𝐅𝐞𝐝𝐞𝐫𝐚𝐥 𝐃𝐞𝐦𝐨𝐜𝐫𝐚𝐜𝐲 𝐑𝐚𝐦𝐩𝐢 𝐒𝐞𝐫𝐧𝐚𝐤 𝐥𝐞 Pu 𝐇𝐞𝐧𝐫𝐲 𝐕𝐚𝐧 Ṭ𝐡𝐢𝐨 𝐀 𝐑𝐚𝐦𝐤𝐡𝐞𝐥 𝐓𝐥𝐚𝐧𝐠𝐚𝐮.

𝗜. 𝗙𝗲𝗱𝗲𝗿𝗮𝗹 𝗗𝗲𝗺𝗼𝗰𝗿𝗮𝗰𝘆 𝗥𝗮𝗺𝗽𝗶 𝗦𝗲𝗿𝗻𝗮𝗸; Ram a dawmi le ram sersiam a duhmi hna nih cun an ramkhel ah an i hmaithlakmi cu Federal Democracy Ramkomh serding hi a si. Khatleikam in kan chim a si ahcun Panglong Agreement tlamtlinter ding kha a si. Pi Aung San Suh Kyi hruaimi sihnaseh, Tlangcung hriamtlai tampi hna le ram dawtu tampi nih Federal Democracy Ramkomh ser an duh ruangah rammi thisen tamtuk a luang cang.  Cucu Kawlram tuanbia ah philh khawh lomi a si. Federal Democracy Ramkomh ser nakding ah 2008 Phunghrampi hi dawnkhan tu bik a si.  Cu dawnkhan tu cu NLD zong nih a phunphun in Parliament chungzong ah thlen le remh an i zuam.

Tlangcung hriamtlai nih Federal Democracy Ramkomh sernak ah an duhbikmi Principal (abiapi bik) 5 cu NLD nih biatak tein a dirmpimi a sinak kong 𝑨 𝑽𝒐𝒊 (4) n𝒂𝒌 𝑷𝒂𝒏𝒈𝒍𝒐𝒏𝒈 𝑷𝒆𝒂𝒄𝒆 𝑪𝒐𝒏𝒇𝒆𝒓𝒆𝒏𝒄𝒆 ah Pi Aung San Su Kyi nih rampumpi theih in a phuan. 2008 phunghram remh a duhlomi nih a phunphun in hlennak an tuah laidingmi phan a umtuk. Cu hlennak le soilemnak cu party cheukhat le mipi cheukhat nih an i zumhsual lai ti phan a um fawn. Tlangcung hriamtlai pawlnih cun NLD he an duhmi a khah caah NCA hin 2008 phunghrampi cu kan thlen khawh lai, hi lam pakhat te lawng a um an ti ve. NLD nih Federal Democracy serding ningcang a chim cang pinah NCA ah tlangcung mi an duhmi Principal pa 5 zong aa hmaitlak cang. Party cheukhat nih cun Federal Democracy ti cu a min in an chim nain an ser dingning lamthluan an chim lo.

2008 phunghram pi nih Federal Democracy ram serding in lam a kham lawng si loin Tlangcungmi party nih mah le ramthen (State) ah teinak hmuh ko zongah State cozah serkhawh lo, Chief Minister zong mah tein i thim khawh lomi hi Tlangcung mi caah thil thalo ngai a si. Tahchunh nak ah 2015 thimnak ah Rakhine ramah Rakhine miphun party nih teinak an hmu ko nain cozah an ser khawh lopin ah chief minister zong i thim khawh a si lo. President nih a duhmi poh a thim ko.

Cucaah 2008 phunghrampi thlen a herh tiah an au lengmang nak a si. 2008 Phunghrampi thlen a duh lomi nih cun hmaikhah lo ah a pelpawi tete in remh lawng an duh. 2008 phunghrampi remh i, Federal Democracy ram dirhnak dingah B-2 bomber nak in a thawng deuhmi na vote kha a sawhsawh ah hmanghrimhrim hlah. Ram a dawmi na si i Federal Democracy rampi ser na duh ve ko a si ah cun zei party dah na thim lai i, Ram thanchonak (development) na duh zongah zei party dah na thim lai?

