Lettu: Salai Van Lahnin

Nikhat cu nungak tlangvaal ai duh ngaingaimi an rak um. Asinain, a tlangvaal pa cu sifak chungkhar in a rami a si. Nungak nu tu cu mirum chungin a rami a si tikah a nulepa an i lawm lo i an hmaichia ngaingai.

Tlangvaal pa nih nungak nu lawng helh/sah loin, nungak nu a nulepa zong hal chih hna aa tim. Cuticun caan cu a hung liam i nungak nu a nulepa nih tlangvaal pa cu miding fel le mi ṭha ngaingai a si ti an hun theih in an fanu pek cu a phu ko tiah an ti i an lungtling.

Asinain harnak pakhat a hung um rih ai. Cucu zeidah a si ti ah cun, tlangvaal pa hi ralkap a si i ral a um ruangah ramleng/ramdang a kum in an kuat. Cu tlangvaal pa nih cun ralram i a kal hlanah ah khuk i bil in a nungak nu cu “Na ka va kho lai maw?” tiah ṭhitumh dingin a sawm. Nungak nu nih cun mitthli tla in ” aww/yes” tiah a cohlan colh ve i cuticun i hamnak an tuah lawng si loin ralram in a hung kir cangka in ṭhitumh lehthahnak tuah dingin biathlehnak an tuah.

Cuticun, a tlangvaal pa nih ralram i a kal taak hnu ni tlawmpal ah, nungak nu cu motor eksiden a tong. Sizung ah an tlikpi colh. Caan zeimawzat hnuah nungak nu cu a hung i hlau i a nulepa an ṭah ko cu a hmuh. Cu tlawmpal ah thil dik lo a um ti a hung theih. Asinain a hnu lawngah hliamhma/eksiden a tuar/ton ti aa theih.

Eksiden a tong ruangah a muisam vialte a rawkral dih. Muidawh tuk a simi cu muichia lak awk tlaklo ah a chuah. Thlalang aa bih fatin alungfah ah a ṭap zungzal. “Nizaan ah cun ka rak i dawh tuk. Asinain tuni ah cun ṭihnung ralhrang bantuk ka si cang,” tiah lungchia ngai cun amah le mah aa chawn. A takpum cu hmaneh in akhat dih i zoh a muichia ngaingai.

Atu le tu, a tlangvaal pa he an biakam cu ruat in let aa tim lengmang. A ka duh ti lai lo tiah khurkhua a ruat. Kumkhat chung a tlangvaal pa nih ca a kuat lengmang zongah, a cakuat zong a let duh lo. Voitampi phone a chawnh/call lengmang zongah a chawn/call ṭhan duh bal loh.

Asinain kumkhat a liam hnuah, nikhat cu a innkhan chungah a nu cu a vung lut. A nu nih cun,“ na tlangvaal pa kha raltuknak hmun in a rak kir cang,” tiah a hei chimh. A fanu cu faak piin a au i, “asilo/ asikholo zaangfahnak tein ka konglam chim hlah. Hika hmun i ka um hi chim hrimhrim hlah,” tiah a nu cu a ti.

Hringtu a nu nih a chimh rihmi cu,“Na darling pa nupi a ngei lai,” tiah a hei chimh pah cun ṭhitumh sawmnak catlap cu a peek.

A darling pa kong a theih cu a lungkuai cikcek. Lungrawk ngaiin a um. Tlangvaal pa a duh peng rih ti aa theih ko na buin, atu ahcun a philh a hau cang ne ai mu. Lungrawk ngai cun sawmnak catlap cu a hun kau. Midang min hlah maw a ṭial ti a ruah lioah cu ṭhitumh sawmnak catlap chungah cun amah min tu a rak i ṭial diam. A lungbuai, thil sining aa fiang lo. A nu cu, “Hihi zeidah a si?” tiah a hal.

Cu tlawmpal ah cun a tlangvaal pa cu a innkhan chungah pangpar tom i putin a hung lut. Ahmaiah aa khuk aa bil i, “ Na ka va kho lai maw?” tiah a hal.

Nungak nu nih cun a kutin a hmai aa huh i tlangvaal pa cu,“Ka muichiat tuk hi ka kaal tak ko,” tiah a hei leh ve.

Asinain tlangvaal pa nih cun, “Nangmah nawl loin le na hngalh loin na nu nih na hmanthlak a ka kuat. Cu na hmanthlak ka hmuh cun, ka lungthin in ka ruahmi le ka hngalhmi cu zeihmanh ai thleng lo ti hi a si. Ka duhdawtmi nu kha na si peng ko. Zeihmanh ai thlengmi um lo. Ka caah na dawh i, na dawh zungzal ko. A ruang cu kan duh i kan dawt,” tiah a tlangvaal pa nih cun a nungak nu a leh.

Mui le sam hi cu a biapimi a si lo. Chunglei nun hi a biapi deuhmi cu a si. Hihi dawtnak taktak, a fekmi dawtnak taktak cu a si.