Vawlei pi nih kawlram sining dihlak a phuan cang ngeichia taktak si cang

Myanmar News

International Trade Union Confederation (ITUC) nih Kawlram cu vawlei cungah riantuantu hna covo (labor rights) a umlo/a chiat cem nak ram cazin ah a voi 1 nak ah a telh.

ITUC nih nai ah a chuah mi global rights index report ah vawlei cung labor rights a umlo cem mi ram 10 cazin ah Kawlram le Belarus cu a voi 1 nak caah a telh.

Hi tahnak hi riantuantu hna nih an covo cungah amahkhannak an ngeihning , riantuantu phu chungtel hna an him le him lo, zalong tein chimrel khawhnak le tonpumh khawhnak an ngei ning, riantuantu phu hruaitu hna himnak an ngeih le ngeih lo ti mi vialte zoh in tuah mi a si.

Ralhrangbu nih uknak an lak hnuah ralhrangbu a duh lo mi hna cu fak piin a tuk velh, phungninglo in an tlaih hna lengah ralhrangbu cyber security tangah mi vialte cu ngiat an si mi cu pumpak zalonnak le zalong tein chimrel khawhnak an phih piak mi a si tiah ITUC report nih a langhter.

ITUC nih a thanhmi cazin hi vawlei cung ram 149 ah zohfelnak an tuah hnuah an chuah mi a si i, riantuantu hna covo a chiatbik mi ram 5 ah Kawlram cu a tel ve.

ITUC nih riantuantu covo a chia bik ram 10 ah a tel mi ram hna cu Bangladesh, Belarus, Brazil, Colombia, Egypt, Honduras, Myanmar, Pholipines, Turkey le Zimbabwe an si.

ITUC hi ram pakhat cio i riantuantu phu hna he fonh mi bupi pakhat a si i, ram 163 in riantuantu 200 million aiawh tu phu a si tiah ITUC website nih a langhter the chin post.

Leave a Reply