Kan doh cuahmah mi:Kan ral ttinung khi NLD le Suu Kyi.

Myanmar News

Atu kan doh cuahmahmi kan ral tihnung khi NLD le Suu Kyi an ral lawng a si lo, kan dihlak kan ral a si.CNLD le USDP nan ral zong a si. NLD kan si lo caah kan i saing lo ti hram hlah u sih. Party politics kaltak rih u sih, lung i rual a herh bik caan a si. Ralkap uknak thlichia nih cun ahohmanh a kan hrial lai lo, kan dihlak kan tuar te ding a si.Salai Lung Thli Tum

Relchap ko thawngpang:Cozah an rak tlaih kaa in ralkap lungton aa zuam lengmang. A sullam cu Ralkap nih uknak an lak thannak ding ah a ruang (reasons) an ngeih naak hnga lo a lam kip in a kunpiak lengmang hna.Ralkap lungput a hmaan lo zia le a fehfuan lo zia a rak theih tuk. Hngakchia tuahsual umh bak in a rak umh hna i, an duh hoih in a umpiak hna.

Mipi le ram zawn a ruah ruangah zeibantuk tuar har tuar zong a poi ah a chia lo. A tuar a fak tuk. Rohingya kongah security kan him lo an ti sual lai i uknak an lak than sual lai tiah amah nih vawleicung mi vialte sualpuhnak aa khinh dih.Suu Kyi cungah mawhphurh vialte a rak tlung. Ram tam pi nih upatnak an pekmi lila tiang in chuh than a tong. Asinain aa in.Tlaang Cung mi kong zongah mawhphurh vialte a tong. Aa in thiamthiam.Ka chim ve i kaa runven ve a si ahcun ralkap pawl ka huarsuan sual hna lai i uknak lak thannak khua an khaang than sual lai tiah amah nih tuarnak aa ham i ralkap tu cu a tuarnak hma le lungthin in a thlemh hna.

A bochan tukmi U Ko Ni an thahpiak lio zong ah daite in aa in. Ram a dam kha a biapi tuk ah a chiah. Doh le kalh in cun kan tei lai lo ti a fiang; a lam zong a si lo ti aa fiang.Nemnak in kan nemter hna lai ti kha a hmuitin a si peng. Cuticun kum nga a vun dih. Thimnak a vun um than tikah aho party vanhai loin cozah ser kho ding tiang in mipi nih a dirpi than hna.Ralkap party pawl cu anmah ralkap chung dah ti lo cu aho hmang nih a duh hlei hna lo.Hi hnu kum nga chung a kan hruai than ahcun kan him lo chin lengmang ti zong an theih. An i runvennak phunghram zong virhkhoih khawhnak lam a um chin lengmang.

An him lo chin lengmang. Hruh lam an zulh than lo ahcun an dai chin lengmang cang.Cucaah an ziaza thing ah an phohpian than sual lai tiah a toderhpiak lengmang ko hna bu ah vote hrokhrolnak nan tuah tiah lulam hngal loin atu bantukin nawlngeignak an lak thannak a si.Atu bantukin a ruang an kawl lo cun nawlngeihnak ngeih than khawhnak lam an ngei fom ti lo cu! Suu Kyi fimnak, nunnemnak le ram dawtnak cu tei awk a that ti lo caah nawlngeihnak tlaih than khawh lam hramhram in an kawlnak a si.Thih lai ekceh bantuk a si cang. Caan nih lai a rel than lai. Zoh rih a hau.Atu cu, zeitluk in dah ralkap nun le ziaza thlemh a har ti kha vawlei pi nih a hmuh than cang. Ralkap na runven hna; na dirkamh hna an ti i upatnak an pek ciami lila tiang an chuh thanmi kha a thar in khua an ruat than cio cang hna lai.Pi Suu i a ram dawtnak, a fimnak le a tuarnak vialte hna hi upat lo awk an tha hrim lo.

Thawngpang dang:Myanmar ram chung khuapi tampi ah cozah riantuantu hna cu thaizing thawk in ralkap uknak cohlan khawh lonak langhternak caah zung kai an i tim ti lo. Siizung riantuantu siibawi le nurse tam bik an i tel. Mah hi tulio hmual a ngei bikmi hriamnam cu a si ko.Chinram chung cozah riantuantu zong nih raltha ngai in le hmailei fale caah ruah piak bu tein ralkap uk chiahru hi rak doh cio ve ulaw lung a hmui tuk hnga.Salai Lung Thli Tum

Thawngdang:Kan Umnak Canada 🇨🇦 ram ahhin, Abortion/nauhrawh hi “all stages” legal a si. Cun, Gay Marriage zong hi, Canada Province/state kip ah legal a si.Canada 🇨🇦 ram ahhin Khrifa, abik in Catholic an tamnak a si, nain Cozah cu, secular state a si caah, zeibantuk biaknak paoh, zalawngte in, anmah le an zumhmi biak khawhnak ram a si.U.S ahhin Abortion/ Nauhrawh hi 24 weeks/ 6 months hlan paoh State kip ah legal a si ve. U.S Supreme Court nih 1973 legalized/cohlanngnak an rak tuah.

