By Zo Tum Hmung: Pu Kep Ling Khengmual: Kan Philh Kho Lai Lo

Thawngpang

PU KEPLING KHENGMUAL: KAN PHILH KHO LAI LO: Nizan (Tuesday, May 26, 2020) ah “CBCUSAgroupmail” ka vun zoh. “Pu Kepling Khengmual nih a kan liam tak” timi tlangtar ka hmuh. Ka vun bih zokzok. Rev. Lal Cungawi thawngthanhmi a si. Zumh lo awk a ttha ti lo. Ka ngeih a chia taktak. Liam cia kum 19 (May – July, 2001) kong ka vun ruat tthan. Guam i kan rak tlonlennak kha. Kan philh kho lai lo, Chumling pa.

Image may contain: 14 people, people standing and indoor

Kan i ton lonak a sau pah cang. Rev. Dr. C Duh Kam, CBCUSA GS a ttuan lio a si ko rua ka ti. An office ah ka va leng hna. Chuncaw kan ei tti, CHIN BROTHERS ah. GS nih chuncaw hi Chumling pa nih a kan dangh, tiah a ka chimh. Ka lawm ngai. Mah hnu cun kan i hmu ti lo. Ka philh kho lo. Saya Kep pawng um aa nuam. Bia a thiam. A mithmai a panh. A kan nihter. Duhsah tein a holh. Duhsah tein khua a tuaktan. Cu zong cu ka mithlam ah an cuang. Ka philh kho lo. A dam lo cu ka theih, nain a kan liam tak tuan lai ka ruat hrimhrim lo. Chumling pa he kan i theih ngainak pathum kan hrom hna lai.

Image may contain: one or more people, people sitting, table and indoor

1. Guam ah Chumling pa he. President George W. Bush chaan a si. Amah kut tang Health and Human Service Vuanci Tommy Thompson nih Chinmi le adang bawmh dingin a nawlngeihnak a chuah cang kain Guam ah ka va tli tthan. Guam ah a tangmi hna lak an hau. Nain, asylum an sok hmasa a herh. Thi an i sit a herh. Phaisa bawmhnak pek a herh. U.S. kal nak kong tuaktan a herh. U.S. an umnak kong tuak cia a hau. An phak tikah an tthut dirnak ding vialte tuak cia dih a hau. Cu vialte lakah a biapi ngaimi pakhat cu ” file” a si. Keimah nih ka tlaih. Ka chei ti lo. File kong a fel lo ahcun a si kho lo. Palh a ngah lo. Min kong ah, chuah ni thla kong ah. Cu tikah Chumling pa bawmh ka rak hal. Saya Thang Rem (Florida ah a um) he. Chumling pa rak um hlah sehlaw zeidah kan lawh hnga ka ti caan a tam. Kan philh kho lo, Chumling pa. Hi kong ka ttial bal lo, atu ka voikhat ttialnak a si hi mu, Chumling pa.

2. Chung le auhnak kongah. Guam in U.S. an rak phan cang. Kawlram ah chungkhat auh an duh cio. Nupi le fa le U.S. ah um thai dingin kan tuah. Nain, U.S. Embassy, Rangoon nih an zumh lomi an um len. Hmai a kal kho ti lo. A ti awk kan thei ti lo. Chumling hruainak in nang nih cozah rak kan chimh piak ko tiah an ka fial. Thla 4 hrawng kan rau. U.S. State Department ka ton hna. U.S. a ummi le Kawlram a ummi thi i sit hna sehlaw, an fa taktak a si le si lo a fiang ko lai tiah an ka ti, cozah lei nih. Cu ti cun kan tuah. A tlam a tling dih tthan. Rian loin ka um caah ka telphone le adang ka bill pawl an ka tuaktan piak dih, amah hruainak tangah. Hi zong Chumling pa rak um hlah sehlaw zeidah kan lawh hnga ka ti. Mi tampi nih an thei lai lo. Ka ttial bal lo. Atu lawng ka ttial. Kan philh kho lo, Saya Kep.

3. “A Lai Buu” kong. Mi tampi nih “A Lai Buu” ti hi zei min dah a si, an theih lai lo. An mawh lo. A fawinak in chim ahcun tthen a duh lomi buu an si, “A Lai Buu” ti cu. Fonh a duhmi a si. Hmun khat ah um tti a duhmi buu a si. Cu ruahnak cu Chumling pa thinlung le thluak ah a rak um.. Hmun khat ah um a duh tuk caah Indianapolis ah rak ra kho a ttha lai tiah atu le tu a ka cah. Ka el len. Nain, voi khat cu ka va kal. Hmun khat ah um tti dingin kan i zuam. Kanmah duhning cun a tlam a tling lo. Nain, “A Lai Buu” ruahnak nih Indianapolis Chin Baptist Church (ICBC) a hrin. Church Chairman zong a ttuan. A thazaang dihlak in ICBC a dirhkamh. “A Lai Buu” ruahnak le thinlung cu ICBC ah a nung. Culawng a si lo, CBCUSA ah staff a ttuan. Kan philh kho lo, Chumling pa.

Va kal chung ko kun ko mu. KAN PHILH KHO LAI LO. Atang hmanthlak 2 khi Guam ah kan rak i thlahmi a si. Pu Moses T. Lian nih a ka kuat. Ka lawm. 1. Orhlei 3nak hi Chumling pa, Saya Thang Rem orhlei 2. Kehlei 3nak. By Zo Tum Hmung

Leave a Reply