Hakha Thantlang:Um mi hna caah thawngpang tha taktak’free tein tuah piak nan sicang.

Thawngpang

Hakha siizung siibawi hna zong nih mifir ralkap uknak an doh ve cang, uar an um bak. A tanglei hi Dr. Ngun Cung Lian nih a tialmi a si.Hakha Sizung ah လက္ေထာက္ဆရာဝန္ (AS) pawl cu Civil Disobedience kan tuah caah sizung ah kan kal ti lo.Emergency mizaw nan um sual ah cun aleng ah free te in zoh khawhnak ding khua kan khan lio .Mizaw zoh kan zuam lo, zawnruah lo asi hrim lo’Ralkap uk kan duh lo tihi asi ko . Thawng kan rak tial than te lai.
Rak Share cio uh law
Dr.Ngun Cung Lian
Assistant Surgeon
Hakha General Hospital

Relchap duh mi hna caa:Myanmar ralkap nih nawlngeihnak an lak mi cu a ran khawh chung in chiah than ding le tlaihhren mi hna tuanvo ngei upa le a cawlcang mi pawl thlah than ding in America President Joe Biden nih forhfial.

Myanmar ramchung ah ralkap nih nawlngeihnak lak, Daw Aung San Suu Kyi le tuanvo ngei upa hna tlaihhren an si mi le rampi lakhruak thawngthanh hi ram democracy thlennawnnak le upadi an hnursuan i an lonh a si, tiah a chim.Democracy phunglam ah thazaang hman in rammi hna duhnak hrawh asiloah mizapi tam deuh nih lungtlin mi thimnak phichuak hrawh hi tuah ding mi thil a si lo, tiah ah Joe Biden nih a chim.

Myanmar rammi hna thimnak tuah khawh ding, mipi uknak in i uk ding le dai tein nawlngeihnak i pek a si khawh nakhnga kum 10 chung harsa tein aa zuam cuahmah mi thanchonak hi upapiak ding tiah a chim.Cun pehtlaihnak lam phihkhar mi zong hrawk ding le mizapi hramhram in namnehnak zong hrian ding ah vawlei cung ram dihlak nih Myanmar ralkap cung ah aw khat tein rian kan tuan a herh tiah President Joe Biden nih a chim.

Atu bantuk harnak ton lio ah Myanmar rammi he a dir ti mi hna zong America cozah nih phihlonak a tuahnak kong, democracy nunter than ding le upadi ning in kal than ding pin ah Myanmar ram democracy aa thlennawn ning zoh thannak ca ah tuanvo ngeitu hna nih tuanvo lak ngam nakding ca ah America nih ramchung le vawleipi huap in kan tuan lai, tiah a thanhchih.

Aluancia kum 10 chung ah Myanmar ram thanchonnak chrihchan in nawlngeihnak lak than mi phihkharhnak zong a ran khawh chung in zohthannak kan ngei lai i, aa tlak ning in dantatnak kan tuah lai, tiah Joe Biden nih a chim.(Ref: DVB)

Relchap duh mi hna caah:Tuzing phone line an thah dih lio kha Yangon khuachung ah ka kal, kei ka ruah ning ah cun lam zawhtu tam taktak an um cang lai, 88 lio bantuk ralkap duh lonak an langhter len cang lai i a herh ahcun kai tel khawhnak lam in i tel ve ding ka tuak cia.

Nain, Sule ka phak cu ka khuaruahhar taktak, lam zawhtu phu khat tal hmanh ka hmu hna lo. Khuachung ah police le ralkap zong ka hmu hna lo. ATM a bawhmi phu lawng ka hmuh hna. Yangon cozah zung hmai ah USDP pawl lawmhnak hla an sakmi cu ka hmuh. A mak ngai ka ti. Atu ning in cun vawleicung ah Myanmar hi aa-naa ting fawi bikmi ram si dawh a si.Salai Lung Thli Tum.

Relchap ko:Wednesday i President biakamnak tuah a lim le cangka US President Joe Biden nih a biapi taktakmi le a siaherh bikmi nawl 15 a rannak in a chuah colh. A rian a chawnmi pa Trump i a policies pawl cu a hrawhpiak dih colh i, pulrai le khuati thlennak (climate change) pawl hna cu hawihlanbik ah a vun nam colh hna.

Wednesday chunhnu ah cun Oval Office i a rami thawnglatu tampi hmaika ah nawl a chuahmi capar cungah cun min a vun thut duahmah hna i, zulh dingmi phung le lam, cun tuah dingmi thil kalpi awkah ka caan hi khuatlaiter kai tim lo, tiin a chimh hna.

“Nihin i minthut nenhtein nawl ka chuah dingmi pawl hi Covid-19 a umtuning a letthal khotu thil an si i, Climate Change zong cu cuhlan bantuk si lo in biataktein kan nam cang lai. Cun, miphun karlak ah rualrannak um dingin le sining niam ai ngeihmi communities pawl dirkamh ding karhlannak cakngaiin kan tuah lai. Hihi cu kan thokka lawng a si ko rih,” tiin president Biden nih a chim.
Federal inn le lo chungah le federal riantuantu paoh Mask i hruk viar dingin Democratic President nih minthut bakin nawl a chuah. Covid ral a dotu dingah a thar tein White House office ser chom dingin, le WHO in US a chuahmi lut than dingin nawl a chuah colh.

Paris climate accord zong luhthan dingin min a thut i, biataktein climate change kalpi dingin nawl a chuah. Cun, biaalnak a chuah pengnak Keystone XL oil pipeline kong zong cu a rannak in a phih colh.Mipeem kong he pehtlain, Trump nih ramri hau saknak dingah phaisa fund raise a tuahmi cu a khampiak colh i, Trump nih US lei tlawn a khammi a cheukhat Muslim ram pawl zong tlawn a onh than cang hna (nupi, pasal, fale, unau, nulepa laknak telh in).

A ni khatnak office a thut i nawl a chuahmi pawl hi a rauhhlan i tam taktak nawl chuah ai timhmi hna lakah tlawmte lawng an si ko rih, tiah a press secretary Jen Psaki nih a chim.“A ra lai mi ni le zarh chungah hin, harnak kan tonmi (challenges) pawl hmachawn khawhnak dingah a biapimi nawl a chuahchap rih dingmi tete an um ko rih, cun, American mipi sinah biakamnak a rak tuahmi zong a takin tuah ding ai ba rih hna” tiah Psaki nih a chim.

Sining ai thlengmi (trans) American pawl ralkap lut lo dingin an khammi zong a hrawhpiak than hna lai. Cun, nauhrawhnak (abortion) he pehtlaiin US nih ramdang ah bomhnak a pek tawnmi an kham caah, cu zong cu a remh than lai.

Economic kongah cun, March dih tiang a caan peh rih dingin US Centers for Disease Control and Prevention nawl a pek hna. Cun, student loan payments zong September dih tiang in thawnpiak rih dingin Department of Education zong nawl a pek hna.Chelsea Bawi

Leave a Reply