Rev. Dr. C Duh Kam: Global Chin Village, Pathian Nih A Kan Serpiak
Rev. Dr. C Duh Kam: Global Chin Village, Pathian Nih A Kan Serpiak
Vawlei a tli tuk cang i, thil ai thleng cak tuk caah kan ngeih thing mi ruahnak tete kha cu thlen zong an hau pah ve cang ko lai. Vawlei pi a tlik ning in a tli kho mi si kan hau ko cang. Zeitluk hmanh in chan cu tli hmanh sehlaw Pathian dawtnak, daihnak, le dinnak (DDD) cu an sining tein an si zungzal. An i thleng bal lo. Ngeih awk ah a tha bik an si zungzal ko lai. Kan miphun cawisangtu an si.
PATHIAN DINNAK IN; Kan ram le miphun damnak caah mi zei paoh nih tuanvo kan ngei. Dinnak a um lo ahcun kan vawlei hi sersiam khawh ding a si lo. Ram hi dinnak a um lo ahcun hngah nuam a si tawn lo. Cu caah a si ko lai. Biakam Hlun profet le chan thar biaknak riantuantu hna zong vawlei nih Pathian dinnak lam a zawh khawhnak ding ah an au khuan ve lengmang tawn hi! Pathian thawng in 2013 hnu cun kum chiar tein Chin/Lairam ah ka tlung kho ve. February 2019 TABC Civui, Thangzang khua ahcun “Dinnak kha a cat lomi tiva bantukin luanter camcin ko u” (Amos 5:24) hi an tlangtar a si. Kan ram nih dinnak cu rawltaam le tihal bantuk in a hlammi a si ko ti hi tem khawh colh a si.
Kum 2015 i Myanmar ram ai thlen hlan le thimnak tuah hlan ah Pi Aungsan Suh Kyi le Pu Aung Min zong Naypyitaw ah Rev. Dr. Roy Medley, Former GS of ABCUSA le Dr. James Winkler, President le GS of the National Council of Churches, DC hna hruainak in kan rak leeng hna. Kan Kawlram cu dinnak le zalawnnak a ummi ram si sehlaw ti an kan duhpiak tuk cio caah a si. Kan kalpi hawi, kan hawikom tha le sianginn kan kaipi hawi mah Laimi te a simi Dr. Yam Kho Pau bel te nih MBC GS a tuan lio ah kum no tein mual a kan liamtaak tuan i ngaih a rak chia ngai. Dinnak cu mi zei paoh caah a tha zungzal. Ai palh bal lo mi le thlen awk a tha lo mi Pathian sinak a si.
July 12, 2020, CBCUSA MISSION SUNDAY; 1 Korin 9:16 “Thawngtha ka chim ruang menmen ah hin kaa phorhlawt awk a si lo. A ngaite ti ahcun, va chim tiah fial pek ka si cu. Thawngtha cu chim lo in rak um ning law zeitluk in dik ka caah a poi hnga!” Nihin cu CBCUSA Mission Sunday a si. Kawlram (Myanmar) ah American Baptist Missionary nuva Rev. Adoniram & Ann Judson hna nih Khrih Thawngtha chim ah an phak hmasa bik July 13, 2020 ni kha chirhchan in July zarhpini 2nak hi Mission Sunday ah hman a si. CBCUSA nih ICBM program hi July 13, 2013 Saturday ah Pathian sin ah pek chanhnak kan rak tuah. Hi ni in kan thok. CBCUSA khrihfabu hna sin ah Chin mino hna cu gospel team in kan rak thlah hna.
