NLD velhle ah Lai Miphun Kan Ri. NLD nih Thlennak timi le Laimi (Chinmi) hi a kan Daw taktak maw?

Nai hrawng Laimi cheukhat kan Ramkhel kongah kan thilhran ka zoh tikah Social Media chungin bia ruahnak tete, pumpak hmuh ning tete, ca in tampi tial cio a si. Cu ahcun NLD a tanh na, CNLD a tanh na, kan si cio hna i, NLD a tanh mi nih an chimh mi le an tialmi tam deuh cu, “NLD lawng hi Democracy Federal (Tlangcung mi nih kan Khelmi cu Federal Democracy timi hi a si deuh) le Phunghrampi a remh kho tu a si,” timi le “NLD cu Laimi, Chinmi kan (ကျေးဇူးရှင်) a si, Ralkap uknak a do tu an si, mee pe uh sih” timi hi tampi kan hmuh cio mi a si. Ralkap hi NLD nakin Tlangcung mi nih an doh deuh ti zong kan thei fawn lo, NLD nih cun kum 20 hrawng lawng Ralkap a doh rih, nain Tlangcung mi nih cun kum 70 hrawng kan doh cang ti hi kan philh lo awk a tha. Hihi kan mifim thiam sang pipi, Dr. pipi nih an chimh cio mi a si, nain kan kawlram chung i Ramkhel a kalning, thil umtu ning kan thei lotuk ning kha “fact” biatak in tlawmpal te langhter ka duh.

NLD nih phunghrampi remh le thlennak timi hi a duh taktak maw? thlawmpal te kan zoh lai. 2015 thimnak hnu NLD nih Cozah an ser le cangka in Phunghram remhtu bu, minung 45 chungtel Committee a ser, cu chungtel ahcun 2015 kum thimnak ah teinak a hmumi tlangcung Party an i tel ve, cu lak ahcun kannih Lai, Chin Miphun Party nih teinak kan hmuhnak a um lo tik ah mah Committee ah kan i tel kho lo. Cu phunghram remh dingmi an ruahnak an chuahpi cio hna, SNLD nih 1,112, ANP nih 858, (Arakan National Party (Rakhine Miphun Party) an si ) Mon nih 641, NUD nih 462 an chuahpi, cun NLD nih 114, USDP nih 10 an chuahpi ve. Asinain phunghramremh tu ding committee nih an rian an lim hnu ah Union Parliament (Pyidaungsuh Hluttaw) ah an chuahpi mi ah NLD nih amah nih a chuahpi mi 114 lawng aa tel i, a dang nih an chuahpi mi kha aa tel ti lo ai, cu tik ah SNLD le ANP nih sign an thu duh ti lo, min sen an thu duh ti lo. Mah ka zawn ah tha tein kan ruah ahcun NLD nih phunghram pi hi remh a duh taktak maw timi bia halnak tampi a chuahter, ziah a remh duh taktak ahcun zei ruang ah dah tlangchung mi nih an chuahpi mi hi a cohlan lo? Cu caah mah ka zawn ahhin kan theih dingmi le kan i fian dingmi cu, NLD hi phunghrampi a remh kho tu ding asi, NLD lawng nih a remh khawh lai tiah kan au khuannak hi tha tein lungfim, Ram a khelmi nih kan tuaktan a hau, kan theih lo ahcun dai tein kan um zong hi mifim kan lo deuh lai dah.

