USA um:Laimi cu Trump ruang ah faklak in thuat an sicang hi.

Thawngpang

Catial tu Saya Van Tum’Vunrang Khrihfa cheukhat nih anmah pumpak ca lawng ruat in le anmah ca tthatnak ding, le hlawknak ding ca lawng ruat in, Trump cu Pathian i hmanmi le thimmi bantuk in US president caah kum 4 an thim i kum 2020 zongah thim tthan an timh. Nan an hlawhtling ti lo. Aruang cu anmah ca hlawknak le tthatnak caah US rampi (Democracy uknak) cu kalpi an timh. Mah an ruahnak (ideology) cu Vunrang Khrihfa dang tampi zongnih an pompi ve hna lo. Mah lioah Laimi (Chinmi), US ummi nih vunrang Khrihfa ruahnak (ideology) cu an i hrawm ve i Trump cu an ttanh i vote an pek.

Pathian thimmi le hmanmi a si an ti ve. Mah vunrang Khrihfa cheukhat ruahnak le timhtuahnak cu a bi tukmi ruahnak a si. Mah ttaangkahuih ruahnak a si. Atak te ti ahcun, Trump le a thimtu, vunrang Khrihfa pawl nih hin miphun dang zong anmah ruahnak i hrawm ve ding in an sawm lem hna lo ti khawh a si. Asinan, Biden cu US rampi a hruainak ding caah le a uknak ding caah miphun kip a kan sawm. Cu nih a langhter mi cu atu ah a thimmi hna, a ttuanpi ding pawl zoh in a thei ko/a lang ko. Minak, Latino, le Asia thisa a telmi, Kalama Harris te pawl a thim hna. US ram cu Pathian nih thlua a chuah i US ram chung i a ummi ca lawng hmanh siloin vawlei cung ramkip ca le miphun kip ca le biaknak kip caah a hmanmi a si. Mah cu a si nan vunrang Khrihfa cheukhat nih Pathian nih miphun kip le ramkip caah thlua a chuahmi le a hmanmi, US rampi cu an kutchung ah chiah an timh/hum an timh, anmah ca lawngah.

US ram i a ummi, Laimi (Chinmi) zong nih cu vunrang Khrihfa cheukhat pawl i ruahnak (ideology) cu an i hrawm ve anmah tein. Mah cu zei he dah a lawh ti ahcun, Langak nih Awtaw bantuk si a duh ve i Awtaw hmul cu a takpum/a hmul lakah a tonh hna. Mah tik ah Awtaw sinah a va kal ve i Awtaw nih thi dengmang in an rak cuk hnu ah a hmul zong an rak phawi piak dih. Trump a ttanhtu, Laimi zong cu Langak bantuk cu kan si ve ti khawh a si. Amah ah Khrihfa sinak le felnak zong a um ve bak lomi, Trump cu Pathian thimmi le hmanmi si nan ti rih. Nan palh bak.

Pathian nih mah bantuk minung phun khi a hmang bel hna lo/a thim bel hna lo. Mah vunrang Khrihfa pawl nih an timi cu US ram Khrihfa biaknak hi kan humzual kan kilven an i ti i sualnak kan doh an ti. Mah an ruahnak hi vunrang Khrihfa dang tampi zong nih an pompi ve hna lo/an pompiak hna lo. Trump a ttanh lomi, vunrang Khrihfa dang pawl hi zoh tik hna ah ruahnak a kaumi le a fim deuhmi an rak si hna. Trump a ttanhtu, vunrang Khrihfa cheukhat ruahnak hi ruahnak hlun a si pinah a bitukmi ruahnak a si fawn. Mah ttaangkahuih ruahnak a si. US ram Khrihfa biaknak kan humzual an timi le sualnak kan doh an timi zong cu santlai lo le a palhmi ruahnak, le thiltuah, le timhtuahnak a si.

Sualnak an doh ning le Khrihfa biaknak an humzual ning hi an palh. Mah cu Laimi (Chinmi) tampi nih Langak nih Awtaw sinak lak a timh bantuk in kan i hrawm ve. Langak cu zeitik hmanh ah Awtaw cu a si kho bel lailo. Cu ve bantuk in vunrang Khrihfa cheukhat nih anmah ca tthatnak le hlawknak ca lawngah an i timhtuahmi ruahnak cu a piangtharmi (a hrintthanmi), a felmi, le Khrihfa ttha a simi nih cun kan i hrawm awk hrim2 a si lo. Kan i hrawm kho fawn lai lo. Aruang cu kanmah caah tthat lonak le sunghnak tamdeuh a chuahpi ding a si.Van Tum

Leave a Reply