UN Security Council phu le tlangcung hriamtlai phu cheukhat cu, May 25 ah tonbiaruahnak le ceihmainak an ngei, tiah theih a si. Norway Mission khuakhan nakin May 25 ah ceihmainak an ngeih a si i, Kachin Political Interim Coordination Team(KPICT) Secretary Salang Nsang Gum San le a dang tlangcung hriamtlai phu aiawh pawl he Myanmar kong ceihmainak kan ngei, tiah KPICT nih cathanh an chuah.

Ceihmainak an ngeihmi ah a bik in SAC ralkap tangka luhnak zinan cawk zuarnak phih kham ding a biapitnak nak kong UN Security Council phu nih tlangcung hriamtlai phu vialte tonbiaruahnak ngeih ding a biapitnak kong Myanmar rammi bawmh khawh dingah ramri gate in thilri chanh a biapitnak kong le Asean nih Myanmar ram kong a ceihmi hi a tak in ṭuanchuah khawh ding forhchih cu a mit deng cangmi mei tihchih bantuk a si lonak a biapitnak kong kan ceih, tiah KPICT nih an langhter. UN Security Council phu he tonbiaruahnak a kaimi hna cu KNU, Karenni aiawhtu le CNF an si. CreditP The Chin Post

Thawngdang: National Unity Government(NUG) cozah nih a tuahmi NUG Pay cu, a ra lai mi June thla ah thok khawh ding in an i zuam cuahmah tiah theih a si. NUG cozah Project, Finance and Investment Deputy Minister Min Ze Yar Oo nih PVTV thawngzamhnak ah a chim pinah Wave money bantukin NUG Pay a hmangmi cu tangka an i kua kho lai.

Cu pinah Pau dohthlen Aungbali(နွေဦးထီ) le Treasury contract(ငွေတိုက် စာချုပ်) hna zong zalong tein hman khawh a si cang lai, tiah a chim. Caan karlak chung cu kawlram tangka phunkhat lawng hman khawh a si lai i, a hnu ah ram dang tangka kuat le chuah zong hman khawh ding in kan i zuam, tiah Min Ze Yar Oo nih a chim.