America:Rampi ai sum kho tilo’Kawlram buainak kong ah’A linsa bak cang hi.

Thawngpang

Kalw ramkomh cu Kawl ralkap phu Tatmadaw nih hriamnam he uknak hramhram in a lak cang. Mipi nih thim mi cozah hruaitu a si mi rampi president U Win Myint le Daw Aung San Suu Kyi si hna seh, a dang civil officials pawl hna zong zong tlaih an si cang.Hi thawng a than caan tlawmpal ah US cozah nih rianrang tein thlah ding ah thanhca a chuah colh ve. US ram White House in Burma ramkomh he pehtlai in a dang tein thawngthanhnak a tuah. Cu thanhca chung ah cun Burma ramkomh kongkau hi National Security ruahnak petu nih thawng a thanh tiah a tial.

White House chimrelnak ngeitu Je Psaki nih cun US ram nih Burma ramkomh ah a cang mi 2020 thimnak phichuak ningcang loin merhnak le democracy thlenremhnak ca ah ningcang lo thil paohpaoh kan doh tiah a chim.Hi bantuk a tuahtu hna cu azizut an si lai tiah an thanh chih.US nih Burma ramkomh ah a tulio a cang cuahmah mi hi lamnaih tein kan zoh lai i, Burma ramkomh mipi hna he kan dirti lai tiah theihternak a tuah.Source: 7Day TV CBN

Thawngdang:US President kip nih an term chung ah foreign policy he pehtlaih in challenging an ton cio.Obama nih a tonmi challenging cu ISIS an si. A phisin kho lo i, a von changtu Trump nih a phisin. Trump nih a tonmi challenging cu Covid-pandemic a si. Election sunghnak ah a hman i, Joe Bidden chan ah a thiang lai tiah ruah a si.

Joe Bidden nih hmasabik a von tonmi cu Kawlram Ralkap uknak an lak hi a si.Mahhi Joe Bidden caah challenging a si ko hnga maw? Zeitindah Kawlram kong hi phisin te hnga? Vawlei cungah statement a chuah hmasabik a si i, a ttialmi ah “tuanvo ngeitu cungah “action” kan lak lai” a ti bak ve ko i, zeibantuk phun indah “action” cu a lak te hnga’Hi thil hi a zungzal in Kawlram aa thleng thainak ah cang hram seh tiah kut ka sih ko.Lion ruak in khhuatizu/honey a chuahtertu Pathian nih a ttha lei in kan ser piak hram seh.Za Sang Cinzah

Thawngpang dang:Kan Umnak Canada 🇨🇦 ram ahhin, Abortion/nauhrawh hi “all stages” legal a si. Cun, Gay Marriage zong hi, Canada Province/state kip ah legal a si.Canada 🇨🇦 ram ahhin Khrifa, abik in Catholic an tamnak a si, nain Cozah cu, secular state a si caah, zeibantuk biaknak paoh, zalawngte in, anmah le an zumhmi biak khawhnak ram a si.U.S ahhin Abortion/ Nauhrawh hi 24 weeks/ 6 months hlan paoh State kip ah legal a si ve. U.S Supreme Court nih 1973 legalized/cohlanngnak an rak tuah.

Asinain, “Red states” tiah hngalhmi, conservative an tthawnnak state 9 or 10? ahcun, 24 weeks cu, minung pei an si manh cang cu, tiah 1973 lio ah Supreme Court biachahnak cu let/overturn tuah dingin an izuam. A cheu state nih Thla 3 hlan lawng, cohlang ding tbk in an ti. Alabama State hna cu, Abortion hi totally in ban ding hi an izuam ve. Asinain, nihin tiang ahcun 1973 lio Supreme Court biachahnak ding a kal rih.Abortion data zoh tikah, US hi Abortion rate a tla tuk cang. 1973 in 80 hrawng kha Abortion tuah a rak tam nain, nihin ahcun Abortion rate a niam deuh ngai in an langhter. A cheu nihcun, Abortion hi kham a herh tung lo, Abortion rate pei a ttum thluahmah ko hi, an ti ve.

