Min Aung Hlaing Kaltak In CDM Tuahmi Paoh Laksawng Pek Le Runven Nan Si Lai

Myanmar News

A dikmi lam lei ah fonh a duhmi SAC ralkap le palik hna nih hriamthil he CDM nan tuah ahcun sing 30 laksawng pek leng ah kan in runven hna lai tiah Shan ramkulh chaklei no.1008 battalion nih May 26 ah an thanh. “Tuanbia caah ngeihchih a umlonak ding caah caantha hman thiam” tiah an thanhmi ah cun an langhter.

Shan ram um SAC ralkap tampi nih CDM cawlcanghnak tuah a duhmi an um tiah theih a si, hramhram uknak tangah riantuan duhlo mi SAC ralkap zong an um tiah no.1008 battalion nih an chim. “Cu ruangah kanmah no.1008 battalion sin ah ra uh law kan in huhphenh hna lai. Ramdang kal nan duh zongah mipi nih kan in bawmh hna lai.

Nan hriamthil pakhatkhat rak i put uh law a silo ah nan hriamthil chiahnak sakhan meikhangh ti bantuk zong rak tuah ko uh” tiah no.1008 battalion nih an thanhmi ah an langhter. No. 1008 battalion cu Shan ramkulh chaklei Phaekhung le Ngawngshwe aa tonnak hmun kahdohnak hna ah dohthlengtu phu hna he i fonh in kahdohnak ah ai tel mi tualchung hriamtlai phu pakhat a si. Credit: The Chin Post

Ralhrang nih thihdan pekmi a karh: SAC ralkap nih hramhram in nawlngeihnak an lak hnu ah Myanmar ram thongtla thidan pek a karh caah thinphang a si tiah Amnesty International nih an chim. Myanmar ramchung biaceihzung in thihdan an pekmi hna hi minung 90 tluk hrawng an phanh caah, kumdang nak in a let 8 a karh tiah Amnesty International(AI) nih 2021 Ramkip thongtla thihdan pekmi record ah an langhter.

SAC ralkap nih mipi sualphawtnak an tuahmi cu SAC ralkap biaceihzung ah transfer in thih tiang thongtla ding ah biakhiahnak an tuah piak hna tiah AI phu nih an chim. Ramchung ah SAC ralkap nih hramhram nawlngeihnak an lak hnu ah Hlaingtaya- Shwepyita- North Okalapa- North Dagon- South Dagon- Dagon Saithgan peng chung thongtla hna chung in SAC ralkap biaceih zung nih thihdan pekmi an tam tiah theih a si.

Leave a Reply