Kawlram mipi an thi cem nak a ruang phuan a si cang Delta Variant in a rak si diam

Theihtlei

Delta Variant {Covid-19} hi ttihnung tuk a si Atu lio kan Kawlram ah Covid-19 in hi tluk in an thihnak hi “Delta Variant” ruangah a si bik, tiah thiamsang nih an chim. Delta Variant timi hi a rianttuanning aa phun dang deuhmi, Coronavirus a si. Mah cu India ram ah October 2020 ah khan rak hmuh hmaisa bik a si i atu ahcun vawlei cung ram 80 hrawngah a darh cang.

Second wave lio ah India ram hmualpho cikcek in a rak tuahtu Covid-19 kha 86% cu Delta Variant hi a si, ti a si. US ram i atu Covid zawtnak thar a huahtu vialte chung in 83% cu hi Delta Variant hi an si ve, ti a si.

Cun ttihnung a si khunnak cu, Covid Vaccine tling tein aa chun cangmi tampi zong hi Virus nihhin a tlak khawh tthiam hna. Israel ram ah an hmuh chuahmi cu, nihin tiang i, Covid-19 Vaccine a ttha bik le hmual ngei bik ah ruahmi, US ser Pfizer Vaccine hmanh nihhin “Delta Variant” cu 41% lawng a kham khawh ti a si. A sullam cu vaccine tling tein i chunh hnu zongah, Delta Variant nih a kan tlak sual ahcun kan thih taktak lo hmanh ah fak ngai in {41%} kan zaw kho tthiamthiam, tinak khi a si.

Cu leng ah, China thiamsang hna nih an hmuh chuahmi pakhat cu, Covid sawhsawh in a zawmi hna an hnar/kaa chung ah a ummi Vrius nakin Delta Variant in a zawmi hna hnar/kaa chungah a ummi Virus cu a let 1000 in a tam deuh, ti a si.
Cucaah Delta Variant in a zawmi hna nih a let 1000 rang deuh in midang an chonh khawh hna, tinak khi a si. Mi chonh khawhning a rang tuk hringhran i a rianttuanning a cak tuk fawn caah, caan tawite chungah mitampi nunnak a lak lengmang nak hi a si, ti a si.

Cuca ahcun, ahohmanh kan daithlang hrimhrim rih hlah seh. Cakei kaa chungah um liomi lawngte kan si ko rih; ahohmanh kan luat cang, ti kho ding kan um rih lo. Luat aa zuam cuahmah liomi lawngte kan si ko rih hih. Delta Variant a tam tuk cang ruangah, fakpi in i ralrin chinchin kan herh Pastor Hram Bik Lian.

Leave a Reply