Fale Cawnpiak Ning Phun 5

Theihtlei

Fale cawn piak ning phun 5
===================

Fale cawn piak ning cu phun tampi a um mi lakah Harvard Psychologists pawl nih an langhter mi fale cawn piak ning phun 5 te kan in hrawmh hna.

1. Midang bawmh a thatnak kha cawn piak hna; Pakhat le pakhat upat nak he, dawtnak he kan i bawmh ah cun vawlei pi hi nun a nuam mi hmun a si ko. Cucaah na fale nih midang bawmh ding caan an ngeih si cun thazang pe hna law tuah ter ko hna. Cun na fale kha khat le khat upatnak, i ruannak le dinfelnak kha cawn piak lengmang hna.

2. Na fale kha na dawtnak hna le an cung i naa lawmhnak kha langhter i zuam; Na fale cungah an ngakchiat tein na dawtnak langhter khawh i zuam. Cun, thil tha an tuah tikah an cungah lawmhbia chim I zuam. An ngakchiat tein na dawtnak an theih ah cun na cawnpiak tik zongah na bia an ngaih piak khawh lai, a cohlan khawh lai.

3. Na fale kha an lungduhnak an theih nak ding caah bawmh khawh i zuam; A lungduhnak aa thei mi minung cu midang he an i pehtlaihnak ah a tha deuh mi pehtlaihnak an ser khawh deuh. Midang pakhat thinlungkal, lungduhnak hngalhthiamnak an ngeih khawh si cun aa dawhmi pawngkam an ser khawh lai.

4. Na fale kha mizawn ruahnak a biapitnak kha cawn piak hna; Fale kha an ruahnak ngaihpiak an hauh bantuk in midang ruahnak zong kha an ngaih khawh nak hnga cawn piak hna, a biapi khun in, midang he ruahnak aa dan tikah, cohlan khawh nak le ruah piak khawhnak an ngeih nak hnga thazang pe hna. Tahchunhnak ah nan pawngkam ah maw, a si lo ah thawngpang/ tadin (news) ah nan rel mi chung in, harnak a tong mi hna nan hmuh hna tikah, na fale kha zeitin dah an ruah i zeidah kan bawmh khawh hna lai tibantuk in hal hna. Na hal dih hnu ah amah nih a tuah khawh ding a um si cun a tuah khawh nak ding lam kha bawmh khawh i zuam.

5. Nangmah lila nih tuahsernak in cawn piak hna; Na fale nih na bia an ngaih khawhnak dingah cun nangmah lila nih na chim mi kha a tak in na langhter a hau. Midang kha zeitin dah na pehtlaih hna? Zeitin dah na chawnh biak hna timi nih na fale na cawn piak hna caah tam pi bia a chim. Nu le pa hna, fale cu Pathian Laksawng an si caah a tha bik in tthan ter hna usih. A lettu: Iris Bawi Tha Par

Leave a Reply