Cun, NLD nih phunghram 261 remh a duh fawn lo, mah kong hi two tiers of government timi a langhnak a si i, State Cozah le Union Cozah a si i, mah le State, region cio ah mah tein Chief Minister i thimnak a si. Hi phunghram 261 remh ahcun kanmah le State le Region cio ah kanmah te in CM i thim ding khi kan duhmi a si, cucu Federal Democracy rim a si lai i, cucu NLD nih remh duh lo in, Union Government lei in President nih amah duhmi thim ding an duh caah a remh duh lo, biadang in kan chimh ahcun, kanmah le kan ram, kan miphun ah kanmah tein khuakhan lairelnak kan ngeih dingmi, kan tuah dingmi hi a duh lo. Nain nai te ah MAH nihcun NCA kum 5 tlinnak ah a chim mi cu Sate le Region cio ah mah tein Chief Minister i thim ding hi kan duh mi a si tiah a chim. Nain NLD nih a remh duh lo, cucu maw, NLD nih phunghrampi remh a duh, thlen a duh kan ti lai? NLD velhle hi kanmah Laimi lawng nih kan zumh rua ti in a um cang. NLD, Kawl pawl an velhle ah Laimi pafim, paza, thiamsang pawl kan ri dih ko rua, velhle le a tak hi atu tiang kan i fiang rih lo ti awk in kan um.

Cun, nai te ah, NLD nih Chin mi, Lai Mi a kan dawt caah Vice President a kan pek tiah a au khuangmi kan tam ngai te, hi hi dawt a si lo, 2008 phunghram pi ningin a can nih a phan i a si, rotation kan timi a changchang in tuanak, rotation system a si ruang ah a si. NLD nih a kan dawt ruangah a si lo, a kan dawtlo ning hi kan zoh lai. 2016, March i tuah mi Pyidaungsu Hluttaw i President thimnak ah U Htin Kyaw kha vote 360, cun U Myint Swe kha vote 213, cu U Henry Van Thio kha vote 79 tiin an hmuh cio hna. Mah hna pathum i an vote hmuh ning cu aa dang taktak, aa thlau taktak khi a si. mah kazawn i kan Vice President nih a hmuh mi vote 79 chung ahhin Tlangcung Party MP an zapi 56 ah MP 51 nih Pu Henry Van Thio an vote tik ah, Kawl mi, NLD nih kanmah Laimi, Chinmi an kan vote lem lo ti hi kan philh lo awk a si, mah ka zawn ahhin Tlangcung Miphun Party zei tluk in dah a biapi timi kha hmuh khawh a si. March 2018 ah U Htin Kyaw aa din tik ah thimnak an tuah than, U Win Myint nih vote 403, U Myint Swe nih vote 211 le U Henry Van Thio nih vote 18 lawng a hmuh, mah a voihnih nak hi khat talei in cun a zoh zong a chia taktak, a raung cu tuanbia (History) ah a cam ding a si. vote 18 lawngin tuanbia ah a um lai, mah vote 18 zong hi, NLD nih Pu Henry Van Thio an vote lo, Tlangcung mi an pekmi, an vote mi a si, cucu maw NLD nih Laimi, Chinmi a kan dawt kan ti lai?

Cu caah NLD nih phunghrampi remh le thlen hi a duh taktak lo in a velhle lawng a si i, NLD vehle chungah Laimi, Chin mi tampi kan i zumh sual tawn, cun NLD nih an kan dawt taktak ruangah Vice President hi a kan pekmi a si lo, Tlangcung mi nih a kan vote piakmi a si tihi kan theih fian ah a tha. Vice President caah tiin NLD nih an chuahpi ko, nain a kan petu taktak hna cu kanmah Tlangcung mi, kan miphun hoi an si. Cu caah NLD nih Chinmi, Laimi hi a kan daw taktak lo, Laimi, Chin mi nih NLD i a velhle tu kan ri, a si ko. Development tuah cu zei bantuk Party an kai ah an tuah ding an rian cio a si, Development tuah ruangah NLD nih Chinmi, Laimi a kan dawt kan timi hi NLD a vehle a si i, a vehle a thei lo mi kan Laimi nih kan ri dih, NLD velhle a thei fiang mi kan Miphun hoi, Kachin, Shan, Kayin, Mon, Rakhine, Kaya nihcun NLD i a velhle an kaltak cang ti hi kanmah Lai Miphun zong nih atu kum in kan i fian ve ahau.
Van Lian Thang (Surkhua)
Camp, Yangon