David Ngai Sak: Tlukruan Nak Le Mah Tein Khuakhan Lairel Nak

====================

Ṭhancho nak lawng na Hmuitinh asi ahcun Cu lawng cu na hmuhco ve lai. Pek mi te lawng an co lai. Pekmi tiang lawng na hman khawh ve. Mah tein khuakhan LAIREL NAK Nawlvo kha a Hmuitinh asi ahcun Cucu na hmuh ve lai. Mah nawl in tuah nak Nawlvo a um lai. Upadi zalon tein ser nak nawl a um lai. Mah tein i ukpen nak nawl a um lai. Mah tein zalon tein Biaceihnak nawl aum lai. Kan ngun sawm cu mah kut ah aum lai. Mah tein hman nak nawl aum lai. Mah tein duh nak le herh hai nak poah ah mersam khawh asi ve lai. Chin miphun le ram he aarup mi Ṭhancho nak Simankin kan tuah khawh ve lai. Cunglei in Sal btk in rian fial nak in kan i hlihphuah ve lai. Miphun hna tlukruannak kha nai hmaithlak ahcun Ramkhel, Sipuazi le Zatlang nun ah Tlukruan Cikcek nak hmuhco in na um ve lai.

Kawl mi cu an tam deuh caah Pyithu ahcun tam ve ko hna seh. Amyotha Hlutdaw tu ahcun; Miphun hna ai-awh tu PALAI hna an si lai caah Kawl (12) a si ahcun, Chin mi (12) si ve ding asi lai. Cucu Federal Democracy kan timi cu asi.Tulio Hlutdaw um zat ning in cun Kachin, Karen, Chin, Mon, Rakhine le Shan Miphun hna ai-awh tu A Myotha Palai cu (12) cio in kan thlah hna. An zapi tein (84) an si. Kawl miphun pakhat te ai-awh tu vial ah (84) an si. Ramkhel ah Tlukruan nak aum hrim hrim lo.

Chin miphun nih fang (1) kan co ah, Kawl miphun cu Fang (7) an co. Me thlak in Biaceih le khuakhan LAIREL tikah kan sung zungzal lai. Party ngan (2) asi mi USDP le NLD nih an pa (2) in cung lei ning tein an I tlaih lengmang. Remh ding zong ah an lung ah a um lo.

Tlangcung miphun vialte zong nih Kawl duh nak phung cu ralchanh in le ralṭhat ngai in kan aupi lio asi. Hmailei zong daihin lo tein kan aupi zungzal lai. Leidai tang kan lut hlan lo le kan hmuh co hlan lo tiang, kan i zuam awk cu CHIN mi vialte kan hmaba rian asi. Cu lawng ah Tlangcung party hna thazang ngeih ngai ngai in kan ṭhawn chin chin lai.

Cucaah, Miphun Tlukruan nak le mah tein khuakhan LAIREL NAK a cohlan lomi Party kha mee na pek ahcun: Chin miphun le Tlangcung mi vialte cu a hlankan in kan intuar ning tein kan pehzulh lengmang ko lai. Mah miphun covo, Tinvo, Nawlvo adohdal tu hna kha thazang kan ṭhawn ter chin chin zong asi fawn. Mah miphun mah tein khuakhan LAIRELNAK le mah tein i Ukpen khawh loding in aho hmanh fial hau lo tein: Mah pumpak bak nih tuahto zong asi fawn.

Panglong Biakam nak le Panglong hnatlah mi btk in; Mah miphun nih Kokek khuakhan LAIREL NAK Nawlvo kan co: Mah Ramkulh kha mah miphun lawng nih: Zalon tein: kan Ukpen zungzal nak lai: Chin miphun nih kan mah Ngunsawm cu: Mah Nawlvo te he kan mersam i kan hman ve cang nak lai: Tlukruan nak tlamtlin tertu; Kawl fang (1) a hmuhco ah: Chin mi nih fang (1) kan hmuhco ve cang nak lai, Amyotha Hlutdaw ah kawl (12) ah chin mi (12) kan si va cang nak lai, Kawlmi (84) an si ah Pine kip nih (84) cio kan um ve cang nak lai, Mah le Pine cio ah Mah le Miphun Party cio kha Cohlan hnatlak nak he mee pe cio cang hna usih.

Abik in chinram kulh um mi hna nih mah ram Kokek chuak Chin Party cohlan in me pe awk asi lai i: Chin Party nih TEINAK ahmuh co nak lai: Kan bawmh chan ding hrim hrim asi. Cucu Chin miphun hna kan rian ngan bik asi ve awk zong asi fawn.

CHIN PARTY nih TEINAK a hmuhco ahcun, Party ngan hna le Miphun dang hna kut in kan luat ve lai. Cung sang le tang niam pehtlai nak a cat zau lai. Chin Party cu party dang hna he Tlukruan tein cabuai cung ah LAIREL Ṭi a si ve lai. Tlukruan nak le mah tein khuakhan LAIREL ning in khua kan sa ve cang lai. Chin Party thazang nin Chin miphun limhang a cuaisan lai. Miphun dang nih Ṭihzah Upat mi kan si ve cang lai. Mah tein upadi suaisam nak Nawlvo le zalon tein LAIREL nak kong ceihhmai nak zong ah a tlamtlin Cikcek fawn lai. Miphun vialte nih Mah tein khuakhan LAIREL NAK hmuhco tuan hnaseh tiah, Thlaza cam buin. Pu Ngai Sak: Chairman. CNLD