Good News:US Kal Duh Mi Kan Dihlak Caah Thawngpang Thatuk A Chuak Cang!

Theihtlei

American Sinak Nei In Raltlan An Ko Thei American mi sinak nei lole American ih um lanta ding mi pakhat cun a cawm thei asile Myanmar raltlan siseh ramdang miharsa khal an ko thei ding tin US president Biden cun thu a suah.

US ramdang palai Antony Blinken khalin “Welcome Corps timi feh dan kan thok zo ruangah leitlun hmun tinkim ih raltlan pawl a cawm theitu cun duhdawt zangfah lainak thawn raltlan kawhnak ah an tel thei ding a si,” tin a sim ve.

US mi sinak nei lole US ih um lanta pawlin raltlan an kawh thei dan cu mi 5 tivekin pawlkom an din dingih kum 1 hrang pawlkom 10000 kan cohlang ding. A kotu pawlin raltlan an kawhmi a thlen tikah an umnak ding inn, inn san man, innsang thilri man, thuamhnaw, puan le korhlum man tiang an bawm thluh ding ih thla 9 sung țuanvo an la ding. Curuangah raltlan a ko duhtu cun raltlan pakhat hrang $2275 tal an nei cia ding a si ih, raltlan an kawhnak ih an hmanmi sumpai cu US cozah in a pe sal lo ding.

US president Biden cun dinak theh luttu pawlkom thawng 10 cun kum 1 sungah raltlan ting 1 le thawng 20 hrawng an ko thei ding tin a sim. Tui dinhmun Ukraine,Afagannistan , Myanmar , Venezuala le Burkina Faso ram pawlin raltlan ting 100 tlun an um tin UN cun an sim.

US in um pakhat cun “Thuthang ih umdan vek asile US mi sinak nei cun ziangkim mah ih tumcop in raltlan a ko thei ding tinak a si ih mi 5 tal komkhawm dingin an sim. Curuangah kannih US ih um, US sinak nei zo pawl cun cozah hnenah kan hliahhlai rero lai. Kawhawk tikah Passport lole card a tul ih, UN card nei lo pawl cu a theih hmel lo. Kan zingzoi rero lai. Cozah bomnak um lo,mahte buaipi le cawmthluh, cemliam tum thluh ding a si tikah a hautak zet dingih a tlin teh kan um ngai pei maw” tin a sim.

Hivek hi Australia le Canada cun an tuah rero zo nan, a bangaw cekci thluh lo. Autralia ahcun cozah bomnak an dong thei lai ih, a kotu lamin an kawh caan ih tulsammi an buaipi tilo cu cemliam dang ciamco a um lo. Tu ih US tuah dan cu a khungkai deuh in a lang.