CNLD hi ai thok ka lawng asinain Mino tampi nih an dirkamh ti a lang

Thawngpang

CNLD hi ai thok ka lawng asinain Mino tampi nih an dirkamh ti a lang. Tukum thimnak cu mino tampi nih mee an pek lai, cucu zei party cio ca zong ah thil tha asi. Mino nih ramkhel rian hi kan liang cungah ah a um ti kha an fian cang caah asi. Anmah le an duhmi party cio ah mee an pek ko lai, ka lomhpi hna. Abikin CNLD ah mino cawlcanghnak a tha ngai, Chin State pengkip cio ah mino an cawlcanghning a lang. Party dang zong nih CNLD achiatkhatnak bik kha sakah thiam nih siih an bawh bang an bawh ve, cucu a phung asi ko hei ti ko uhsih.

Culak ah an bawhmi siih ah an chuahtermi sa le kan kah hih tiah an timi cu Pu No Than Kap hi asi. Cucu a poi hrimhrim loh, mino tampi le miphun duhdawtnak a nei mi nihcun a luan cia caan i iremlonak le ihuatnak hna kha idonhter lo in kan dohmi ral tei khawhnak ding kha biapi ah chia in hmai ah an nawr chin rih ko lai. CNLD cu mi pakhat lawng nih duh poh in thuimer khawhmi asilo zia kha za ah za in an fian ca zong ah asi. Soiseltu hna nih CNLD kha a phunphun in thekdarhter le a thazaang derter an timh, sihmanhsehlaw a thawng chinchin. Buu chung ah a tlamtlin lonak tete tampi a um rih ko lai, buu dirh ka ahcun mizapi ton ciomi asi ko.

Khrihfabuu hmanh ah hi bantuk cu a um pah lengmang ko. Dohthlennak zong ah ai thok ka ahcun a buaibai tawn ko. Caan sau a rauh tikahcun a fekfuan i miphun nih ibochan tlak ah ai chuahmi tampi hmuh khawh an si. CNLD zong hi Chin miphun caah thil tampi a va tuah khawh lo hmanh ah miphun caah kaarhlannak ( step ) pakhat te tal ahcun santlaihnak a nei hrimhrim ko lai. CNLD nih miphun lungrualnak caah institution phun khat bakin ai thlak lai i Chin mi hi kan ifuntomning a fekfuan chin lengmang ko lai. Atu ahcun ai thok ka lawng asi rih, mipi nih zumhlonak le lungrumhnak a tampi ko lai, an mawh hrimhrim loh.

Zeicatiah Chin mi cu kan pipu pa hna chan ah mah le khua cio in ai ukmi kan si lawng siloin Mirang le Kawl nih lungrualnak ngei kho lo ding in caan sautuk ukmi kan si ca zong ah asi. Sihmanhsehlaw nihin ni ahcun mino hna nih kan miphun kong hi kanmah liang cungah khinh kan si cang ti kha fiang tein an theih cang caah miphun party ah biatak le luhlinh in an cawlcang cang. Hi hnu kum 10,15, tiang lawng siloin kan miphun himbawmnak ding le lungrualnak ding caah chan khat hnu chan khat in MIPHUN PARTY hmun zungzal ko seh! Credit: Chan Khar

Leave a Reply