Kawlrawn ah Awtaw an awn ti lai maw?

=======================

An saitlaihlonak a lang ngai manh. Khamhtu ah an rak iruahmi tarnu cu khamhtu a rak si lo, an ifiang hnik cang.Anmah asenci an lulei pawl hmanh nih kan lal kho ti lai lo tiah lunghrinhnak an ingeih ngai cang lai. Nain, cu an izumh set ti lomi, a voikhatnak an iphuhrunnak nih a thawh ṭhan te hna lai. An von thawh khan, mipi thinlung an cawlter dih ṭhan te lai. Nargis thlichia bang Kawlrawn mipi thimfung cu asenci nih a ruh khawh ngawt rih te lai.

Tutan tu cu mipi lakah lung awṭawm in thimfung petu an tam cang lai. Nain, Kawlrawn ah cun maktaduai teitu an si thotho rih lai. Mah hihi siifahnak le ruruhranghrang uknak nih caan saupi a rak ṭemṭawn balmi ram pawl nih an rak ton bal ciomi a si tiah an ti. Siifahnak le ruruhranghrang uknak in luat khawhnak dingah “khamhtu” a haal in an rak haal. Cu an haalnak di cu a riam rih lo. Khamhtu an haal lungin an “idol” nih lih a ṭawn, a hlen hna i eihmuar zeizat a lak ko hmanh ah an hna chungah a pil kho rih lo.

South Korea zong nih a rak ton bal. An idol le khamhtu bik dingah an rak iruahmi cu vawlei fim cawnnak saang bikbik pathum ah a saang bik degree lawngte aa rak ihuihmi pa a rak si. A vohnihnak ah lungawṭawm dengmang in an thim. A voithumnak ah awṭawm ngangin an hlorh hoi. A voilinak ah cun an rem ti lo. Korea lawng si loin, Latin America ram zeimawzat zong nih an rak ton bal tiah an ti. Cu ve bantuk in Kawlram kong zongah cun, ramkhel caṭialthiam U Kyaw Win nih, “Suu Kyi le a NLD nihcun landslide phun in mipi thimfung an ruh lai. A voithumnak tiang hrawng khi cu mipi nih an thim rih ko lai,” tiah a zumhning le a hmuhning a rak phuan bal.

Sinain, Kawlram le Korea ram cu aa lo lo. Korea cu miphun sinak ah homogeneous an si. Kawlram cu Heterogeneous kan si. Kawl belte khi anmah le anmah cu Homo an si. Tlangcung mi nihcun, “an phun kan si lo. We are not the same kind with them” ti in mah aa hngalmi kan si a herh. Cucaah, Chin ramkhel phu pawl buu tamtuk in um hlah uh, buu khatte ah ifun hmasa ulaw, zapi kan ral bantuk simi a kan dolhtu ding buu doh hmasa uh, tiah rak forhfial an rak sinak kha si.

Kawlrawn caah NLD an va ṭhat deuh pek USDP an va ṭhat deuh pekah, Laimi kan ithlak tuk ding si leem lo. Anmah tein an ithim ko lai. Langhter cang bang asenci nih a hui dih te ko hna lai. A poi ngaimi cu, Kawlrawn lei thlichia nih Chin le tlangmi pawl cu choih chih ṭhan a fawite. Lairam khuapi tam deuh cu Kawlrawn lei i a pawmi thil paoh uar an rak hmang. A phung ah an rel beh. Cu ruangah si lai. Ram ṭha a peem bak cangmi hmanh nih Kawl ta asenci awtaw cu heh tiah an aukhuanpiak. Laimi nih aukhuanpiak hrim khi an herh lo. Chin ram milu hna cu North Dagon milu zat hmanh an si theng lai lo cu.

Thimnak ni aa naih tik lebang ah cun, Kawl awnhthiam pawl nih bia dawhdawh in an awtaw cu an cawimawi te lai. Khi tikah, thluak tlawm mah hngal lo Laikek pawl cu Kaw awtaw onh in an awn len ve te rih lai. Kawl ek deh lengmang phung si lo. Ek dek miphun kan si lonak dingah kan “phe” cu kanmah tein kan itlaih i a herhnak zawnah khin hei tengh hnawh mei ding khi a si. Ek dek huam pawl lawng nih asenci cu zei hngal lo, mah hngaelo khin aupi ding khi an si. Kawlrawn ah cun an ek deh nan huammi Awtaw cu a awn rih ko lai, phaang duh hlah u. Lairam bel ah Vakok awnhter ve ko hna usih! Credit: Salai C Alexander