Asinain, “Red states” tiah hngalhmi, conservative an tthawnnak state 9 or 10? ahcun, 24 weeks cu, minung pei an si manh cang cu, tiah 1973 lio ah Supreme Court biachahnak cu let/overturn tuah dingin an izuam. A cheu state nih Thla 3 hlan lawng, cohlang ding tbk in an ti. Alabama State hna cu, Abortion hi totally in ban ding hi an izuam ve. Asinain, nihin tiang ahcun 1973 lio Supreme Court biachahnak ding a kal rih.Abortion data zoh tikah, US hi Abortion rate a tla tuk cang. 1973 in 80 hrawng kha Abortion tuah a rak tam nain, nihin ahcun Abortion rate a niam deuh ngai in an langhter. A cheu nihcun, Abortion hi kham a herh tung lo, Abortion rate pei a ttum thluahmah ko hi, an ti ve.

“Pro-choice” a dirpitu paoh nih Nu nih a pum chung ah a ummi naute kong ahcun, amah nih Nawl a ngeih awk a si ko tiah an dirpi. A fawinak in, Women Right ah aa khumhmi a si an ti. Abik in, Nu pawchung ah a ummi naute hrawh lo ahcun, a pawitu Nu nunnak ttihnung a si ahcun, a Pawitu Nu, biachahnak/ decision ah aa hngak awk a si timi hi “Pro-choice” dirhmun cu a si.Pro-life a dirpitu nihcun, Nu paw chung ah naute aa semmi hi thaw/nunnak a ngei vemi a si caah, amah tein aa veng/protect kho a si rih lo caah, State/ Cozah nih ven/protect a hau tiah an dirpi i, Nu paw chung ah aa semmi naute hrawh hi, nunnak lak/ Lainawng a si, zeicatiah, nunnak aa sem cangmi naute kha nunnak Nawl a ngei vemi a si timi hi, Pro-life dirhmun cu a si ve.

Hi kong hi Laimi nih kan ceih ngai ve. Miphun kip nih an ceih cio. Nain biafunnak tuah an iharh cio. Zeicatiah, a har bakmi topic a si. Abik in a tak ah tongmi caah a har khun. Example ah Kum 18 ngaknu no te nih fa a pawi sual tikah, a chung ah naute hrawh loin, amah a thi ding dirhmun hna a si tikah, mah minu caah biakhiahnak tuah piak kha a fawi ti lo.Cucaah, Abortion le gay marriage kong hi zapi/ zaran nih fak tuk in ceih i pakhat le pakhat ituknak/ i judge nak ah hman ngam ding phun a si lo. Kan cung cio ah von tlung sehlaw, pre- choice a timi kha, pro-life a si kho i, pro- life aa timi kha, pro-choice ah icang khawh a si.Za Sang cinzah

Thawngpang dang:Wednesday i President biakamnak tuah a lim le cangka US President Joe Biden nih a biapi taktakmi le a siaherh bikmi nawl 15 a rannak in a chuah colh. A rian a chawnmi pa Trump i a policies pawl cu a hrawhpiak dih colh i, pulrai le khuati thlennak (climate change) pawl hna cu hawihlanbik ah a vun nam colh hna.

Wednesday chunhnu ah cun Oval Office i a rami thawnglatu tampi hmaika ah nawl a chuahmi capar cungah cun min a vun thut duahmah hna i, zulh dingmi phung le lam, cun tuah dingmi thil kalpi awkah ka caan hi khuatlaiter kai tim lo, tiin a chimh hna.

“Nihin i minthut nenhtein nawl ka chuah dingmi pawl hi Covid-19 a umtuning a letthal khotu thil an si i, Climate Change zong cu cuhlan bantuk si lo in biataktein kan nam cang lai. Cun, miphun karlak ah rualrannak um dingin le sining niam ai ngeihmi communities pawl dirkamh ding karhlannak cakngaiin kan tuah lai. Hihi cu kan thokka lawng a si ko rih,” tiin president Biden nih a chim.
Federal inn le lo chungah le federal riantuantu paoh Mask i hruk viar dingin Democratic President nih minthut bakin nawl a chuah. Covid ral a dotu dingah a thar tein White House office ser chom dingin, le WHO in US a chuahmi lut than dingin nawl a chuah colh.

Paris climate accord zong luhthan dingin min a thut i, biataktein climate change kalpi dingin nawl a chuah. Cun, biaalnak a chuah pengnak Keystone XL oil pipeline kong zong cu a rannak in a phih colh.Mipeem kong he pehtlain, Trump nih ramri hau saknak dingah phaisa fund raise a tuahmi cu a khampiak colh i, Trump nih US lei tlawn a khammi a cheukhat Muslim ram pawl zong tlawn a onh than cang hna (nupi, pasal, fale, unau, nulepa laknak telh in).

A ni khatnak office a thut i nawl a chuahmi pawl hi a rauhhlan i tam taktak nawl chuah ai timhmi hna lakah tlawmte lawng an si ko rih, tiah a press secretary Jen Psaki nih a chim.“A ra lai mi ni le zarh chungah hin, harnak kan tonmi (challenges) pawl hmachawn khawhnak dingah a biapimi nawl a chuahchap rih dingmi tete an um ko rih, cun, American mipi sinah biakamnak a rak tuahmi zong a takin tuah ding ai ba rih hna” tiah Psaki nih a chim.

Sining ai thlengmi (trans) American pawl ralkap lut lo dingin an khammi zong a hrawhpiak than hna lai. Cun, nauhrawhnak (abortion) he pehtlaiin US nih ramdang ah bomhnak a pek tawnmi an kham caah, cu zong cu a remh than lai.

Economic kongah cun, March dih tiang a caan peh rih dingin US Centers for Disease Control and Prevention nawl a pek hna. Cun, student loan payments zong September dih tiang in thawnpiak rih dingin Department of Education zong nawl a pek hna.Chelsea Bawi

Leave a Reply