“Pro-choice” a dirpitu paoh nih Nu nih a pum chung ah a ummi naute kong ahcun, amah nih Nawl a ngeih awk a si ko tiah an dirpi. A fawinak in, Women Right ah aa khumhmi a si an ti. Abik in, Nu pawchung ah a ummi naute hrawh lo ahcun, a pawitu Nu nunnak ttihnung a si ahcun, a Pawitu Nu, biachahnak/ decision ah aa hngak awk a si timi hi “Pro-choice” dirhmun cu a si.Pro-life a dirpitu nihcun, Nu paw chung ah naute aa semmi hi thaw/nunnak a ngei vemi a si caah, amah tein aa veng/protect kho a si rih lo caah, State/ Cozah nih ven/protect a hau tiah an dirpi i, Nu paw chung ah aa semmi naute hrawh hi, nunnak lak/ Lainawng a si, zeicatiah, nunnak aa sem cangmi naute kha nunnak Nawl a ngei vemi a si timi hi, Pro-life dirhmun cu a si ve.

Hi kong hi Laimi nih kan ceih ngai ve. Miphun kip nih an ceih cio. Nain biafunnak tuah an iharh cio. Zeicatiah, a har bakmi topic a si. Abik in a tak ah tongmi caah a har khun. Example ah Kum 18 ngaknu no te nih fa a pawi sual tikah, a chung ah naute hrawh loin, amah a thi ding dirhmun hna a si tikah, mah minu caah biakhiahnak tuah piak kha a fawi ti lo.Cucaah, Abortion le gay marriage kong hi zapi/ zaran nih fak tuk in ceih i pakhat le pakhat ituknak/ i judge nak ah hman ngam ding phun a si lo. Kan cung cio ah von tlung sehlaw, pre- choice a timi kha, pro-life a si kho i, pro- life aa timi kha, pro-choice ah icang khawh a si.Za Sang cinzah

Thawngpang dang:Wednesday i President biakamnak tuah a lim le cangka US President Joe Biden nih a biapi taktakmi le a siaherh bikmi nawl 15 a rannak in a chuah colh. A rian a chawnmi pa Trump i a policies pawl cu a hrawhpiak dih colh i, pulrai le khuati thlennak (climate change) pawl hna cu hawihlanbik ah a vun nam colh hna.

Wednesday chunhnu ah cun Oval Office i a rami thawnglatu tampi hmaika ah nawl a chuahmi capar cungah cun min a vun thut duahmah hna i, zulh dingmi phung le lam, cun tuah dingmi thil kalpi awkah ka caan hi khuatlaiter kai tim lo, tiin a chimh hna.

“Nihin i minthut nenhtein nawl ka chuah dingmi pawl hi Covid-19 a umtuning a letthal khotu thil an si i, Climate Change zong cu cuhlan bantuk si lo in biataktein kan nam cang lai. Cun, miphun karlak ah rualrannak um dingin le sining niam ai ngeihmi communities pawl dirkamh ding karhlannak cakngaiin kan tuah lai. Hihi cu kan thokka lawng a si ko rih,” tiin president Biden nih a chim.
Federal inn le lo chungah le federal riantuantu paoh Mask i hruk viar dingin Democratic President nih minthut bakin nawl a chuah. Covid ral a dotu dingah a thar tein White House office ser chom dingin, le WHO in US a chuahmi lut than dingin nawl a chuah colh.

Paris climate accord zong luhthan dingin min a thut i, biataktein climate change kalpi dingin nawl a chuah. Cun, biaalnak a chuah pengnak Keystone XL oil pipeline kong zong cu a rannak in a phih colh.Mipeem kong he pehtlain, Trump nih ramri hau saknak dingah phaisa fund raise a tuahmi cu a khampiak colh i, Trump nih US lei tlawn a khammi a cheukhat Muslim ram pawl zong tlawn a onh than cang hna (nupi, pasal, fale, unau, nulepa laknak telh in).

A ni khatnak office a thut i nawl a chuahmi pawl hi a rauhhlan i tam taktak nawl chuah ai timhmi hna lakah tlawmte lawng an si ko rih, tiah a press secretary Jen Psaki nih a chim.“A ra lai mi ni le zarh chungah hin, harnak kan tonmi (challenges) pawl hmachawn khawhnak dingah a biapimi nawl a chuahchap rih dingmi tete an um ko rih, cun, American mipi sinah biakamnak a rak tuahmi zong a takin tuah ding ai ba rih hna” tiah Psaki nih a chim.

Sining ai thlengmi (trans) American pawl ralkap lut lo dingin an khammi zong a hrawhpiak than hna lai. Cun, nauhrawhnak (abortion) he pehtlaiin US nih ramdang ah bomhnak a pek tawnmi an kham caah, cu zong cu a remh than lai.

Economic kongah cun, March dih tiang a caan peh rih dingin US Centers for Disease Control and Prevention nawl a pek hna. Cun, student loan payments zong September dih tiang in thawnpiak rih dingin Department of Education zong nawl a pek hna.Chelsea Bawi

Leave a Reply