Myanmar ram Sianginn Hon an timh lio ah Hong Kong ram cu COVID-19 ruang ah an Hon mi Sianginn an kharter tthan hna: Myanmar ram Cozah nih Sianginn cu rampi huap in a Honter hnik hna Lio ah Hong Kong cu COVID-19 zawtnak a karh thluamah than caah cozah nih sianginn a honter mi hna Sianginn pawl an kharter than hna tiah theih an si.

Hong Kong khua Cozah sianginn le pumpak sianginn hna cu kum fatin sianginn khar caan January thla ah khar an rak peng nain COVID-19 zawtnak a karh peng rih ruang ah pehzulh in sianginn an khar rih lai. COVID-19 zawtnak aa chawnh mi an zor deuh cang, tiin July 10 ah Hong Kong lutlai cozah nih sianginn a honter hna nain Hong Kong khua cu July 10, ni khatchung ah COVID-19 zawtnak aa chawnhthar mi minung 42 an si. Mah chung ah minung 32 hi Hong Kong ah khua a sa mi an si.

Khuachung minung pakhat le pakhat kar ah COVID-19 zawtnak i chawnhning a karhtuk caah nulepa an thin a phang i an fale sianginn an kaiter ti hna lo. Inn ah umter dingin an ti cang hna. Nikhat hnu nikhat COVID-19 zawtnak i chawnhning a fah chin lengmang caah cozah nih sianginn a kharter tthan hna hi a si. COVID-19 zawtnak a zor Kho hlei lo tiah Hong Kong sii lei thiamsang hna nih an chim. July 13 tiang Hong Kong khua ah COVID-19 zawtnak aa chawnh mi minung 1470 an si, a thi mi minung 7 an si, tiah DVB nih a tial.