Hringtu nu:Ni a fanu ca a kuat mi’Ka fanu December thla hi lakfa puai thla a silo mu.

Theihtlei

Ka fanu, Sweet December zaan ah ka mithmuh le ka hna theih mi thil nih ka lung a ka nuamh ter lo ngai caah hi ka hin biachahnak kan rak tuah. Kan khua lu ah Nungak tlangval kawp tampi ka hmuh hna, cun Tlangbo le hmun rem ah tampi an um len rih. Sweet December an ti i an i nuam ko hna nain Sweet December a muru taktak an ruat lo, an mak taksa diriam nak lei in Sweet an tuah mi ka hmuh len.

Ka mithmuh mi ka chim hlan ah Christmas hi na fian ka duh hmasa. Thiang thlarau nih Virgin Marry sin ah nau na pawi lai, vawlei mi a khamh tu hna ding fapa na hrin lai a ti lio ah khan, Jerusalem hrawng ah a um ve mi nu tampi nih an theih, siangpahrang nu pawl hna nih an theih. Cu caah Vawlei bawi, khamh tu ah an rel i cu nau cu pawi ve an duh caah a dik lo ning in nupa sualnak an rak tuah len ti a si. Siangpahrang nu pawl zong nau pawi an i zuam an ti. Nungak tampi zong Lakfa hna an rak pawi, Jesuh cu kan mah nih kan pawi ti kha an rak duh, pawi ding in an i tim.

A si nain Taksa in pawi mi a rak si lo kha an thei lo, Thiangthlarau biathli an tlai kho lo. Cu caah Lakfa an rak pawi len. Hi hi Bible nih a dihlak in a langhter lo nain a tuanbia zoh ahcun a tu ka chim mi ning hi a rak si ko. Cu caah Jesuh pawi an duh ve caah Taksa in Nau pawi an rak i zuam ti a si. Cu caah Jeush a chuah thla ah hin Lakfa tampi an rak chuak men lai. Kha kha a palh ka ti duhnak a si. Taksa fa pawi timi, Lakfa pawi timi hi Christmas a muru a si lo. Thiangthlarau in kan hrintthan ding, Jeush naute kan thinlung ah a chuak, kan lomh ti ding tu a si.

Hi hi Laimi tampi nih kan palh ko rua tiah ka ruah ve caah ka rak langhter nak zong a si. Christmas le December hi nungak tlangval i kawp nak caantha ah hmang hram hlah mu. Nungak tlangval karlak diriamhnak le nuamhnak in na hman sual ahcun Jeush Khrih kha na thinlung ah a chuak kho lai lo. Lakfa timi cu mipi hmai ah ningzak thil a si caah na ralrin ka duh.

Lai khuate tampi zong ah Christmas le Carol vah timi hna hi Nungak tlangval karlak caah caan ttha laknak ah a hmang mi an tam. Cu ti na um ve ahcun na thinlung ah Jesuh a chuak kho lai lo. Cun Vawlei mipi khamh tu a simi kan Bawipa zong aa lawm lai lo. Nai hrawng Sweet December boruak ka zoh tikah ka lung a nuam hrimhrim lo. Hi hnu thla tlawmpal ah a thli tein lainawn nak tampi a chuak sual lai ti zong ka phang. Cu tin hna a si sual ahcun kan khua, kan miphun cung ah chiatserhnak a phortu kan si sual lai.

Cu caah ka fanu, Vawlei khamhtu Naute Jesuh kha na thinlung ah a chuak khawh ve nak ding ah Virgin Marry bantuk in nun i zuam. Na thinlung in an khamh tu Jesuh kha lawm law, cu thawngtha cu mipi sin ah phuang. Taksa diriamnak ah na hman lo ding kan duh piak. An dawtu na nu

Leave a Reply