Min Aung Hliang nih cozah thar a ser than cang a poi ko

Thawngpang

Min Aung Hlaing nih 2008 phunghram kalh in Cozah thar a ser nolh Min Aung Hlaing nih uknak a lak hnu in a atlaih mi 2008 Phunghram zong a buar deuhdeuh.Min Aung Hlaing nih nawlngeihnak a lak ning cu aa cherhchan mi phunghrma 414 in nawlngeihnak ka lak ati mizong 2008 phughram he aa kalh.Phunghram 2008 caang 417 ning ahcun Ram pi President he i chawnhbiak hnu ah kap hnih hnatla in uknak i pek chanh a si nain Min Aung Hlaing cu President he caih hmaihnak in uknak i pek a tuah lo Phunghram buar asi.

Phunghram caang 417 ning cun lakhruak in uknak lak cu kum khat lawng a si lai ti a sinain atu cu kum 3 tiang ka uk rih lai tiah a ti than caah aa tlaih mi phunghram he aa kalh than.Min Aung haling nih U Ni Win uknak Inn hngak cozah Caretaker Government bantuk in cozah a ser nain U Ni Win cozah serning he aa kalh hoi.

Inn hngak cozah Caretaker Government cu U Ni Win nih 1958 kum in a thawk.Cucu U Nu cozah uknak tang ah ramchung buainak a um caah U Ni Win nih uknak a rak chuh. Hi lio ah U Nu nih phung ning in U Ni Win sin ah cozah uknak nawl a rak pe duh ve lo.Asinain U Nu hruai mi Ralkap bawi lak zong in lung aa khat lo mi an um ve caah U Nu kuttang ralbawi hna nih U Ni Win sin ah kal i “U Nu nih uknak hi can karlak cu ralkap sin ah kan pek chung tiah ca in tial ter tiah an rak ti i U Ni Win nih U Nu cu ca tialter i U Nu cozah uknak cu U Ni Win cozah tangah a hung phan.

Min Aung Hlaing cu a ho hmanh nih uknak siseh,nawlngeihnak siseh, cozah sernak nawl a petu an um lo.amah le mah a ape.cucu 2008 phunghrma he zong a akalh rih.

U Ni Win nih Inn hngak cozah Caretaker Government a ser lio ah tinh mi tlangpi pali a rak ngei.cucu 1 Dinnak phung in uk le daihnak riantuan 2 Dinnak phung ukhruainak a um hnu ah Ramkheel Party hna an i tel duh ve ahcun thla 6 chung ah a dik mi Parliamentary system thimnak tuah 3 Pawcawmnak he aa pehtlai mi thilman sang pawl thumh dih 4 Ramchung chawlehthalnak a rawkcat mi sersiam than hna hi an si.

U Ni Win le a cozah nih a cunglei tlaitleng pali a tuahnak ruang hna cu Ramchung mipi kha daite in um ter an duh lonak aw aan zong auter khawh lo le anmah ralkap tuah mi rian poh kha a dingfel mi uknak a si tiah cohlan ter kha rak i timh.

Ramchung ah daihnak a um hnu mipi vuivainak a um ti lo hnu ah le ralkheel party hna nih anmah U Ni Win tining poh kha cohlan hnu ah thimnak kha tuah a si. Hihi tih nung taktak mi a si Ralkap hi 100% cohlan hnu ah ralkap hruainak tang ah thimnak tuah kha aa tinh mi cu a si.

Ramchung thil man tum ter zong kha ramchung ramleeng investment tlawmter kha a si.a fawinak cun mizapi nih chawlehthalnak lei ah harnak tonter i anmah ralkap lei chawlehthalnak kha santer, ralkap lei ah tangka chuahlut karhter, ramchung ramleeng company vialte kha anmah ralkap hriamnam ah ser dih kha an timh mi a si.Ramchung chawlehthalnak a rawkcat mi ka remh lai ati mi kha anmah ralkap lei chawlehthalnak rian a zuamcawhtu chawlehthalnak poh hrawh dih i anmah ralkap lei chawlehthalnak kha fehter kha a rak i tinh mi a si.

Asiahcun Min Aung Hlaing nih 2008 phunghrma cherhchan in zei poh ka tuah a ti i atu tiang sualnak ngei lomi tampi zong 2008 cherhchan in harnak a pek hna. 2008 phunghrma aa tlaih peng tung nain 2008 phunghram nih inn hngak cozah sernak nawl a pe lo.Asinain a ser thiam thiam caah 2008 phunghram hi Min Aung nih a buar leng ah a hrawh tluk a si ve ko.

Cucaah Min Aung Hlaing nih Inn hngak cozah Caretaker Government a ser mi cu ram mipi hi ralkap uknak cohlanter aa timh mi le UN le Asia ram hna nih kawlram kong ah an kaa an cip khawh nakding Ramchung ramkheel Party pawl vaivuanhnak caah a ser mi a si.

Cucaah Min Aung Hlaing nih Inn hngak cozah Caretaker Government a ser mi hi thilthar ah ruat hlah usih, lung awtawm in um hlah uh sih,2021 rampi dothlenak revolution kan tuah mi hi kan dawn hlah seh, zei bantuk cozah uknak hmanh ser ko sehlaw kan hma ban a si mi ralkap uknak le ralkap, phunghram hrawh cu pehzulh ko hna sih Ro Lian.

Leave a Reply