Min Aung Hliang Nih NLD Cozah A Van Ton Cang Hna A Thluak Hman Cang

Thawngpang

Kum 94 mi Thura U Tin Oo cu Myanmar san thuanthu theitu pawl cun a thuhla hi an thei thluh ko ding ti a zum um. U Tin Oo hi Myanmar ralkap pawl hotu hminthang pakhat arak si, ralkap ralṭha sinak Thura laksawng khal arak ngah.

Curuangah a hmin hmai ah Thura tin an tel ṭheu, asinan March 6, 1977 ah ralbawi a sinak ihsin dawisuah a si. Cutin ramkhelhnak ah a tel vivo ih National League for Democracy (NLD) party dinnak ah arak telve, September 2, 1988 ah NLD Vice President a ṭuan ih December 20 ah president a ṭuan.

A hnakum July 20, 1989 ah ralhrang pawlin an kai ih an inn ah an kharhkhum, Thura U Tin Oo hi Aung San Suu Kyi thawn hna an ṭuantlang ṭheu. February 13, 2010 ah ralhrang pawlin an inn ih an kharhkhumnak ihsin an suah zalen.
December 5, 2021 sun ah Min Aung Hlaing cu an inn ah ava leng ih Thura U Tin Oo thawn minute 30 hrawng an beaw.

Security hrangah hmin tarlang rem lo pakhat in, “Ralbawi Min Aung Hlaing in kan pu a damlo ti a theih ruangah ara veh, na ṭulsammi aum asilen in sim thei aw a ti. Yangon arat laiah ara pal duak thu a sim, harhdamnak thuhla lawng an rel, ramkhel thuhla lam cu zianghman an rel lo” a ti.

2017 kum ah U Tin Oo cu bualinn sungah a bah ih liphiat damlonak anei, tu’ah a harhdamnak cu a ṭha nan ṭhaten a ṭong thei lo. Min Aung Hlaing in U Tin Oo hi aveikhat va tonnak a si, U Tin Oo hi ralhrang pawl khalin an ṭihzah zet ih a ei le in ding an va pe ṭheu. Hitin Min Aung Hlaing in ava ton laiah Thura U Tin Oo cu NLD thantar ummi kor le thuam pawl arak hruh falam thawngzam nih an tial mi si caah an tial ning tein ka van chiah ve.

Leave a Reply