2015 thimnak ah eihmurnak doh ding bia a kamhmi party kan rak ttanhmi kha philh awk asi lo.

Myanmar News

2015 thimnak ah eihmurnak doh ding bia a kamhmi party kan rak ttanhmi kha philh awk asi lo.

2015 mizapi thimnak ah mipi tamdeuh nih zikhnawh eihmurnak tuah lo in mipi a ai-awh kho taktak lai tiah ruahmi party le palai pawl thimfung kan pekmi kha kan philh rih lai lo tiah ka ruah. Phundang in chimh ah cun a tthami cozah, a thianghlimmi cozah, federal democracy a kan ser piak kho dingmi palai pawl le party an si ti zong chimh khawh asi.

Cattialtu ka rian pakhat ruang ah Chin ramkulh thimnak dirhmun kong tu lio ah hlathlai tuaktaannak caanttha ka ngei. Chin ramkulh peng 9 in mipi cheukhat he phone in chawnhbiaknak caanttha kan ngei kho. 2015 lio ah mizapi tamdeuh nih thim fung kan rak pekmi party le palai pawl tampi hi tender bawhtu hna i tlaihhipmi kut tang ah a tla kho timi a hun ka ruahter. Abiapi in zikhnawh eihmurnak a um sual lai tiah ka thin a phang pah.

Keimah aa chawnhbiakmi tamdeuh chimning in cun 2015 thimnak ah teinak a rak hmumi NLD party a bik in a cohlangtu hna hi phun 3 in tthen khawh an si.
1). Daw Aung San Suu Kyi party a dawttuk le a tlaihchanh tuk ruang ah NLD tha pe mi. Hi phu nihhin NLD kuzale palai mi hi mi zeidah an si, mi fimthiam maw, mi chambau maw, mittha maw, misual maw timi biapi ah a chia lomi an si. Cu hlan ah NLD a rak dirpitu hna an si ti khawh an si.

2). A khun-ayee (opportunity) ngah deuh ding ah NLD tha pe mi. A pahnihnak phu cu an khua le an peng ah lam le sul, hlei le inn pawl acozah nih an kan tuahpiak sual lai lo ti phang ruang ah NLD ttanh a hau a timi an i tel. Cu pin ah Pyine le Pyidaungsu cozah asiloah Hluttaw zung bantuk ah rian pakhat khat tlaih kho ding le hmunhma pakhat khat ngah khawh deuh ding ah NLD ttanh hau a ti mi phu an i tel.

3). A pathumnak phu cu atu lio mizapi nih theih bikmi tender bawhtu, company ngeitu phu an si. Hi phu cu 2015 rampi thimnak hnu ah hmunhma a ngeitu phu an si. A bik in Democracy aauhpi tonmi le fimthiamnak a ngei deuhmi mino lei kap in NLD a ttanhpi tu an sor deuhmi a langtuk.

Cattialtu he aa chawnbiakmi mipi tamdeuh nih an chimchih ttheumi bia pahnih a um. Cucu, “NLD party cu tangka an ngei caah” timi bia le “Tender bawhtu mirum hna nih NLD kuzale palai pawl thimfung lemsoinak an tuahpiak hna caah” timi a si. Atu lio Hakha khuapi telh in peng tamdeuh ah NLD pawl thazaang langhtermi zoh tikah tender bawhtu hna le anmah company rianttuantu, anmah chungkhar naihniam pawl tling ngai in thazaang an chuahmi kan hmuh.

Mipi chimning bantuk a si ahcun NLD kuzale palai hna i a biapi in thimfung lemsoinak bia an chimmi ( campaign message) cu tender bawhtu hna he tuahttuanmi quality zeitluk in dah a tthat, caansau zeitluk in dah a nguh lai timi a fiang rih lomi lam le sul, hlei, inn kong lawng hi an chimceih bik. Federal Democracy, Equality, a tthami cozah, a thianghlimmi cozah, caansau a nguhmi tthanchonak, minung thazang tthanchonak, mino thanchonak lam kong tibantuk … caankhat lio NLD nih kum caan saupi nun thap in aa zuammi thil pawl aa tel ti lo.

NLD party chung ah ka uarmi le ka tlaichanhmi palai a cheu an um ve ko. Asinain, tender soktu nih a biapi in an dirkamhmi kuzale palai hna lawng nih Chin ramkulh ah teinak an hmuh sual ahcun zaran mizapi nakin tender bawhtu pawl an papek deuh khawh hna timi khua a ruahter.

Mipi nih an i ruahchanhmi a tthami cozah, a thianghlimmi cozah le federal democracy ser ding ah cun tender bawhtu hna he cawhpolhnak a ngei lomi asiloah zikhnawh eihmurnak a hrial dingmi asiloah mizapi a ai-awhtu taktak ding mi kuzale palai lawng hi mee pek an herh tiah ka ruah. Credit: Tial Hnin

Leave a Reply