𝗜𝗜. 𝗣𝘂 𝗛𝗲𝗻𝗿𝘆 𝗩𝗮𝗻 Ṭ𝗵𝗶𝗼 𝗥𝗮𝗺𝗸𝗵𝗲𝗹 𝗧𝗹𝗮𝗻𝗴𝗮𝘂; 𝗣𝘂 𝗛𝗲𝗻𝗿𝘆 𝗩𝗮𝗻 Ṭ𝗵𝗶𝗼 cu NLD party a si caah Federal Democracy rampi ser nakding cu chim hau loin ai hmaithlak ciami a si. Cu pinah Chinram le Chin miphun sersiam nakding caah ai hmaithlakmi a ramkhel tlangau (5) a um. Cu hna cu: 1. Ngandamnak, 2. Dinfelnak, 3. Nawlngaihnak, 4. Fimnak le 5. Dawtnak hna hi an si. Cucu hitihin a fianter:

𝟭. 𝗡𝗴𝗮𝗻𝗱𝗮𝗺𝗻𝗮𝗸; Minung kan nunnak ah kan pum le kan thinlung, kan thlarau ngan a dam cu a biapi taktakmi a si. Hi bantuk ngandamnak ngeih lawng ah a herhmi khuaruahnak ngeih khawh a si i ṭhanchonak rian zong ṭuan khawh a si. Cucaah Chinram ah ngandamnak thazaang kan pek lai; siizung, siikhan ti bantuk a si khawh chung in tampi ngeih khawh kan i zuam lai. Siibawite le siilei a thiammi saya/ sayamahte tampi chuah khawhnak zong thazaang kan pek lai. Khuate tiangin sii sayamah te um dih kho hna seh ti hi a chimmi le saduh a thahmi a si. Siilei rian a ṭuanmi le ṭhanchonak lei a ṭuanmi INGO, NGO tampi in Chinram ah lut hna sehlaw kan ram caah rian ṭha ṭuan hna seh. Cun Chinmi cu zumtu kan si caah thlarau lei zong in kan dam hrimhrim a hau.

𝟮. 𝗗𝗶𝗻𝗳𝗲𝗹𝗻𝗮𝗸 – Baibal ca nih a kan chimhmi cu, miphun a lianhngantertu cu dinnak a si, tiah a kan chimh. Chinmi hi Kawlram chung i ramkulh le ramṭhen 14 chungah a sifak bikmi le a ṭhangcho lo bikmi kan si. Kan ṭhancho ve nakding caah, Baibal nih a kan cawnpiakmi dinfelnak ngeih a hau. Cucaah cun Chinmi nih hin dinfel i zuam hna usih.

𝟯. 𝗡𝗮𝘄𝗹𝗻𝗴𝗮𝗶𝗵𝗻𝗮𝗸 – Baibal chungah Samuel nih,“Pathian nih hin raithawinak nakin nawlngaihnak a duh deuh,” tiah a kan chimh. Chinmi nih nawlngaih nun ngeih i zuam hna usih. Pakhat le pakhat nawl i ngai hna usih. A kan hruaitu le upa te nawlngaih hi Pathian duhmi a si.

𝟰. 𝗙𝗶𝗺𝗻𝗮𝗸 (𝗙𝗶𝗺𝗰𝗮𝘄𝗻𝗻𝗮𝗸) – Nelson Mandela nih, “Vawleipi thlen nakding caah na hman khawhmi a ṭha bik le a hriam bikmi hriamnam cu fimnak a si,” a ti. Chinmi nih hin fimnak ṭanh hna usih. Fimnak cacawn hi duh hna usih law thazaang pe hna usih. Kan ram ahhin kan mino hna fimnak an cawn khawhnak ah sianghleirun (university) ṭha um khawh nakding kan zuam lai.

𝟱. 𝗗𝗮𝘄𝘁𝗻𝗮𝗸 – Baibal nih voi 351 tiang a phuanmi dawtnak ngeih i zuam hna usih. Cun dawtnak ti tikah, minung pakhat le pakhat dawtnak zong a si lai, pumpak i dawtnak zong a si lai. Unau, ṭafar, chungkhat dawtnak zong a si lai. Cingla rualchan dawtnak zong a si lai. Cun innpa chakthlang dawtnak zong a si lai. Sang khat le sang khat dawtnak zong a si lai. Cun khua khat le khua khat dawtnak zong a si lai. Peng khat le peng khat dawtnak zong a si lai. Tlang khat le tlang khat dawtnak a si lai. Khrihfabu bu khat le bu khat dawtnak zong a si lai. A hnu bik ah mah nunphung tlaih bu tein ram le miphun dawtnak ngeih i zuam hna usih, timi hi a chunmang le a ramkhel tlangau bia an si. Aa hmaithlakmi a ramkhel he pehtlai in zeidah a tuahmi a si? dot khat hnu dot khat in a kan hun langhter lai. Credit: Chinram Tlang Sang Thawngzamh