NLD Caah Thawngchia Achuak Chin Lengmang Cang Hih

Myanmar News

By. William HC: NLD caah thawngchia achuak chin lengmang ko. Kawlram Kayah state mipi nih NLD vote lo dingin anmah Kayah miphun party vote dingin an mino le an nubu upa hna i fonh in cawlcanghnak an tuah lio pi si. Mah miphun party vote dingin an mino le nubu hna cu March thla khan ton ceihnak an rak tuah cangnak kong an mino haotu Ko Ye Ne nihcun RFA ah a chim.

Image may contain: 8 people, outdoor, text that says "File Video RFA"

2015 lio ah NLD nih tlangcung miphun humhimnak atuah lai i kan covo akan upat piak lai tiah ruahchannak nganpi he Kayah mipi sinah kalin NLD vote cio dingin kan rak chimrel i NLD nih seats tambik cu an hmuh ve, nain kum 5 cozah an ser chung zoh tikah tlangcung mi caah dawtu siloin a kan namneh tu ah an i cang diam tiah a chim.

Kayah Nubu haotu nihcun NLD cungah kan i ruahchannak vialte cu thlitu nih a choih dih, kan miphun cu zeite ah NLD nih an kan rel lo, kan aunak le duhnak zong zeite ah an rel duhlo, an i theihter duh lo caah 2020 hi cu Kayah kan miphun party vote pek dingah kan cawlcanghnak si” tiah a chimchap ve. A liamcia kum lio ah NLD nihcun Aung San Lem cu Kayah mipi hna duhlo le dohbu ah hranhram in an va phun timh lio ah Kayah mino cu NLD cozah nih taza a cuai hna i thongah an rak thlak hna kha si.

Kan nih Chin mipi zong nikhat hnu khat in kan lungfim chin lengmang, miphun dirpi le ttanh a aherh zia kan i fiang chin, a bikin CNLD party chungah mino cathiam, ramleng ah degree sangsang la mi hna an itel, an dirpi cuahmah mi hmuh tikah lawmhnak chimcawk lo a um.Chinram NLD chungin Chin mino aa fitmi le ramlengah degree sang a la mi an i tel lem lo, cu nih alanghter mi cu nangmah nih aphi hei chuah ko.

2015 thim lio ah Kayah state ah seats hmun 34 ah NLD nih hmun 26 ah teinak an hmuh. USDP nih hmun 7 le independent in hmun 1 ti in teinak an rak hmuhmi si. NLD thlipi ahraan pinah Kayah mino le nubu fonh nih NLD vote ko ulaw tiah mipi an rak forhfial hna mi kha a biapi in NLD teinak hmuhmi cu si, tukum cu NLD vote lo ding in le anmah miphun party vote dingin mino le nubu nih an mipi an forhfialnak an tuah lio pi si. RFA

Leave a Reply