UK Cozah Nih CHRO Phu Tonbiaruahnak An Ngeih Hna, Thawngpang Tha A Si

Thawngpang

UK cozah nih CHRO kha request an kan tuah caah tuchun August 11 ah internet in UK Embassy Rangoon, le London in Department For International Development DFID, le Foreign and Commonwealth Office I Political Officer pawl cu CHRO Hakha in Salai Za Uk Ling le Salai Sang Hnin Lian he tonbiaruah nak an nei kho.

Abik in Rakhain ram I a ummi Chinmi hna dirhmun kong ah thil sining fiangfai in theih an duh caah CHRO sin ah meeting request an kan tuah mi asi. Kan hnu Zarh ah khan American cozah ramdang lei pehtlaihnak office US Deparment of State le CHRO cu Southern Chin State I thil sining kong ah biaruah nak kan nei kho hna.

Tuzarh ah UK cozah nih Rakhain ram I aum mi Chinmi hna dirhmun fiangdeuh in theih an duh caah briefing kan pek than hna. Atu bantuk in kan miphun runven nak ah theih a herh mi ram pical cozah asi mi US, UK ti bantuk pawl nih meeting request an kan tuah mi hi lunglawmh phu ngai asi.

A hlan kum zeimawzat lio ah cun kan mah nih kan miphun kong chimh le ruah kan in duh hna tiah har le fe in appointment kan rak tuah hna I phaisa tampi dih in le can thlau in kan rak kal hnawh tawn hna. Kanmah kan miphun kan kong hi kan politician cheukhat pawl le biaknak lei kan hruaitu cheukhat nih nih an thei ngaingai hnga maw? Cun theih tah an itim hnga maw tihi a cancan ah ka ruat tawn. Credit:  Salai Bawi Lian Mang

Capar dang relchap ding, Ruah Ngaingai Kan Herh; 2015 kum ah Chin State chung ah NLD an tling i Chin State Acozah cu NLD an si. Cu NLD cu Chin miphun lawngte an si ko. Tu ten zong ah Chin State chung ah NLD in aa cuh dingmi hi Chin miphun lawngte an si ṭhiamṭhiam ko. Asinain, kum 5 chung ah zeidah an tuah khawhmi a um. Timit an dil i ei an chuah kho lo. Ti thianhnak seh hmenh an bunh lo. Za lak in ti an pe kho hna lo.

Kannih Halkha vawlei vialte cu a man dih lehlam. Ralkap uknak lio ah a doh khotu Party an um lo i anmah duh poh in rian an rak ṭuan ruang ah ram cu a sii a fak chinchin. Cu ve bantuk cun NLD zong nih anmah Party duh ning lawnglawng in an kalpi ve tik ah, “Aana Shin” bak an si ve ṭhiamṭhiam ko. ‘Check and Balance’ a um lo.

A tu i CNLD in aa cuh dingmi zong hi Chin miphun lawngte an si ve ko. Asinain, hi hna zong hi tling ve hna sehlaw Chin State Acozah hei ser kho ve hna sehlaw ka ṭih ngaingaimi hna an um ve. Anmah Party pakhat lawng nih a cozah an ser ve a si ahcun, “Aana Shin” phun an si ve ko lai, zei hlei an si lai lo; tiah zumhnak ka ngei.

Cu ve bantuk cun USDP zong ka duh hlei hna lo. Keimah hi zei Party hmenh a ṭanhmi ka si lo. Acozah rian ka rak ṭuan lio zong ah zei Party hmenh ah a rak lut belmi ka si lo. Ka kut tang minung zong a rak forh belmi ka si fawn lo. Ram uktu hna chung ah zeitin dah ‘Check and Balance’ a um lai i ‘Dingthlu lairel’ in ram an hruai lai i ram a ṭhancho khawh lai; ti lawng a tuakmi ka si.

Cu caah, kei cu tu ten hi cu a Party in zoh loin a minung tu in kan Chin ram a sersiam khotu taktak tu hi thim hna usilaw Party pakhat lawng nih ram hruai loin Party kip fonh in kan ram hi hruai hna sehlaw cu ahcun, ‘Check and Balance’a um kho lai. Cun, “Dingthlu lairel” ti a um deuh lai i buaktlak deuh in khua an khang kho lai. Cu lawng ahcun kan ram a ṭhangcho deuh lai; tiah ruahnak ka ngei. Nguntual Thawng

Leave a Reply