Mi ttihnung: Laimi Tamtuk Kan Umnak America Ram?

Thawngpang

Lai mi tam tuk kan umnak America ram nih tu thla chungah mibuu kahnak fak taktak voi hnih a ton. May 14 ahkhan Mr. Gendron timi pa nih Market kai liomi meithal in a kah hna i minung 10 an thi; a dang pathum fakpi in hliam an tuar. May 24 ah Mr. Ramos timi pa nih Robb lementary School siangngakchia meithal in a kah tthan hna i minung 21 an thi; a dang minung 17 hliam an tuar. A mak tukmi cu hi mibuu kaptu pahnih hi kum 18 veve an si.

May be an image of 15 people, child, people standing and text

Zeiruangah dah kum 18 ngakchia tete nih atu bantuk in mi an thah? Zeidah an duhnak a si? timi hi police le tuanvo ngeitu bawi hna zongah hngalh an duh bikmi cu a si. Cucu caan sin ah kan hngalh te ttheo lai. Sihmanhsehlaw zeiset ruangah timi chim awk kan hngalh hlan zongah minung nunnak hi bantuk thil a chuahtertu thil cu hngalhmi kan ngei ko; kan palh lai lo. Cu bantuk thil tuah tawntu hna cu:

1. Zalennak lawng a duh i a ttuanvo aa hngalh lomi pawl an si. America ram ah mino hna nih an i ngaih bikmi cu ‘kum 18’ tlin hi a si. Kum 18 ka tlin hnu cu, ‘keimah nawl in zei poh ka tuah kho cang’, ‘keimah right, keimah freedom’, ‘keimah cungah nawlngeitu hohmanh an um ti lo, tihi an lungput a si. Nain kum 18 ka tlin ve cang caah chungkhar, nupa le unau cawmtu ka si ve cang lai, timi ruahnak an ngei ti lo. Kum 18 ka si ve cang caah ka khrihfabu, ka khua, ka miphun caah rian fakpi in ka ttuan ve cang lai, timi an ruat ti lo. Zalennak lawng an duh i an ttuanvo a hngal ti lomi minung hi midang caah harnak fakpi chuahtertu an si tawn.

2. Nuamhnak lawng a duh i Pathian a duh lomi pawl an si. Ram tthangcho ummi mino tampi cu nuamhnak lawng an duh i Pathian an duh ti lo caah an lungthin a zaw {Mental issue}. Minung thluak hi Pathian tel loin taksa nuamhnak chung i aa khumh ahcun sau a rau lo, a zaw colh. Texas pastor pa nih “America ram dihlak ah lungthin lei zawtnak a um” a timi kha hihi a hrampi a si. Phaisa, rumnak, minthannak le nuamhnak lawng a duh i Pathian a duh ve ti lomi minung poh cu khuazei an um poh ah lung zawtnak an ngei ko lai.

Lung zawtnak ngeimi an i nuam kho bal lo. Nuamhnak dik tak cu Lomhnak in a ra i lomhnak cu Pathian sin in a rami a si. Cucaah vawlei ah nuam tein nun caan hman na duh ahcun Pathian philh hlah. Pathian loin i nuamhnak kawl hlah. Pathian loin rum i tim hlah. Pathian loin minthan i duh hlah. Naa ngaichih lengah mi dang caah ttihnung ah naa cang lai. By Pastor Hram Bik Lian

Leave a Reply