“Ralbawizik Hi Federal Democracy Kong Ah Bochan Ngam A Si Hnga Maw?”

Thawngpang

“Ralbawizik Hi Federal Democracy Kong Ah Bochan Ngam A Si Hnga Maw?” Zahan August 19, 2020 ah tuahmi Union Peace Conference ( UPC ) a voi ( 4 ) nak Naypyitaw i honnak an tuahmi ah ralbawizik Min Aung Hlaing bia chimmi nih ka khuaruah a ka tamter ngaimi a um len i mah chung cun tlawmpal hun langhter ka duh. (1) Myanmar ram chungah miphun i tlukrualnak hi a um diam cangmi a si ko. (2) Ram chung buainak vialte hi cozah le tlangcung mi karah a chuakmi an si dih, ralkap he pehtlaihnak zeihmanh a um lo. (3) Ralkap cu rampi le cozah kilven hi kan rian bik a si ko. (4) Meheh lu i taar riangmang in uico sa zuar ti hlah uh. (5) Kannih ralkap rian cu a si lo dingmi thil a can lo nakhnga kilven le a si dingmi thil canter kha a si ko tiah a chim.

A chimmi bia chung hin ruah dingmi le bia hal ding tampi a um. Pakhat te ten zoh tuah hna u sih; (1) Myanmar ram chungah miphun i tlukrualnak hi a um taktak ko maw? A chim duhmi cu Federal cu nan hmuh diam cang ti khi dawh si ko cuh. (2) Kawlram buainak ah hin ralkap hi an i tel taktak hnga lo maw? 1962 – 2020 kar buaibainak hrampi cu anmah an si dih. (3) Ralkap nih rampi le cozah maw an kilven deuh hnga, anmah pumpak hlawknak dah? (4) Meheh lu i taar riangmang in uico sa rak zuar ti hlah uh, a ti duhnak cu Kawlram tuanbia dik lo hmangin federal hi rak kan hal ti hlah uh tinak a si ko. Tuanbia dik lo aa tlaih pengmi cu anmah ralkap pawl hi an si ko. (5) Kannih ralkap rian cu a si awk a si lomi thil a can lo nakhnga kilven le a si awk a simi thil tlinter hi a si ko a timi hi zeidah si hnga? A sullam cu nannah NLD le tlangcung hriamtlai pawl nih nan aupimi federal le democracy cu a zatawkin 2008 phunghram ah kan telh ko cang caah mah hi pin hi cu i ruah duh ti hlah uh, hihi pei ralkap kan rian bik cu si ko cu, ti hoi hna a sawh duh si hnga maw? Lai phungthluk ah ” Varit na duh le cepa i lak. Cepa na duh le cepa kha i lak” a titu pa hi federal democracy meifar a kan vaanpiaktu ding hna ah kan ruat sual maw? Ram pumpi huap remdaihnak civuipi bak ah ralbawizik nih a hmai aa chiat zau i mah bantuk bia suarhaar a chimmi hi NLD hruaitu hna le tlangcung hriamtlai phu hotu pawl nih cun an duh lo ngaingai nain miphun party aa timi cheukhat hna nih cun an i lung hmuihnak kong Online cahmai ah an langhter ve hna. Miphun min hman riangmang in Lairam a zuar thlai te ding hna kan um sual te hnga maw? Nang teh zeitindah na ruah? Credit:

Leave a Reply