Khrih Jesuh nih a thawhthan hnu ah a zultu hna cu vawlei khua zakip ah Thawngtha chim a fial hna. Ka zultu ah va ser hna u a ti hna (Matthai 28:19). Khrih a thih caah Lamkaltu hna cu lungawtawm in an um. Khrih nih a chim bantuk in Bawmtu Thlarau cu an sin ah Penticost Ni ah a langh tikah thawnnak in kan khat. Tih an ngei ti lo. Ral tha ngai in Thawngtha an chim. Thih zong an tih lo. An nunnak tiang an pek ngam. Kumzabu 1nak khrihfa hna nih an thisen in Khrih Thawngtha hi an chim. Khrih a dotu Paul cu Damascus khua kam ah Khrih a auh. Vawlei ah a tluk lio ah Jesuh nih “Saul, Saul, zeicadah na ka hrem?” a ti (Lamkaltu 9:4). Saul cu a lung ai thleng. Damascus khua ah Khrihfa hrem aa timmi a si nain, Khrih Thawngtha tu chim a thok. Saul cu Paul tiah an auh (Lamkaltu 13:9). Saul le Paul cu aa khat. Paul cu Thiang Thlarau nih a hruai. Thawnnak a pek. Khrih Thawngtha ruangah hremnak fak pi in a tuar. Khua kip le ram kip ah Thawngtha chim ah a kal. Khrih caah a nunnak tiang a pek.
Jesuh Khrih nih a kawhmi zumtu paoh hi Khrih nih an caah nunnak pek a siannak le Kalvary vailam ah khenhchih a sinak in khamhmi sinak an theih taktak tikah, Khrih caah nunnak tiang pek hi an duh. Ralthatnak an ngei tawn. Khrih caah sian lo mi an ngei lo. Cu bantuk in, kum 1813 July 13 ni ah Adoniram le Ann Judson zong Yangon khua ah Thawngtha he an rak phan ngam ko. Hi lio ah Kawlram cu a chia tuk rih. Hngalh bal lo mi ram zong ah kal a fialtu hna cu Jesuh Khrih a si. Paul nih cun “Thawngtha ka chim ruang menmen ah hin kaa phorhlawt awk a si lo. A ngaite ti ahcun, va chim tiah fial pek ka si cu. Thawngtha cu chim lo in rak um ning law zeitluk in dik ka caah a poi hnga!” tiah a rak ti.
Kannih ca zong ah Khrih Thawngtha chimnak ah kan pekmi chaw hna hi ngaihchih ding a um lo. Khrih Thawngtha caah pe lo in rak um ning law zeitluk in dik ka caah a poi hnga! kan ti cio ko lai. Cu hlan ah, Bawi Khrih caah kaa sian bal lo mi hi atu in cun “Bawipa, nangmah caah ka nung cang lai” tiah kan ti khawh ve ko lai. Thiang Thlarau thawnnak cu kan nunnak ah a cawl ve ko lai. Adoniram le Ann Judson cu Khrih le a dawtmi Kawlram mi hna kan caah an nunnak an rak pek ve.
Chin/Laimi cu tuu pi tang ah khuasa kan si lio ah American Baptist siangbawi nuva Rev. Arthur le Mrs. Laura Carson nih Khrih Thawngtha he an rak kan fuh ve. Hakha khua ah March 15, 1899 ni ah an rak phan. Laimi cu fihnung tuk in kan um lio a si caah Laura le bang cu an phak zan ah a rak tap thluahmah. Cu ti cun, Khrih Thawngtha cu chim an thok. Arthur Carson cu April 1, 1908 ni ah Hakha khua ah ril fawnghlei dam lo in a rak thi. Sizung zong a um lo nak, dam lo zong ah i thlawpnak hmun le sithiam um lo nak ah an rat ngam cu Khrih an dawt tuk caah a si. Kan thlarau tlau lan lai an rak kan sian lo caah a si. An nunnak an pek ngam ko. Kannih hi teh Khrih caah kan i siang ngam ve maw? Vawlei kan nunnak ah a nuam bik mi cu “Khrih caah nun i sian” hi a si. Pathian nih thluachuah kan pek piak ko seh! Credit: Rev. Dr. C Duh Kam