By Salai Van Lahnin|Nangmah Caah Nanhmah Na Ṭha Bik|.Hi kong hi caan tampi ka ruah hnuah ka rak ṭialmi a si. Cucu zeidah a si ti ahcun mi cheukhat nih cun chunglei nun zoh loin lenglang nun in mi an ṭheo tawn hna. Cucu ahmaan lomi nun tahnak a si tiah ka ruah. Cucaah a tanglei cabia hna hi Mino thazaang peknak le an caah hlawtnak tampi um lai ruahchannak he ka hun ṭialmi a si.

Cheukhat nih cun na thau ruangah, na der ruangah, minak na si ruangah maw siloah na sifah ruangah a lam kip in an soisel ko lai nain na lung dong hlah na sining te ahkhan na lungdi riam ko.

Kha bantuk soiselnak bia nih na ka kawltung peih panh in na tliknak ah lam in pial hrimhrim hlah seh! Nangmah caah nangmah na ṭha bik. Nangmah nih nangmang na sinak cu na hngalh bik. Vawlei cung mirum taktak a simi Bill Gates nih a chimmi cu “Don’t compare yourself with anyone in this world. If you do so, you are insulting yourself.” tiah a chim.

Hi vawlei cungah midang he na nun va ta hlah. Cucu na tuah ahcun nangmah le nangmah na nihsawh le zei na rello a si tiah chim. Cucu nangmah caah cun nangmah na ṭha bik i na dawh bik.

Mi tampi cu minthang pipi hna nun khi ka hngar hna. Kanmah le kanmah kan sining kan i zoh tikah a lung dong mi Mino tampi kan um. Ka nau/u kha nu, kha pa na zoh le a sining na hngar bantuk te khan na theih lo le na hngalh lo karah na hnu in an ngiatu an um ve men dahkaw.Nangmah an rak uartu le an zohchuntu an um ve men dahkaw cucu kan theih ṭung lo. Nangmah bantuk si duhmi an tampi ve men dakaw ka nau/u. Nangmah bantuk muisam kengmi vawlei cungah an um lo nangmah lawnglawng na si. Kei cu nangmah kha na dawh bik na ṭha bik tiah kan ti.

Fale lawng hi kan si lo nu le pa zong kan rak si ve. Cheukhat fale mi thiamsang pipi kan hmuh hna le thiamnak ngei deuhmi kan hmuh hna fale he tahchun kan hmang tawn. A ngaingai ti ko ahcun nu le pa hna na fanu na fapa khi bantuk dirhmun tiang a dir khawh ve lo le a phak khawh ve lo nak a ruang (reason) kha tha tein ruat tuah. Cun kha na fale na tahchunmi fimthiamnak ngeimi nu le pa sining le an rianṭuanning hna kha cuanh in nangmah na sining kha i zohchih tuah hmanh! Cu hnuah lawnglawng nai fiang lai.

Nangmah nih na fanu/fapa lamtluan na hrawh khawh. Na fanu/fapa nih a ngeihmi pahrang kha theihthiam piak khawh izuam. Ringawn tum (Music) a duhmi le a uarmi hna a si ahcun mi pical tiang a chuah khawhnak hnga thazaangtu pe deuh. Cu lo i Ringawn tum a huam komi Siibawi siter tim hlah a hnuah na ngaichihnak lam a si lai.

Cucaah na fanu/fapa duhnak zulh thiam le theihpiak thiam izuam nangmah duhnak lawng zulh ter tim hlah! A tlaunak lam a si lai. Na fanu/fapa bantuk kha hi vawlei ah na hmu hna lai lo. Amah cu amah kha a si ko. Cucaah a zohkhenh le tha pek zia thiam. A dikmi cawnpiaknak Baibal nih a kan cawnpiak ningin cawnpiak khawh izuam camcin.

Ka U/nau zeiruangah dah Facebook ah na hmuhmi nu/pa le cauk ah na hmuhmi nu/pa le Social Media ah na hmuhmi nu/pa bantuk kha na si khawh lo ti na thawknak a hrampi kha philh hrimhrim hlah. Midang nun tahtu si loin midang nih nun tahmi le zohchunmi si tu va zuam zungzal.

Mi zeidah ka si? Ahodah ka si? Zei bantuk zia kengmi dah ka si? Hihi cucu ka tuah hrimhrim lai na timi kha lungder loin tuah khawh izuam law na sining i hngalh na sining thlau hlah! Voikhat na tluk ruangah le na hlawhtlin lo ruangah na hlawhtling camcin lai lo ti nak a si lo. Voikhat na palh cun na palhnak hmun hma kha theih law siamremhtu izuam deuh. Zetik hmanh ah midang tu nun va tah hlah.

Hihi philh hrimhrim hlah! tiah thazaang pek kan duh rihmi cu Pathian nih amah muisam kengin sermi minung na si kha philh hrimhrim hlah. Siangpahrang fanu/fapa dahkaw na si. Bawi vialte lakah Bawi bik, siangpahrang vialte lakah siangpahrang muisam kengin sermi na si kha na lungtling lo maw? Mi van ṭha tuk dahkaw na si. Cucaah a tu na sinak ahkhan a tlingmi le aa lawmmi le mah covo ah a lung hnangammi va si zungzal. Cucu Baibal zong nih a kan cawnpiakmi a si.

Adongah biacah kan duhmi cu, Ka nau/U nangmah ho hlei dah an um? Nangmah le nangmah zumhnak (confident) ngei. Nangmah caah nangmah na ṭha bik. Hi vawlei cungah a tlamtlingmi hohmanh an um lo. Cucu hngal camcin philh hrimhrim hlah! ( No one is perfect in this world). Nangmah caah nangmah na ṭha bik i nangmah caah nangmah na dawh bik.