung Thli Tum Hakha ah CNDF nih meithal rak puah ve hna sehlaw nan duh ve tung lai lo timi kong ah Tuzaan bak khi CNDF nih Hakha khuachung ummi ralkap le palek rak kah hna seh, cozah zung zong khangh dih hna sehlaw mipi inn zong tlawmpal a kangh chih i mi sawhsawh pakhat hnih an thih zong ah Hakha le Thantlang lei minung 80% nih cun ‘CNDF hi pasaltha an si’ tiin an thangthat colh ko hna lai. Kawl pate Bo Nagar zong nih Hakha ah ralkap rak kap hna sehlaw ‘Bo Nagar hi Chin hero a si’ an ti lai i an sining dihlak in an tanpi lai, Vaunrawng in tlang an au lai i phaisa tor le cheng an thawh ko lai.

MAH ralkap kan huat tuk hna caah khuachung kah hi kan hrang ah thahnemnak a chuahpi lai maw timi tuaktan kan tim ti lo. MAH dohnak a si poah ahcun zei poah tuah kan ngamh, inn lo sungh zong kan tih ti lo. Timit hlei zong kan hrawh i kan i lawm lehlam ko.

Hnaring pawng Bawinu hlei le Var hlei zong khi hrawh kho hna sehlaw tam deuh an i lawm hoi ko lai. MAH dohnak caah nan til i cumh tuah u tiah Vaurawng nih vun aupi hna sehlaw til ai cumhmi rel cawk an si lai lo. Kan tuahmi hi zeidah a phichuak, zeidah a thahnem, zeidah kan sung timi kan tuaktan kho ti lo. Ralkap huatnak emotion ruang ah Laimi 80% cu chiatha thleidan khawhnak ‘critical thinking’ kan ngei kho ti lo.

CNDF cu miphun caah a thahnem lai maw timi tuak chih lengmang buin le thluak hman buin dohthlennak nan tuah. Kei cu mah nan kal ning hi ka uar tuk. Nain, Hakha lei nih cun mah kha ‘zer’ ah an ruah. Hruhhruh hranghrang in ral doh kha ‘ralthat’ ah an ruah i an uar, thluak nak in emotion kha hmunhma an pek deuh zungzal.

Hakha a daih zong an duh lo, Matupi a daih zong an duh lo. Ralkap pawl lung sivang in umter zungzal i ‘tha tein uknak an kalpi kho lo’ timi langhter lengmang kha an duh. Cutikah, Falam a daih tuk tawnmi kha an huat tuk, Falam zong ralkap nih tha tein an uk kho lo, a dai ve lo timi langhter nak caah palek an kah hna kha a si. Thluak vs ‘emotion’ tiin miphun kan dawt ning ai dang cio, aho poah i theihthiam hna u sih. Miphun kan siaherh caah asi dih ko. Zeitik hmanh ah unau kar thisen cu luang hram te hlah seh Salai Lung Thli Tum .