Independent Palai cu Mipi ah hrambunhmi a si Or Mipi Palai cu Independent hi a si

Thawngpang

Independent Palai cu Mipi ah hrambunhmi a si Or Mipi Palai cu Independent hi a si

Democracy timi cu Greek biafang Demos (People-Mipi) le Kratos (Rule-Uknak) in a rami a si. Asullam cu Mipi Uknak ti a si. Myanmar ram 2008 phunghrampi Chapter 1, article 4 zongah rampi uknak hram cu mipi ah aa bunh tiah a langhter. Cun Pyithu Hluttaw, Amyotha Hluttaw le Pyine/Taing Hluttaw upadi pawl zoh tikah Hluttaw Palai ti cu mipi nih thimmi mipi aiawhtu an si tiah a langhter. Cu caah 2008 phunghrampi ning in siseh, Democracy sullam ning in siseh, Hluttaw upadi ning in siseh Hluttaw Palai pawl le Cozah pawl cu Mipi ah hram a bunhmi a si. Cucaah Independent Palai zong hi Mipi ah hram a bunhmi a si ve.

Myanmar ram 2008 phunghrampi chapter 10 zoh tikah party dirhnak nawl cu a pek nain MP palai pawl cu an hram cu party ah an bunh lai ti zong a um lo i Party nih Mipi a kan aiawh ti zong a um fawn lo. Cu tik ah Independent Palai an si ah, Party Palai an si ah 2008 phunghrampi ning in le Democracy sullam ning in Mipi sin ah hram a bunh dih.

Party pawl nih puaisaa bantuk in an vun dir tikah Mipi le MP Palai kar ah i pehtlainak hri kha an chah dih i Party CEC le Party Palai pehtlainak lawng kha a fehter. Cu tikah Party Palai pawl nih mipi duhnak kha direct in Hluttaw ah an phanpi ti lo i, Party CEC sin ah an phanpi hmasa peng. Party CEC nih mipi duhmi kha a cohlan hmasa lawnglawng ah hluttaw ah an phanpi khawh. (CEC nih mipi duhnak kha a cohlan lo ahcun mipi duhmi kha hnawmpung ah a hlonh ko tinak a si). Cu tikah Mipi nih cozah a ser lai timi Democracy zulhphung kha buar in Party nih Cozah a ser lai ti phun in a ruah tu an tam cang. Hi kong hi mipi nih kan i fiang a herh hrimhrim cang.

Cucaah mi cheu nih Cozah a ser khomi party ah kan um a herh ee an ti theu. Nain Democracy ning in cun Mipi nih kan duhmi Palai kha kan thim lai i cu kan thimmi hna nih cun Cozah an ser lai ti lawng kha a si. Mipi duhthimnak kha a pakhatnak ah chiah a si. Cucaah Mipi nih Democracy sullam kan tlinhter duh a si ah cun Party zoh loin Palai kan duhmi kha thim i teinak a hmutu hna nih a remning in Cozah an ser ding kha a si. Ngaihchia ngai a simi pakhat cu MP palai cheukhat le Party a ttanh tukmi cheukhat nih Mipi ah hram bunhmi kan si lo Party ah hram bunhmi kan si ti phun in Independent Palai kha hram ngei lo, donghnak ngei lo tiin an soisel. Cu bantuk ruahnak nih a langhtermi cu Mipi nak in Party kha a sang deuh ah a chiahmi ruahnak a si. A ruang cu, Party Palai tampi le party in a dirmi hna cu Party kha an hram bunhnak le an inn dongpi ah an ruah cang. Nihin Party Palai pawl an dirhmun zoh tik zong ah Party Palai pawl i an hram bunhnak cu Party kha a si mipi a si ti lo. Cu tikah Mipi nih Party pawl kha kan vote tikah kan mah a kan aiawh ti lo i, Party CEC lawnglawng kha an aiawh cang tinak a si. Phundang in chim ah cun Party kha mipi tangah um ti loin Mipi tu kha Party kut tangah kan tla cang. Party kan vote hna ruang ah 2008 phunghrampi nih a kan pekmi covo, Democracy ning in kan tinco dingmi le kan nawlngeinak vialte kan sungh dih.

Cucaah keimah (Salai Dokhar) cu 2008 phunghrampi nih Mipi a pekmi covo a tlinter khomi, Democracy sullam a tlinter khomi, Hluttaw upadi ning in Mipi a iaawh taktak khomi Independent lawnglawng hi ralṭha tein ka dir pinak cu a si. Independent cu mipi ah hram a bunhmi a si caah upadi ning in le 2008 phunghrampi ning in mipi nih zalong tein fial khawhmi le hman khawhmi ka si.

Salai Dokhar
14/8/2020

Leave a Reply