Rev. Dr. Rual Uk: Dinnak Nih Miphun A Cawican (Righteousness Exalts A Nation)

Sermon

Dinnâk nih miphun a cawisân, Righteousness exalts a nation (Phungthlukbia 14.34)

Hi Pathian bia hi minung lei ah Siangpahrâng Solomon țialmi a si. Amah Solomon chan ah pawngkam ram le miphun vialte nih cho zoh in an zohmi Kanân ram cawisân a sinâk kha a pa Siangpahrâng David dinfelnâk ruangah a si ti kha a fapa Solomon nih a philh khawh lo caah “Dinnâk nih miphun a cawisân’ tiah a rak țialnâk hi a si. Amah Solomon tu cu a pa David bangin in a din lo caah a pa David dinnâk nih a cawisânmi Kanân ram cu pawngkam ram le miphun vialte zohchuk mi ram ah țhumh a si i Jerusalem khualipi le Pathian umnâk Tempal amah Solomon nih a sakmi tiangin BC 586 kum ah vutcam ah ai cang dih.

Zeicatiah ‘dinnâk nih miphun or ram a cawisân ah cun ‘dinlonâk nih miphun or ram cu a țhumh tawn’ ti hi merh le thlen khawh loin a hmunmi biatak a si. Nihin ah kan umnâk kawlram hi Asia ah ram țha bik pa khat a si nain vawlei cung dihlak ah ram sifâk bik lak ah țhumh kan sinâk zong hi vawlei cung ram dihlak ah dinlonâk ah pahnihnâk kan sinâk nih an kan țhumhmi a si.

Cucaah tukum thimnâk ah hin zeibantuk Party an tlin zongah dinnâk nih hmunhma a co ah cun cawisân mi ram le miphun kan si lai i zeibantuk Party an tlin zongah dinlonâk nih hmunhma a lâk peng ko rih ah cun pumpak hnih khat lawng an rum lai i zapi cu vawlei dihlak ah sifâk bik ram dirhmun ah țhumh kan si peng ko lai.

Cucaah dinlonâk nih a tângmi um loin a hrawh cikcek i a tawne ah a țhumhmi kan ram le kan miphun nih kan herh bikmi cu Kawl Party e Lai Party e ti hi si loin Solomon dinlonâk nih a hrawh cikcek i a tawne ah a țhumhmi Kanân ram ah Pathian Profet Amos aunâk aw ‘dinnâk kha tivapi bangin luang seh’ tiah a rak timi kha a si. Credit: Rev. Dr. Rawl Uk

Leave a Reply