SAC ralhrang minung 19 nunnak tunai te ah khan a liam.Tamtuk nih hliam an tuar than

Thawngpang

Phaan KNLA Le Rallokap I Kahnak Ah Rallokap 19 An Thi 11 Hliam An Tuar Phaan(ဘားအံ) Peng Kahdohnak Ah Rallokap Minung 19 An Thi, Minung 11 Nih Hliam An Tuar Kayin ramkulh,Phaan (ဘားအံ) peng chungah KNU hmunhma ah a ra mi rallokap phu le KNLA kar July 12 zaanlei ah kahdohnak a chuak.Phaan peng Takawngbu ( တေကာင္ဘို‌ေက်းရြာ) khua ,Mipung (မီးပုံး)khua pawng ah July 12 zaan suimilam 8 hrawng kahdohnak cu suimilam 1 hrawng an rauh hnu ah rallokap lei in minung 19 an thi, minung 11 nih hliam an tuar tiah theih a si.

Minung thazaang 70 hrawng an si, tatmah 66 kuttang phu an si. Kan nih cu anmah nak in minung thazaang kan tam deuh, kahdohnak ah rallokap 19 hrawng an thi, minung 11 hliam an tuar , a cheu cu an i bei mi kha chia ta in an zaam tak” tiah KNLA he neihniam mi pakhat nih Ayarwady times ah a chim. Kahdohnak a dih hnu ah ralhrang rallokap phu hna cu nunnak tampi liam le hliamtuar bu in hnu an tolh than tiah theih a si.KNU phu nih PDF cu um nak nawl le ralkap tintan zong an pek hna tiah rallokap nih puh in Kayin ramkulh chungah kahdohnak a chuah hi a si the chin post.

Thawngdang Chin Miphun Kan Khuapi Paoh Ah A Rannak In Oxygen Tampi A Chuahter Khotu SEH Kan Chiah Zokzok A Herh Kalaymyo le a peng chung ummi minung 331 cu Oxygen ngeih lo ruangah an nunnak a liam cang! Hi hnu ah minung zeizat dah an liam rih lai? Kan Laitlang khuapi Hakha, Thantlang, Falam, Tedim, Matu tbk teh an ngei ve maw? Ngei lo. An tong kho dirhmun an si ve. Hi dirhmun hi tong ve hna sehlaw zeitindah an um lai? Hi kong hi kan miphun dihlak nih biatak tein kan ruah i kan ibawmh viar a herh. Cu lo cun kan miphun Oxygen ngeih lo ruang in minung tamtuk kan nunnak a liam lai?

Chin miphun kan tambiknak hmun Lairawn khuapi Kalaymyo, Tahan le a peng chung ummi Chin miphun vialte hi tingli tluk an si. Kalaymyo khuapi, le a peng thawngpang cu theih ngam a si ti lo. Kalaymyo le a peng kong ai ttialnak paoh cu thihnak thawngpang lawngte nih a zelh cang. Kan unau, kan chungkhat an itel sual lai maw? A hodah a si lai tiin thindomh in an thawngpang rel a si.

Cu kan miphun hawi a simi Kalaymyo le a peng chung ummi hna nih an thihnak cu zei bantuk ruangah dah a si? Zeitindah an thih bik ti van hlat ahcun Covid zawtnak in Oxygen chambau ruangah an si bik. Tuchun ni tiang theih khawhmi ah Kalaymyo le a peng chung Covid-19 zawtnak in Oxygen chambau ruangah minung 331 bak an thi cang.
One Million hmanh a tling set lomi miphun ah minung 331 an thih cu a tamtuk cang. Hi pin ah tampi an thi rih lai. Chin miphun tuanbia ah thihnak tambik kan ton a si lai. Hihi kan zoh sawsawh hna awk a si maw? Atu lio ah uknak a tlaitu ralkap pawl cu rinh awk an ttha lo ti cu a fiang cia. Siizung kalmi paoh an thi tiah micheu nihcun an chim fawn. Siizung kal kan caah ttih a timi an um.

Cucaah zeitindah lam kan kawl lai? Kan miphun hawi Kalaymyo le a peng chung nih an herh bikmi hi zeidah a si ti ahcun Oxygen a si. Cucu kan theih cio? Cucu private le Ngo phu hna nih cawk awk le tuah awk a ttha maw ti tikah tuah awk tthat dawh a si. A ruang cu tutiang an cawknak le an hmanmi khi cu bantuk hna ta deuh a si.

Cu ti a si ko ahcun kan miphun dihlak ibawm usihlaw, Oxygen hi caw hna usihlaw, Covid in a zawmi hna nih an herh zat cu kan chuahpi khawh ko ttung lai ti hi ka lung ah a um ngaingai. Careltu nang zeitindek na ruah ve. Tulio cu ral ruangah thawhbur a tam ngaingai. Hmanhsehlaw, kan miphun hawi Oxygen chambau ruangah nunnak a liam cuahmah mi hna cu zoh sawh awk cu an ttha bak ve lo. Kan miphun a kan hruaitu pawl nih kan tuaktanpiak ko hnik uh ti hi tutan ah van ithawh ka duh.

Kan Laitlang, Hakha, Thantlang, Falam, Tidem, Matu, Tonzang, Kanpalet le Palewa zong ah kan tong rih lai ti cu a fiang cia ko. Hi zong hi kan mirum hna nih nan thazaang chuah in a seh zong cu kan cawkpiak cio uh, miaktuk loin dawtnak he kan zuarpiak kho uh, a si loah Khrihfabu rum pawl nih kan tawlrelpiak uh, kan peng za, a chuah khotu Oxygen hi a rannak in kan tawlrelpiak cio ulaw, kan miphun minung tampi an nunnak a liam hlan ah timhlamhnak kan ngeihpiak cia cang uh, cucu atu bak in kan thok a hau cang mi a si Salai Tha Cung Lian.

Leave a Reply