Salai Van Chan Ceu: Chin Miphun Kan Canaan Ram

Thawngpang

CHIN MIPHUN KAN CANAAN RAM

===================

Chin miphun hi Kawlram sertu miphun phat kan si ve. Kawl miphun thingkung i a tleng pakhat bantuk menmen kan si lo. Myanmar ram pangpar dum a dawhtertu dingah pangpar pakhat bantukin rimhmui a chuah ding kan si.

Kanmah tein kan par en caan a cu cang. Midang hnarkua ong in kan thaw chuah ti hna hlah usih. Kanmah hnarkua tein kan thawchuah i zuam ve cang usih! Nihin ah kan Chinram ri kong he pehtlai in chimrel ding tampi kan ngei. Chin miphun nih tuanvo nganpi cu kanmah chan kan liangcung ah a tla cang. NLD nih siseh, USDP nih siseh an chim ngam lai lo. Khua khat le khua khat khua ramri kong vial ah kan i su, kan i deng hna; miphun dang nih nih kan ram ri an kan detnak kong ahcun nihin tiang dai dimdiam kan um rih ko hna. Chin ram tilawng a pem i a pil cuahmah lio ah; innkhaan i detnak kong tu ah kanmah le kanmah kan i doh ding a si ti lo.

2012 ah Le-yar-me upadi, 2017 ah NLD cozah nih a fehter mi me~lut~me-yaing upadi hna, a doh ngamtu an um ti lo. Nihin ah kan ram, nan ram ee tiah, kan i timi vawlei hna cu, cu phung upadi hna ningin cun kanmah ta an si lo zia kha i fiang cang u sih. Kan pupa loram i pekning phunghram hna kan nunter an herh. Kawl miphun nih anmag he aa tlak mi phunghram hna kha Chin miphun caah an ttha dih kho lai lo .

Anmah kawl miphun he aa tlak mi phunghram an tuah bangin kanmah Chin miphun nunphung he aa tlak mi phunghram kan i sersiam ve khawh nakding kan chim kan rel, kan ttuan caan a si cang. Nihin ah Chin miphun caah kan Canaan ram cu Federal Democracy le Self Determination kan hmuh khawh nakding hi a si.

Canaan ram a va zoh mi Israel minung 12 chungah minung 10 bantukin maw kan um ko lai? Asiloah Caleb le Joshua bantukin dah, raltha tein kan miphun lei kap ah kan dir lai. Canaan ram a va zohtu minung 12 chungah minung 10 nih, “Canaan rammi cu a tthawng, an lian, an rum, anmah lakah kan nih cu hngerte bantuk kan si” an ti. A phi chuak cu Caleb le Joshua dah ti lo, an dihlak in thetse ram an thi dih. Cu thil vialte cu Kawl miphun nih an kan tuahpiak lai lo.

Kanmah tein kan i zuam a herh. NLD, USDP chung i minung hna zong Chin mi an si ve ko, nan ti khawh men. Chin mi an si ko nain; Kawl thingkung cungah aa peh mi thingtleng bantuk an si. Thingtleng cu kan tan tikah an thi. Thingtleng nih thingkung a doh ahcun an tan lai ba ro car lai. Khangh awk le hlawnh awk men a si ko lai.

Thingkung cu a nung. CNLD cu thingthleng a si lo. Thingkung pakhat a si. Chin miphun muisam a langhtertu thingkung a si. CNLD thingkung nih a par a chuah khawh nakhnga le, CNLD thingkung nih a thei a tlai khawh nakding caah, Thingkung hram bantuk a simi cu Chin mipi hi nan si.

CNLD nih nanmah Chin mipi hi kan i bochan ko hna. Miphun dang pa thimfung kan i bochan lo. Nanmah thimfung kan in bochan ko hna. Nanmah hi CNLD i a hram taktak cu nan si. Kan miphun le kan ram chiatnak tthatnak, hmailei a nunnak cu. Mipi nanmah kut ah a um ko. Teinak kan hmuh tikah lunglawmhnak a cotu ding cu, Chin miphun zapi nan si ko lai. Cucaah kum 5 voikhat kan ngeih mi tinvo hi, man ngei tein hman khawh i zuam hna usih! Kan CANAAN ram lei ah lungrual tein kal hna usih! Credit: Salai Van Chan Ceu

Leave a Reply